احمد عفيفي يكتب : المجرم !!

بحثت في قواميس اللغة عن كلمة تعبّر عما قاله مرسي أمس ، فلم أجد إلا هذه الكلمة " عنوان المقال " .. المجرم .. جابلي شلل امبارح ومشفتش النوم .. البيه لسه بيهدد شعب مصر .. الباشا أعمى البصر والبصيرة .. الافندي شال برقع الحيا ع الأخر .. لسه فيه النفس .. لسه بيتوّعدنا ويخوّفنا ببحار الدم .. الكرسي ودونه رقبتي .. وحياة أمك لنقطعهالك!!

خلينا أقولكم .. روعة شعب مصر وجماله في سلميته وطهارته .. بس لو حب يأدب " الصيّع " .. يأدب أبوهم واللي خلفوهم .. والله العظيم لو واحد على عشرة بس من اللي كانوا في محافظة صغيرة من محافظات مصر راحوا بنفسهم قصر القبة - ان كان الافندي هناك – ليجروه من قفاه ويعملوا فيه اللي اتعمل في القذافي .. بس احنا شعب نبيل .. حنجيبك من قفاك برضه .. بس حنحاسبك حساب عسير .. وكل اللي عملته كوم وخطابك امبارح كوم تاني خالص .. اكثر المتشائمين قال انك حتطرح فكرة استفتاء شعبي على وجودك من عدمه في السلطة .. ومكناش حنقبلها منك .. وانت برضه قلبك حاسس ، فسمعت كلام بديع والشاطر والمقطف اللي اسمه البلتاجي .. وقلت انها الحرب .. أعلنتها صريحة .. إما الكرسي واما الدم يا شعب مصر .. وكلامك واضح ولا يحتمل التأويل .. دمكوا انتوا يا شعب مصر .. عايزين تموتوا ؟ شيلوني من على الكرسي .. عايزين تعيشوا .. انسوا ان الإخوان يسيبوا الحكم لميت سنة جاية.

خطابك كان فيه كلمة السر .. الشرعية .. كررتها يجي 50 مرة .. وفي المرة ال 49 .. نزلت خرفانك الشارع وخدت في سكتها وهى بتضحك 16 شهيد واكتر من 200 مصاب .. وبكده انت مجرم .. مجرم في حق شعب مصر اللي ضرب نفسه مليون جزمة يوم ما وثق فيك وانتخبك .. بس قلة الأصل متأصلة فيك وفي جماعتك .. جبت أخرك يا مرسي .. معرفتش تبقى رئيس جمهورية ، لأنك أصلا رئيس عصابة .. عصابة من المجرمين اللي الدم عندهم احلي من كوباية لمون بالتلج في يوم شديد الحرارة.

انت مجرم .. واللي يعدّيلك خطاب امبارح ويسكت ، يبقى أكثر منك إجراما .. كان ممكن تخرج من المشهد باحترام .. بس انت مصمم يبقى خروج مُهين ومُذل .. براحتك .. عقلك كان في راسك .. بس معرفتش خلاصك .. وبالمناسبة بقى مادام الشيء بالشيء يذكر .. تصدق ان مبارك - مع كرهي الشديد له لحد دلوقتي - كان أرجل منك .. والله العظيم كان أرجل منك .. مسمعنهاش منه ولو تلميحا : أنا او إسالة الدماء .. لكن الفاجر لما يبقى فاجر يقولها حتى بدون غطا .. ع بلاطة .. وتكون النتيجة في ساعة زمن 16 واحد من ولاد شعب مصر يموتوا شهداء من شوية " عِرر " متقلعهمش من رجلك!

انت اللي اخترت النهاية المُذلة لنفسك .. وانت اللي مصمم ترجع السجن تاني .. بس اللي انت مش عامل حسابه .. البدلة الحمرا في سجن الاستئناف .. اللي بيقتل واحد بيتشنق .. فاللي يقتل شعب وبلد .. نعمل فيه إيه؟!!