خالد النبوى يكتب:ثار ولا طالش!

إيه هو ده؟؟
شوية عيال هم إللي هيديروا البلد مش كفاية عملتوا الثورة، خلاص روّحوا بقي وكل واحد يرجع يشوف شغله، والا إنتوا عايزين تديرو البلد ويبقي إللي بيدرها شوية عيال؟
علي فكرة هم لا يديرون البلد هم عملوا الثورة لكن من يدير البلد هو المجلس الأعلي، وعلي فكرة العيال إللي عملوا الثورة دول أعمارهم من أوائل إلي أواخر العشرينات وحتي أواخر التلاتينيات، وشوفوا مين رئيس أمريكا النهاردة ومين رئيس وزراء بريطانيا وأعمارهم كام وإنتو تعرفوا إن العيال بيديروا أكبر بلاد العالم.
كله خايف ع الأمن ع المرور ع الاقتصاد ع الأجور.. من إرتفاع الأسعار .. يصح.. لكن يصح برضه نخاف علي الثوار.
الثوار ثاروا من أجل أمن يحمي الشعب وليس أمن يحمي النظام، الثوار ثاروا لأن الإقتصاد واقع أصلا، والبلد مديونة، تريلون و80 مليار جنيه بين داخلي وخارجي، والديون دي قبل 25 يناير، الثوار ثاروا من أجل تحسين الأجور، من أجل إنخفاض الأسعار، الثوار الشهدا دفعوا حياتهم علشان إحنا نقول :"إرفع راسك فوق إنت مصري"، فاكرينها دي؟ دي طبعا ماكنش لها وجود قبل 25 يناير، الديون كانت موجودة بس الكرامة كان موؤدة.. الثوار خلونا نرفع راسنا لفوق؛ يبقوا عيال رجالة، ووقفوا وقفة رجالة وإحنا والشعب وقفنا معاهم وقفة رجالة، كل واحد فيهم خرج شايل روحه علي كفه علشان إنت ترفع راسك فوق وتقول أنا مصري.
طب موجودين ليه في الميدان كل جمعة؟؟
علشان خايفين ع الثورة، خايفين تتسرق مش بس منهم ومنكم انتو كمان، ماحدش فكّر خالص في الثوري ده لو لم تحقق الثورة أهدافها؟، وإللي استشهد وساب لوالدته مجرد لقب حتي لو كان لقب أم الشهيد سيظل مجرد لقب لو لم تحقق الثورة أهدافها، وعلي فكرة بقي الأمن ليس مسؤلية الثوار ، الأمن مسؤلية الأمن والمرور مسؤلية المرور علي فكرة مش مسؤليتهم ، وبعدين ليه متعاملين مع الثوار علي إنهم نجحوا في أخر سنة طب أو نجحو في الثانوية العامة ومع ذلك شوفو انتو لواحد نجح في آخر طب وطلع الأول وماتعينش معيد يعمل إيه، أو واحد جاب في الثانوية العامة 98% ومدخلش صيدلة متهيألي لو إتجنن أو انتحر هتعذروه، طب أومال بقي إللي ثار ولا طالش يعمل إيه؟!
ياجماعة ده الثوار دول نجّحوا مصر كلها، وبمجموع علي فكرة، مصر بقالها يجي تلاتين أربعين سنة مش جايبة مجموع ، وكلنا فقدنا الأمل حتي في الملاحق وفجأة علي إيد الثوار دول مصر نجحت وبمجموع وبعد كده جايين تقولولهم خلي عنك إنت! طب ماهو خلي عنك ماعملتوش إنتوا الثورة ليه؟، هو كل حزب وكل جماعة سياسية وكل إدارة وكل مجموعة هتقولنا خلي عنك.. لأ كان من الأول.
إنتو كده بصراحة خايفين علي إنفجار أي شيئ إلا إنفجار الثوار، متصورين إن الثائر ده لما انفجر ثار وماعدش جواه ثورة. لأ مش صحيح. الثائر ده لو حس إنه ثار ولا طالش هتبقي دي الكارثة الحقيقية، وعلي فكرة هو مش عايز يطول حاجة لنفسه هو عايز البلد كلها تطول، وإلا مصر ماتطولش؟ وشعبها مايطولش؟
أنا خايف زيكوا ع الأمن وخايف علي الإقتصاد وخايف ع الأجور وخايف كمان من الفلول وخايف م البطء بس
أكتر حاجة مخوفاني إن إللي ثار مايطولش.
وحشة قوي حكاية ثار ولا طالش دي
خصوصا لو كان إللي ثار هو الشعب