عبد المنعم حسين يكتب: عشان عبير مصر تولع

ليه عاملين بينا
ميت سور والف سياج
نسيب الطريق المستقيم
ونمشى بالزجزاج
جَنِّبنا عقلنا
وحكمنا بالهوى والمزاج
وعشان عبير ليها مزاج
قلعت الصليب ولبست البرقع
مش مشكله لما مصر تولع

ايه حصل يا مصرى
طول عمر توبنا
من مسلم وقبطى
وسكان بتنا
ليبرالى وسلفى
شيوعى واخوانى
والرب واحد
والضمير مصرى
وعشان عبير تضرب عُرفى
تصبح لا بتشوف ولا بتسمع
ومش مشكله لما مصر تولع

عشان عيون عبير المدخمسه
مصر تولع
واوعى تبكى على مصر
أو تدمع
ونموت فدا جوازة عبير المدنسه
بس عبير مش حترجع
تقوم الف فتنه
بس للمنطق مش حنخضع
و لا للعقل حنركع
وانا عاوز اختى
حتى لو ضحيت بأمى
وضحيت بالوطن اجمع
مع إن اللى عشان راجل تسيب دينها
هو ده اللى يدينها
ولا تستحق عود كبريت
عشانها يولع
يا مصرى طول عمرك فِطن
ولا بتقدر عليك الوقايع والفتن
تفهمها وهى طايره
والطايره قبل ما تنزل تتركن
طول عمرك
جامد
صامد
عمر ما ضميرك مات
ولا عزمك سِكِن
أوعى تِخيل عليك اللعبه
وتخاف من عفريت العلبه
وعقلك يتركن
وتتوه فى عبير وكاميليا
واللى اسلم واللى اتنصر
واللى طَّلق واللى اتخلع
كلنا ح نتلسوع
وح نتحرق لما مصر تولع
اوعى يا مصرى
تسيب مصر تولع