رفقاً بالشباب..«1»

ما حدث يا سيدي الفاضل أني توجهت يوم الخميس 11 من فبراير 2010 إلي الصالة المغطاة باستاد القاهرة لمتابعة الماتش، والحقيقة أثناء التفتيش علي البوابة الرئيسية للاستاد كانت المعاملة راقية جدا وفي منتهي التحضر، والحق يقال الكل كان متعاوناً معنا ومع غيرنا.
وكل شيء كان ماشي بشكل طبيعي والواحد كان «فرحان» إنه رايح يتفرج علي ماتش ويغير جو..المهم اشتريت التذاكر ودخلنا وفي أثناء صعودنا للصالة المغطاة كان منتخب الجزائر للسيدات نازل من نفس الممشي اللي أنا وزميلي طالعين فيه فا أنا أخدت جنب أنا وزميلي ومشينا ملاصقين للسور تقريبا وكان التأمين بتاع البعثة قدامهم وجنبهم ومفيش أي مشكلة وبعدين فوجئت بظهور شخص في زي مدني أنا مكنتش أعرف مين هو بالظبط وفضل يحلق عليا أنا وزميلي بإيده عشان يوقفنا علي جنب مع العلم أن الفريق بتاع الجزائر كان بالفعل مشي من جنبنا تماما واحنا بقينا في ضهره وفي طريقنا لبوابة الصالة المغطاة..المهم أنا ما اتكلمتش وكل اللي عملته إني بصيتله شذرا فا قالي مش عاجبك مالك واقف كده ليه ولسه ما رديتش الكلمة وفي طريقي للتحرك من تاني لاقيته بيزقني في صدري بعنف فا رد فعل طبيعي من إنسان طبيعي إني زقيته برضه في صدره فهو فضل يزعق ويصرخ في وشي ويقولي مالك ياض أنت مين ياض فا أنا زعقت معاه وقولتله إنت اللي مين وبتمد إيدك إزاي عليا كده ولسه ما كملتش لاقيت 4 لابسين بدل بيجرو عليا وبيزعقو فيا وبيقولولي مالك ياابني أنت مجنون دا ظابط مباحث قولتلهم أنا إيه اللي عرفني إنه ظابط مباحث وبعدين ظابط ولا مش ظابط ما يمدش إيده بأي حال عليا ومش من حقه وأنا ما عملتش أي حاجة تستحق إنه يمد إيده عليا.. واحد فيهم هددني بالضرب بالبوكس ( برفع إيده وضم قبضة إيده ) وأنا في اللحظة دي خفت فعلا لأني مركب تقويم في أسناني وأي خبطة صف سناني كله ها يطير.. وكلهم تنافسوا في الهجوم عليا سواء بالتهديد أو التعنيف اللفظي ولما شافوني مش خايف منهم هو ده اللي جننهم أكتر وفي أثناء ما هما واقفين حواليا كان في عربية معدية والكلام دا كله واحنا لسه فوق قدام باب الصالة بالظبط .. (وللواقعة المؤسفة بقية).