عبد المنعم حسين يكتب: سكون

سكون .. إنتباه يا زمن
ولا حركه وللخلف دُر
ثابت كل الناس
لحد ما الموكب يمر
ونا محسور ميه
بتصبب عرق
ومكان الميه ما بيخر
اتكربسنا سردين فى علب
واتحشينا ميه فى قرب
نبلع سكوتنا
وبنشرب من غير بحر
الحرس على الأهبه
واحنا برصة الكوبه
ولا بننفع ولا بنضر
الموكب لسه فى الجراج
والنايم لسه مصحاش
أخره عشانه الفجر
الوقت جَمِد
والثانيه صارت دهر
ونا بلا وجود
وكل من حولى صفر
وسمعت فى البعيد
صوت جميل حُر
ينشد
" كلنا جميعاُ للوطن ضحيه "
ابتسمت وسلمت
على كل ظلم وقهر
وبقيت شهيد
شهاده لا تعز ولا تسُر
أخوكم
محسور مزنوق الُمر