حديث المدينة

مفيد فوزى : دكتور أحمد جمال الدين موسى لماذا راهنت على أن الدراسة سوف تكون يوم 17 سبتمبر وأن المدارس ستكون مفتوحة ؟
د . أحمد جمال الدين : أنا لم أراهن على شئ إنما يقول القانون أن الدراسة تبدأ فى الأسبوع الثالث من شهر سبتمبر وأنا سألت وأخذت رأى الأساتذة ووجدت أن المعلمين متحمسين جدا ورأوا أنه لا يوجد سبب لتأجيل الدراسة .
مفيد فوزى : هل مستريح لأجور المعلمين ؟
د. أحمد جمال الدين : أنا مستريح إن الخطوات اللى أخدناها خطوات معقولة فى هذه المرحلة وما زلنا نصر على مطالبنا من مجلس الوزراء ووزارة المالية أن يتم النظر فى حذف مكافئة الامتحانات من إجمالى الدخل فى الفترة القادمة وأنا تناقشت يعنى مؤخرا مع السيد رئيس الوزراء وهو متفهم لهذه المطالب .
مفيد فوزى : طيب ، لما حضرتك بتسمع أو تعرف إن مدرس بشتغل بعد الظهر سواق تاكسى أو بيبقى بيشيل صباغ فى الريف المصرى أو بيشتغل فى سوبر ماركت هل هذا يريحك ؟
د . أحمد جمال الدين : يا أستاذ مفيد هذه حالات موجودة ليس فقط للمعلمين يقال إن بعض الناس فى الجامعة تفعل نفس الشئ يعنى نهار لما نتكلم فى المسائل العامة ..
مفيد فوزى : نفس إيه ؟ اللى فى الجامعة ؟
د . أحمد جمال الدين : لأن الحالات الخاصة كثيرة ممكن نعدد أمثلة خاصة واستثنائية عديدة فخلينا نتكلم فى الإطار العام إن المعلم قبل على نفسه يعمل اللى حضرتك بتقوله أو وجد نفسه مضطر إنه يعمل هذا دى حالات خاصة جدا نتكلم فى الإطار العام .
مفيد فوزى : المعلمين مش راضيين ليه ؟
أ . أحمد جمال الدين : مين راضى النهاردة فى مصر ؟
مفيد فوزى : نعم ؟
د . أحمد جمال الدين : مين راضى اشمعنى المعلمين كل الناس بتتمنى دخل أعلى .
مفيد فوزى : طيب ده كلام مهم يتقال حضرتك شايف إن المعلمين يمثلوا ضرورة أو مطلب فئوى يعنى خلينى أحدد هل هو مطلب فئوى ؟
د . أحمد جمال الدين : بالتأكيد لإنه يعبر عن المعلمين لكن مطلب مشروع ومطلب يجب أن نستجيب له من تجاه الدولة ، انت حضرتك لك باع كبير جدا فى الكتابة السياسية وتعلم إن من الناحية الاقتصادية وأنا لا أدافع عن وزارة المالية وإنما أضع الحقائق أمام الجمهور احنا عندنا النهاردة عجز 9% على الأقل من الناتج القومى الإجمالى هذا العجز يمول ازاى من خلال الاقتراض أو من خلال طبع النقود زيادة العجز تؤدى إلى مزيد من طبع النقود أو مزيد من الاقتراض وهذا يؤدى إلى تخيض القيمة الشرائية للنقود وبالتالى لو أنا خدت مبلغ إسميا عالى فى ظل هذه الأمور القوة الشرائية هتقل يبقى التضخم هيزيد فالحكومة فى وضع صعب جدا دى مرحلة صعبة فى مصر فأنا أطالب كوزير التربية والتعليم لصالح المعلمين وأن يعرف التربية والتعليم ككل المطالب بأقصى ما يمكن من قوة لا يمكن أجبر الحكومة على كل مطالبى ناخدها تدريجيا وده اللى حصل وأكثر وزارة بتطالب بحقوق العاملين بها هى وزارة التربية والتعليم وهى الوحيدة اللى حصلت على الزيادة لصالح المعلمين فى إطار هذا الحدث اللى أصدرته رئيس الوزراء بعد إقرار الميزانية الحالية وهذا الحاجة الوحيدة الاستثنائية اللى تمت حتى الآن .
مفيد فوزى : سيادتك تقول لى الأرقام دى هل هى أرقام صادقة أم أرقام كاذبة لما بيتقال إنه رئيس قطاع الموارد البشرية راتبه 75 ألف وبدل الإدارة 9000 ومكافأة شهرية 9000 ، ورئيس قطاع إدارة المشروعات
د . أحمد جمال الدين : يعنى هم 75 ألف زائد 9 زائد 9 ؟
مفيد فوزى : أيوة .
د . أحمد جمال الدين : فى الشهر ؟
مفيد فوزى : أيوة يا فندم
د . أحمد جمال الدين : ممتاز
مفيد فوزى : ورئيس قطاع إدارة المشروعات راتبه 71 ألف وبدل إدارة 9000 ومكافأة شهرية 15 ألف ، ورئيس قطاع الأموال وإدارة المخاطر راتبه 78 ألف وبدل إدارة 9000 ومكافأة شهرية 34 ألف يعنى إجمالى 221 ألف ، ورئيس قطاع شبكة توصيل المعلومات راتبه 75 ألف وبدل إدارة 5000 ومكافأة شهرية 9000 هذا الكلام هل هو خيالى ؟
د . أحمد جمال الدين : أكاذيب كاملة أولا هذه الحاجات تؤكد أن هذه كذبة ومن قال ذلك يجب أن يحاكم ، أول شئ إن دى مش إدارات موجودة بالتربية والتعليم كل هذه الوظائف التى ذكرتها ولا وظيفة فيهم فى وزارة التربية والتعليم دى فى شركات وليست وظائف فى الحكومة وخاصة فى التربية والتعليم ده أول كذب ، ثانى كذب إن مفيش حد بيحصل على ربع هذه المبالغ خالص ، الناس فى وزارة التربية والتعليم لا تحصل على 60 ألف و 50 ألف ده نوع من الشوشرة إما شخص جاهل وإما شخص مغرض لإن فى النهاية أقصى ناس بتاخد إما معلم وإما أستاذ جامعة سابق ولا يتجاوز راتب أى منهم الإجمالى ربع أو خمس هذه المبالغ شهريا ده الأساسى لا أحد يحصل على مبلغ 20 ألف يمكن معظم الناس بياخدوا 10 آلاف جنيه أساتذة الجامعة السابقين مفيش حد بيعدى فيهم ال12 ألف يعنى اللى قال هذا الكلام شخص لا يفكر وظائف لا وجود لها فى التربية والتعليم .
مفيد فوزى : حضرتك زى ما بتقول إن الإعلام بيعمل شوشرة
د . أحمد جمال الدين : أنا ما بقولش الإعلام أنا بقول الشخص اللى قال كده وأنا أعتقد إن حضرتك ما قلتش الكلام ده .
مفيد فوزى : المصدر اللى قال .
د . أحمد جمال الدين : المصدر إما إنه بيقول أى كلام وإما أنه يجهل ، قبل كده اتقال إن فيه حد بياخد مليون جنيه كلام فارغ لم يصرف هذا المبلغ لأى أحد من ميزانية الوزارة .
مفيد فوزى : هل تعتقد أن المدرس يستطيع أن يستغنى عن الدروس الخصوصية فى ظل تقطير وأنا بستخدم الكلمة ما اعرفش توافقنى أم ما توافقنيش عليها تقطير ظروف البلد ، هل الدروس الخصوصية هى الملجأ ؟
د . أحمد جمال الدين : شوف حضرتك الدروس الخصوصية ظاهرة معقدة مظاهرة اجتماعية وأسبابها عديدة يعنى ليه بنحمل المدرس فقط مسئولية الدروس الخصوصية دى تابعة نتاج عناصر وعوامل مختلفة أول عامل منها التنافس الشديد بين الأهالى للوصول بأبنائها لأبواب الجامعة عايز الأماكن المتاحة فى الجامعة خاصة كليات القمة عدد محدود للغاية السنة دى كان عندنا 400 ألف واحد فى 3 ثانوى يتنافسوا على أماكن فى كليات الطب والهندسة 10 آلاف أو 20 ألف فى كليات القمة .
مفيد فوزى : حضرتك رميت الكرة فى ملعب ...
د . أحمد جمال الدين : لا ما أنا هكمل ده أحد العوامل ربنا أعطانا عقل نفكر ونعمل به انت عندك ظاهرة حل هذه الظاهرة إذن ده سبب لو احنا كلنا يا اولياء الأمور وعاوزين أولادنا يخشوا نفس الكليات والكليات عدد القبول فيها محدود واحنا بنتنافس يبقى ولى الأمر همه إن ابنه يحصل على المجموع العالى لإن مكتب التنسيق هو الوسيلة الوحيدة لدخول هذه الكليات إذا ده أول سبب ، ثانى سبب النظام نظام سيئ احنا مسئولين عنه وحضرتك بتطوره قدر الإمكان فالنظام لا تسقطه فى الحفظ المعلم دوره مهم لإنه بيحفظ الطالب المواد الدراسية اللى هيمتحن فيها فبالتالى هنشجع الدولة إنها نبعت أولادها للمدرسين عشان خاطر ولادنا يقدروا يجاوبوا فى الامتحان للحصول على 99% أو 100 % ده السبب الثانى ، السبب الثالث إن المدارس نفسها مازالت الإدارة فيها أقل ما يجب فيه ناس بتتسيب بتخرج إلى أماكن أخرى ، بعض المعلمين وجدوا أن الأمر سهل ومجدى ماديا بدؤوا يتجهوا إلى هذا الأمر الدروس الخصوصية نتاج مجموعة من العوامل الاجتماعية المستمرة بقى لها 30 سنة نرجو إنها ستتم وأنا أعتقد إن تقليلها هيكون من خلال عدة أشياء .
مفيد فوزى : موقفك منها إيه ؟
د . أحمد جمال الدين : تقليل الدروس الخصوصية هيكون من خلال عدة أشياء أول حاجة هنغير نظام الثانوية العامة الحالى نظام قديم وغير عصرى وغير ملائم للنظم الحديثة فى العالم اللى شجع على الحفظ والدروس الخصوصية لابد أيضا للنظر فى نظام القبول فى الجامعات هذا أمر مهم جدا واحنا كنا اقترحنا سنة 2005 نظام جديد مع الاختيار يبقى عندنا مجموعات مختلفة ما يبقاش فيه تنافس فى هذا الأمر اللى جاؤوا بعدى فى الوزراة وآخرهم الأستاذ الدكتور أحمد ذكى بدر والأستاذ الدكتور هانى هلال الوزيرين السابقين اقترحوا نظام جديد قائم على الاختبارات فى الجامعات لربما يكون أحد الحلول المناسبة لحل هذه الظاهرة ربما يكون الأسلم أو غير الأسلم هنناقشه احنا ما خدناش قرار فى هذا المجال فى كل الأحوال عاوزين نقول أن هناك حلول لحل هذه الظاهرة لكن ليس الحل إنك انت تقول تنظر ازاى لمنع الدروس الخصوصية
مفيد فوزى : فيه قرار وزارى بمنع الدروس الخصوصية ؟
د . أحمد جمال الدين : الظاهرة الاجتماعية لا تمنع بحظر بقرار إنما تمنع بالعلاج لمسببات الظاهرة
فاصل غنائى
عبارة عن أغنية جرس الفسحة ضرب
مفيد فوزى : النظام التعليمى حاسس إن هو مجدى قوى ؟
د . أحمد جمال الدين : المرحلة الثانوية .
مفيد فوزى : المرحلة الثانوية .
د . أحمد جمال الدين : آه
مفيد فوزى : هل فى ذهنك تصور لتعليم فيه احترام كبير للبنى آدم ، عقل التلميذ ، هل ممكن حضرتك تدرك كيف تجعل تلميذا فى هذا البلد يفكر ؟
د .أحمد جمال الدين : صحيح احنا بدأنا من 2004 / 2005 نشتغل فى هذا المجال بعد دراسة تجريبية تمت فى عهد الدكتور حسين كامل بهاء الدين على نظام التقويم الشامل إيه هدف نظام التقويم الشامل هو أن نهتم أكثر من التلقين والحفظ بنظام تعليمى قائم على التعلم النشط التلميذ يبحث بنفسه يستوعب ، يفهم ، يحلل ، يتكلم ، يعبر عن نفسه من خلال أنشطة ، من خلال مشاركات .
فاصل
آذان المغرب
د . أحمد جمال الدين : إيه نظام التقويم الشامل هو أن نهتم أكثر من التلقين والحفظ والامتحان التحريرى بنظام تعليمى قائم على التعلم النشط التلميذ يبحث بنفسه ، يستوعب ، يفهم ، يحلل ، يتكلم ، يعبر عن نفسه من خلال أنشطة ، من خلال مناقشات وهذا النظام أصدرنا قرار فى 2005 على أن يطبق على الصفوف الأولى الثلاثة أولى وثانية وثالثة ابتدائى وبدأ بعد كده يعمم تطبيقه حتى وصل دلوقتى إلى ثالثة إعدادى ، هذا النظام أعدنا الصياغة فيه ، صياغته كان فى رأيى إنها حصل فيها مشاكل فى الإنجاز المعلمين اشتكوا أولياء الأمور اشتكوا عبئ إدارى ثقيل خففنا هذا العبئ الإدارى، أعدنا الحيوية لهذا النظام ، جعلنا الأنشطة جزء إجبارى وعليه درجات فى المجموع لأول مرة بشكل كثيف فأنا أعتقد إن النظام بعد تغييره هيكون عنصر هام جدا فى هاتين المرحلتين الابتدائية والإعدادية للتغلب على المشاكل للوصول إلى التعليم النشط القائم على تزكية المهارات والملكات أكثر من حفظ المعلومات ، بالنسبة للمرحلة الثانوية ما زالت تحتاج إلى تطوير شامل يعنى زى ما قلت لحضرتك فيه محاولات تمت من 5 سنين فاتوا فاحنا كل مهمتنا مع وزارة التعليم العالى إن احنا نعد مشروع للتطوير فى ضوء الشغل اللى ابتدى قبل كده ، فى ضوء آراء الخبراء ، فى ضوء آراء المجتمع والمعلمين والطلبة ونقدمه لمن سيأتى فى الحكومة القادمة إن شاء الله لأخذ القرار أنا مش عايز آخذ قرار لا أشرف على تطبيقه ولا أتابعه لكن من سيأتى بعدى سيكون عنده القدرة أن يفعل هذا .
مفيد فوزى : دكتور أحمد يعنى أنا أتيح لى فرصة أن أحاور الدكتور مصطفى كمال حلمى ، وأتيح لى فرصة أن أحاور الدكتور حسين كامل بهاء الدين ، وأتيح لى أيضا أن أحاور الدكتور أحمد زكى بدر وفى كل مرة وفى كل حوار أسمع أفكارا جميلة وكأنى أرى طحنا بلا دقيق وعندى شعور إن احنا فى البلد حتى بعد الثورة نكاد نردد أشياءً فيها أمل لكن مفيهاش واقع لاتزال المدرسة المصرية فى حالة غلب لا يزال المدرس المصرى فى حالة غلب شديد ، ولا يزال منظومة التعليم مرهقة وتعبانة ، ولاتزال هناك بعض المدارس فيها أولاد فى المراحل الأولى ما بيعرفوش يقرأوا ويكتبوا وأنا أتصور أنك كوزير لديك ثورية فى ذهنك لإحداث شئ أخضر أنا أتمنى أن يكون الفعل يتجاوز القول .
د . أحمد جمال الدين : حضرتك محق فى هذا هناك دائما فجوة بين ما نفعله على المستوى المركزى وبين ما يتم على أرض الواقع وده شئ لازم نتفهمه إن احنا عندنا نظام تعليمى كبير عندنا 45 ألف مدرسة ، عندنا 17.5 مليون تلميذ
مفيد فوزى : عندنا مليون معلم
د . أحمد جمال الدين : 1.07 مليون معلم فى التربية والتعليم فبالتالى هناك ثقل بيروقراطى ، ثقل إدارى ، مشكلة متابعة ، إلى آخره كيف نعالج هذه المسألة هل الحل ألا أطور وللا نطور ونحاول أن نتابع التطبيق أنا مبدئى الشخصى فى حياتى إن أنا أعمل اللى على واستحس الآخرين أن يقوموا بعمل ما عليهم فأنا مهمتى كوزارة تربية وتعليم كديوان عام وزارة التربية والتعليم أن أضع السياسة التعليمية الأفضل ، أن أطور فيها باستمرار ، أن أحاول أن أفعلها وأتابع التنفيذ بطبيعتى لا أميل إطلاقا للاستراتيجيات والخطط وما إلى ذلك إنما لعمل برامج تنفيذية لها تطبيق واقعى يوم بيوم هل كل المدارس يتم التطبيق فيها على النحو الذى أرغب فيه لا يوجد ضمان لا لى ولا لغيرى فى هذا . أنا بتصور دور مهم جدا للمجتمع المدنى فى هذا الأمر ، فى العالم حضرتك تعرف إنه أولياء الأمور بيلعبوا دور رئيسى فى مصير المدرسة وفى العالم كله وجود مجلس من أولياء الأمور متابعة أولياء الأمور لأبنائها فى المدرسة دورها حاسم فى تحسين آداء المدرسة ولذلك أنا فى 2005 أصدرنا قرار وزارى ينظم مجالس الأمناء وإعادة تشكيلها تشكيل ديمقراطى ما كانش ده الموضة ، 5 يمثلونا تمثيل حر مباشر وإن المعلوم بيختار 3 بيمثلوه وإن المحافظ بيختار 3 أو 4 يمثلوا الناس زى أساتذة الجامعة ، الأطباء ، الصحفيين معلمين سابقين أعضاء فى المجلس مع مدير المدرسة عضو وليس رئيس فى المجلس المجموعة دى هدفها إنها تدير وتراقب العملية داخل المدرسة وجعلنا اختصاص مالى كبير 90 % من المصاريف موجودة تحت أمرة هؤلاء الناس .
مفيد فوزى : الكلام ده تستطيعه دلوقتى ؟
د . أحمد جمال الدين : نزل آه يا فندم وفيه مدارس طبقته .
مفيد فوزى : فين ؟
د . أحمد جمال الدين : فى كل الجمهورية لإن قرار الوزارة يشمل جميع المدارس من 2005 طبقتها بشكل جيد وحصل إنجازات فى بعضها المدارس الأخرى لم تفعل فيها المدير سيطر على الاختيار الناس ما تواجدش احنا قعدنا من الشهر اللى فات قرار وزارى نظم دفع قوة أكثر لكن مازلنا نطلب من القطاع المدنى إنه يمارس دوره النص يستحمل هذا الأمر ، القدرات المادية موجودة فى مجلس الأمناء لكن المبادرة منهم شئ هام .
مفيد فوزى : لماذا القادرون يلجؤوا للمدارس الخاصة يعنى فهمنى لماذا لما أنا أناقش واحد قادر يقول لى لأن هناك فيه تعليم وأنا ابن المدرسة الإبتدائية الأميرية
د . أحمد جمال الدين : أنا ابن المدرسة الابتدائية الأميرية
مفيد فوزى : أولادك يا فندم فين ؟
د . أحمد جمال الدين : مدرسة تجريبية حكومية .
مفيد فوزى : تجريبية لغات يعنى ؟
د . أحمد جمال الدين : لغات حكومية وليست خاصة لكن كل واحد باختياره لى زمايلى ولى أخوة أشقائى أصغر منى أولادهم فى مدارس خاصة .
مفيد فوزى : أولادهم فى مدارس خاصة ؟
د . أحمد جمال الدين : مدارس خاصة .
مفيد فوزى : والله ناصحين يضايقك لو قلت كده ؟
د . أحمد جمال الدين : وأنا كنت ناصح كمان ولادى الحمد لله كلهم كويسين مش كل واحد ودى ابنه مدرسة تجريبية أساء الاختيار ولا كل واحد ودى مدارس خاصة أساء الاختيار خلينا نترك المسائل دى للاختيار الحر يمارسوا أولياء الأمور .
مفيد فوزى : دكتور أحمد اعطنى عذرك لما تقول مدارس اختيار حر يا حبيبى ما هو المشكلة فى نهاية الأمر إيه إنه بيلجأ لتعليم محترم فيه معلم لديه كرامة ولديه أجره ولديه ما يمكن أن يسمى باحترام الدولة له من المؤكد أن المعلم فى المدرسة الخاصة أفضل هل أنا مخطئ ؟
د . أحمد جمال الدين : إلى حد ما الحقيقة فيه شكوى كثيرة جدا من المعلمين فى المدارس الخاصة .
مفيد فوزى : فى إيه يا فندم ؟
د . أحمد جمال الدين : حوالين مرتباتهم ، حوالين معاملتهم أنا مش عاوز التمييز ده لإن التمييز ده فيه تعميم مش كل المدارس الخاصة أجود من المدارس الحكومية والواقع بيقول كده وأنا عندى معلومات موثقة ومش معلومات بس عندى شكاوى وبتعامل مع ده كل يوم مش كل المدارس الخاصة كويسة فيه مدارس حكومية جيدة وأخرى أقل جودة وفيه أوضاع مدرسين هنا جيدة وأوضاع أقل جودة اللى عاوز أقوله هنا فى النهاية إن المجتمع لابد أن يأخذ التعليم أكثر إذا أعطاه أولوية أكثر مشاكل التعليم ستقل مع الوقت ، حضرتك بتتكلم عن رواتب المعلمين مين اللى بيحدد الرتبات للمعلمين ؟ الدولة لإن الدولة هى اللى بتخصص ميزانية للصرف على هذا البلد إذا الدولة اقتنعت أكثر إن المعلمين هيدونا دعم أكثر للمعلمين احنا بنحاول ناخد
مفيد فوزى : هى الدولة مش مقتنعة ؟ الدولة مش مقتنعة إن المعلم ده هو أخطر شخصية؟
د . أحمد جمال الدين : الدولة عليها ضغوط انت كمجلس وزراء أو كرئيس جمهورية أو كوزير مالية هتعمل إيه عندك التعليم مهم جدا ، عندك الصحة مهمة جدا ، عندك التأمينات مهمة جدا عندك أساسيات إذا فيه أولويات لابد أولويات لو انت عاوز تزود التعليم من 41 مليار دولار ل 51 مليار لازم تخصص لى 10 مليار إضافية تحطهم فى التعليم يروحوا للتعليم يروحوا للمدارس ، للأبنية التعليمية القرار ده مهم فى مجلس الوزراء كلهم بيقولوا الكلام اللى حضرتك بتقوله أنا بحاول أدافع حاليا لكن أنا فى مجلس الوزراء بحاول أعمل العكس أنا بقول لهم يا جماعة احنا بندى البترول دعم حوالى 100 مليار أو أكثر من 100 مليار هل يعقل هذا الأمر ادونا 20 مليار ، ادونا 30 مليار هيفرق التعليم فى مصر انت حضرتك بتتكلم عن المدرسة العامة مدارس الدولة الحكومية 30 % من فصولنا الكثافة فيها أكثر من 42 تلميذ فى الفصل بعض المدارس 100 بعض المدارس 70 ده نتيجة إيه إن احنا ما عندناش فصول كافية هم عارفين المشاكل للى فوق ال70 موجودة فى أماكن بناء زى الجيزة ، الجيزة أسوأ مكان فى هذا الأمر لأننا لا نجد مكان نبنى فيه المدارس يستوعب هؤلاء الطلبة زى الكثافات العالية فأنا عاوز فى النهاية كل ما ادتينى تمويل أكثر كل ما قدرت أحقق جزء من المشاكل اتخلص منها يعنى احنا حسبنا أول ما جيت الوزارة طلبت إن احنا نناقش المسألة بوضوح مفيش حاجة مخفية على الإطلاق احنا مشاكلنا فى الأبنية التعليمية تقدر بكام محتاجين 1.07 مليار جنيه حتى 2017 لأقضى على المشاكل إيه هى المشاكل : الكثافات اللى أعلى من 40 فى الفصل ، المدارس تشتغل دورتين فى اليوم اللى هو تقصير اليوم الدراسى ، المناطق اللى مازالت محرومة من المدارس اللى موجودة فى الصعيد ، موجودة فى بحرى هذه المدارس فيها يمكن 200 أو 300 فى سن التعليم بيطروا يمشوا كيلو ونص أو كيلو فبيحصل تسرب والفتيات بيلجؤوا لفصول محو الأمية ، عندنا مشاكل متعلقة بمدارس زى الاحتياجات الخاصة تسرب نتيجة الكثافات ، عندى مشاكل تتعلق بالبنية التكنولوجية غير البنية العالم كله بيستخدم وسائل تكنولوجية فى التعلم عاوز أنشرها فى مدارسنا ازاى أنشر فى مدارسنا سبورة ذكية بتستخدم الوسائل الحديثة ، أصل ازاى بكمبيوتر فى كل فصل التكلفة عدة مليارات لابد إن احنا نجتمع
مفيد فوزى : الكلام اللى حضرتك بتقوله ده أحلام مش كدة ؟
د . أحمد جمال الدين : لا مش أحلام .
مفيد فوزى : يعنى إيه يا فندم مش أحلام ؟
د . أحمد جمال الدين : اللى حصل السنة دى فى ميزانية استثمارات وزارة التربية والتعليم احنا خدنا تقريبا ضعف ما كان مخصص لنا فى العام الماضى للبنية التكنوبوجية وبعدين احنا عندنا صندوق دعم المشروعات التعليمية أنا مستعد أدفع منه فوق النص مليار يبقى عندنا حوالى مليار جنيه تقريبا هنخصصها لتحسين البنية التكنولوجية فى المدارس اللى كانت محرومة منها بنركز على المدارس الثانوية والمدارس الإعدادية لإن عددها أقل والطلبة فيها فى سن أكبر والتكنولوجيا موجهة لهذا النوع من المدارس للأسف هى مش منتشرة فى المدارس الابتدائية ، فى المدارس الابتدائية نحاول على الأقل إدخال السبورة الذكية جهاز كمبيوتر واحد فى عدد من المدارس الابتدائية مش كل المدارس لإن كلها محتاجة عدة مليارات ، المجتمع المدنى يساهم معانا
مفيد فوزى : هل خاطبت المجتمع المدنى يا فندم ؟
د . أحمد جمال الدين : على اتصال مستمر .
مفيد فوزى : النقابة فين يا فندم ؟
د . أحمد جمال الدين : النقابة مش تبعى أنا وزير فى الدولة تبع جهاز إدارى النقابة مستقلة عنى .
مفيد فوزى : أمال ليه يا فندم بتاخدوا 7 % فى الوزارة بتاخدوا 7 5 من الأساسى وبتخصم 2 جنيه نقابة وبتخصم جنيه للنادى ؟
د . أحمد جمال الدين : إذا كان القانون بينص على إن الخصم بيتم توريده فورا للنقابة لكن النقابة ليست تابعة لوزير التربية والتعليم .
مفيد فوزى : ليه دائما من فترة الثورة 52 كان دائما النقيب هو الوزير هل حضرتك شايف
د . أحمد جمال الدين : الوزير كان مصطفى كمال حلمى
مفيد فوزى : لا أنا بتكلم عن أيام الثورة
د . أحمد جمال الدين : لا أنا ما أعرفش
مفيد فوزى : أيام الثورة الأولى
د . أحمد جمال الدين : ربما
مفيد فوزى : كان كمال الدين حسين هو الوزير والنقيب
د . أحمد جمال الدين : فى النهاية ده خطأ جسيم لإن فى النهاية النقيب يجب أن يكون مستقل لأنها تمثل جموع المعلمين وتنادى بمطالبهم والوزير هو الجهة الإدارية فأنا أعتقد إن هيكون فيه تناقض
مفيد فوزى : حضرتك ...
تم قطع البرنامج لمتابعة آخر تطورات أحداث جمعة تصحيح المسار وأحداث وزارة الداخلية والسفارة الإسرائيلية ولم يتم استكمال إذاعة البرنامج مرة أخرى