أوعاد الدسوقي تكتب: أفرح يا أبن الكئيبة

علي قد ما ربنا خص الشعب المصري بخفة الدم وجمال الروح والقدرة علي ابتكار القفشات وإبداع الإفيهات حتي في أصعب اللحظات إلا أن فيه نسبة منهم تخصص كآبه ورذالة ,, مش بس كده لا دول كمان عندهم قدرة رهيبة في أنهم ينكدوا علي نفسهم و علي غيرهم تحس أنهم بيخافوا يضحكوا ل وشهم يكرمش أو يفرحوا لقلبهم يتعود علي السعادة وكأن لو فرحوا الدولة هتطالبهم بدفع ضرائب علي هذه المشاعر!!

النوعية دي بتظهر وتنشط مع كل مناسبة حلوة تعيشها مصر علشان تنكد علي أهالينا و تسود الدنيا في عنينا زى ما حصل بالضبط وقت الإستفتاء علي الدستور من حزب "الكآبة" اللي صعب عليه قوي أن الشعب يعيش كام ساعة في سعادة ف ما صدقوا الصناديق قفلت من هنا و بدأوا يشتغلوا ولوله وندب,, مرة يقولك نسبة الإقبال ضعيفة و مرة تانيه يقولك مفيش شباب شارك في التصويت.

واضح أن أخونا البعده عندهم عمي حيثي لدرجة أنهم مش شايفين الملايين اللي نزلت و الشباب اللي شارك في الإستفتاء خاصة شباب المحافظات اللي زى الفل وهما وقفين طوابير امتدت لعشرات الأمتار أمام اللجان _ شباب دول ولا مش شباب يا متعلمين يا بتوع المدارس_ ولا أنتم مش ب تعترفوا غير بشباب الحركات و الائتلافات و"اللوك لوك" في الفضائيات وشوية العيال الملزقة اللي مسقطه البنطلون من وسطها و شايله شنطة علي ضهرها زى سلاحف النينجا وعاملين فيها ألتراس و ثورجية ,, مصيبة لتكونوا مصدقين الجزيرة و كذبها ,, ولا تكونوا فاهمين أن صور الطوابير اللي نقلتها ON TV و ال CBC فوتوشوب ولا حاجة؟!.

ومع ذلك لو أنت وهو ملكش نفس تفرح بنجاح مصر وتحقيقها لأول استحقاق في خارطة المستقبل حقك يا سيدي,,, و لو معندكش سبب للفرحة أو مستكترها علي نفسك وعلينا أنت حر وبراحتك ,,, بس تعالي كده ونبي علي جانب واقعد علشان ده مش وقتك خالص و سيب المصريين يفرحوا من قلبهم لأن الفرحة وحشتهم بعد 3 سنين عجاف شافوا فيها العذاب ألوان.

نداء لشلة الكآبة بلاش تنغصوا علي الشعب فرحته و تقللوا من إنجازه سيبوا الناس تعيش لحظة الفخر ب الخروج العظيم ويحتفلوا بنجاح دستورهم اللي أعلن وفاة جماعة الإخوان الإرهابية رسمياً ,, و يفرحوا بجيشهم و شرطتهم و بالدرس اللي علموه لأمريكا و ألاضيشها و موزه وصبيانها أن لا صوت يعلو فوق صوت الإرادة المصرية و أن المصري لما يحب يعمل حاجة بيعملها رغم أنف المتآمرين ,,, مصر تستحق الفرحة ف يا رب كتر أفرحها و أكفيها شر المكتئبين.