عن العشق والهوى المرة دي مش مصدقة الخناقة..حتة فيلم يخليك تتعصب كل العصبية دي ! يعني على أساس مش لاقيين مشاكل في حياتنا فبندور على مشاكل نقتبسها من الأفلام.. ومن خيال صنَاع الأفلام..
كتبت لك آخر مرةعن مشكلتي معاك في سيطرتك على التلفزيون وعلى ريموت التلفزيون على وجه التحديد، وإنك حتى لما بتقرر تديني الريموت بفضل أفكر فيك وبحاول أجيب قناة أنت بتحبها..لدرجة إني بكون مركزة معاك ومع انفعالاتك أكتر من تركيزي في اللي بتفرج عليه..
آه لو أنت تعرف أن كل الصراعات التافهة دي وكل العك ده بيدور في مخي ..عمرك ما هتصدق .. وفي الآخر بتقول إني مش مهتمة بيك..
عموما أنا تعبت خلاص من كل التفكير ده، عايزة أغير نفسي ، قلت لنفسي من بُكره أنا اللي هقرر أتفرج على إيه وبدون شعور بالذنب..الساعة سبعة بالليل بُكره هييجي فيلم "عن العشق والهوى" على روتانا سينما هشوفه كله.. قرار نهائي..إن شاء الله
عن العشق والهوى...مش أول مرة أشوفه لكن ساعة ما شوفته كان من كام سنة وكان فايتني حتت منه، المرة دي من أوله لآخره..
والعجيب إني اتفاجئت إنك قاعد معايا بتشوفه وبانتباه..لكن طبعا عامل إنك مش مهتم بالفيلم بس أنا كنت متأكده إنك متابع..حلوة قوة الشخصية برضه بس إيه اللي شدك فيه؟ جايز مكنتش مصدق اللي بيحصل فقررت تركز عشان تفهم إيه الموضوع ؟ .. جايز..
الفيلم كان مأساوي بس إحنا بدأنا نضحك على اللي بيحصل..وخصوصا مشاهد الإدمان والحاجات اللي مش منطقية..واللخبطة اللي حاصله بين كل الأبطال اللي في حالة عشق مأساوي..كمان مش واخدين على أحمد السقا وهو رومانسي كده وبينهار في العياط.. لأ فعلا وإحنا بنضحك حسيت أن قلبنا ميت ..الناس متقطعة وإحنا بنضحك..إيه الجحود ده..
حاولت أمسك نفسي أنا لأني معروف إني حسيسة وعايزة أحافظ على الصورة دي..واتفاجئت بحوار بين عمر أو أحمد السقا وبين أخوه طارق لطفي" مش فاكره اسمه ".. مكنتش انتبهت له المرة الأولانية..كانت لحظه مكاشفة..والسقا اكتشف أن أخوه بيحب قسمت مراته (إيه الأسم الشيك ده) اللي هي بشرى..والسقا بيقول له بانهيار: "يعني لما كنت بتسلم على مراتي وبتبوسها كنت بتبوس مرات أخوك والا الست اللي بتحبها؟ "..
هو البوس عندهم عادي كده واللا إحنا اللي متخلفين والا ايه؟؟
كانت سهرة خفيفة ولطيفة ..أتأثرنا قوي ..الصراحة الفيلم حلو.. وضحكنا برضه..لكن بعد الفيلم حاولت أنا، وياريتني ما حاولت، حاولت أحلل الفيلم كعادتي المهببة وهوباااا قلبت بخناقة...
لقيت نفسي بنكُشك وبقولك إيه رأيك في الفيلم ..على أساس يعني كنت عايزة أعرف مدى التسامح والتفتح اللي بتتمتع بيهم
أنت مش أول واحد أحب أعرف رأيه في الفيلم، لأني قبل كده اتناقشت مع نهى صاحبتي..واتفاجئت برأيها..أنا مثلا كنت شايفة أن سلمى "منة شلبي" كانت صادقة مع عمر "السقا"، وفعلا كلامها كان صدق وإنها وقعت في حبه فعلا من غير ما تقصد..أما نهى صديقتي الخبيثة فكان رأيها إنها اتمسكنت لحد ماتمكنت إلى آخر فرضيات نظرية المؤامرة في نسختها النسائية..وزي ما قالت لي نهى وفطمتني.."يا بنتي انتي هبله قوي، دي كانت بتحب واحد صاحب باباها يعني منيلة بستين نيلة.. وبعدين دي الأول قالت له مش بخلّف وأصلي مابحبش عصام جوزي وبعدين شربوا ورقصوا واللي حصل حصل عادي خالص وبعدها بقى قال إيه كل ما جوزي يقرّب مني أفتكرك أنت..وكل ما يلمسني أفتكر لمستك أنت .. وبعد شويه اتجوزني في السر وأوعدك عمري ما هطلب منك حاجة وبعد شوية أنا حامل ياحبيبي..لأ بقى أنا بقالي سنتين مستحملة..وفجأه الكلام اتغيروكان ناقص تقول له أديني حقوقي وإلا هفضحك واشحططك في محكمة الأسرة..وفي الآخرهو طلّق مراته الأولانية الجميلة العاقلة اللي أسمها شيك دي وهي بقت الزوجة الرسمية وكوشت على كل حاجة..رغم أنه ساب حبه الأول عاليا (منى زكي) علشان أختها بطة بطاطس(غادة عبد الرازق) بتعمل حاجات بطّالة.. ورغم أن بطة عملت كده مضطرة عشان المعيشة صعبة.. ومكنتش متجوزة خللي بالك ! وفي الآخر أتجوز اللي أوحش منها اللي هي منة شلبي اللي هي متجوزة وخانت جوزها بدون مبرر ..فهمتي؟ ده سيناريو معروف لخطف الرجالة يا ذكية ..!! " ..
الحقيقة مكنتش مقتنعة بنظرية المؤامرة الحريمي دي وحاسة أن كل واحد بياخد نصيبه والحمد لله مفيش مؤامرة ولا حاجة..
لكن لما جيت أناقشك لقيت نفسي بغير وعي متبنية وجهة نظر البت الأروبة نهى زي الدلدولة .. كنت عايزة زي ماتقول كده .. استفزك .. لقيتك بتدافع عن سلمى "منة شلبي" جامد.. ده ايه الحنية دي ماهوطبعا هتدافع عن الزوجة التانية..
وبتقوللي :"ماهي استحملت سنتين..ماهي خلته سعيد وبالتالي أسعد زوجته الأولى..سنتين عايشة في الضل..كفاية محاولتش تزعجه ولا تقول له تعال أقف مع البواب وهو بيغير الأنبوبة والا احضر اجتماع مجلس إدارة العمارة والا خرج لي كيس الزبالة..وايه.. لسنتين..سنتيييييين"
هو اللي طلع عليك سنتين سنتين ..ألا صحيح إيه اللي بيحصل في الجواز بعد سنتين؟؟
بصراحة فصلتني عن الفيلم..ايه مجلس الادارة وكيس الزبالة .. وبعدين هو أنا عمري طلبت منك تحضر اجتماع مجلس الإدارة ؟؟
وليه بتصرررررررخ كده ؟؟ مش مصدقة الخناقة..حتة فيلم يخليك تتعصب كل العصبية دي ! يعني على أساس مش لاقيين مشاكل في حياتنا فبندور على مشاكل نقتبسها من الأفلام..
انا ساعتها ماردتش عليك وقصرت الشر وخصوصا أن صوتك كان عالي قوي وانت بتدافع عن منة شلبي، وكرهتني فيها رغم اني كنت بضحك عليك ومتعاطفة معاها بقى هه..بس أنا لسه زعلانه ومش هسامحك
عموما شكرا والسلام... من زوجتك... حنان هذه الجوابات هي من وحي خيال الكاتبة وأي تشابه مع الواقع هو مسئولية كل زوج !