13 حاجة تقولها لشريكتك ومتقولهاش لمديرتك

أحيانا يتعامل الرجل بتلقائية وببساطة مع الجميع وهو لا يعلم أن ذلك قد يوقعه في مشاكل عديدة خاصة في العمل، فما يقوله مع شريكته علي سبيل المثال عليه ألا يقوله لمديرته، لأن المديرة المرأة صحيح «ولية» ولكنها تعتبر نفسها ولية نعمته، كما أنها تريده منافقا في العمل أكثر مما تريده متفانيا فيه، وهذه هي قائمة الأشياء التي يمكن أن تقولها لشريكتك بكل صراحة وبقلب جامد ولكن عليك أن تقول أشياء غيرها لمن تعمل تحت رئاستها لكسب رضاها واتقاء شرها إن أمكن.
لشريكتك: بحترم قوي الست إللي مراعية أسرتها وبيتها
لمديرتك: بحترم قوي المرأة العاملة إللي محتفظة بأنوثتها
لشريكتك: أنا تعبان من الشغل
لمديرتك: شكلك تعبانة من الشغل
لشريكتك: ياستي محدش بيغير منك.. ريحي بقي
لمديرتك: علي فكرة كل الناس هنا بتغير منك
لشريكتك: قدري النعمة إللي انتِ فيها
لمديرتك: أنا مقدر النعمة إللي أنا فيها
لشريكتك: أنا مشغول دلوقتي
لمديرتك: شكلك مشغولة النهاردة
لشريكتك: والله تعبان.. الله يكون في عوني اليومين دول
لمديرتك: بصراحة الله يكون في عونك
لشريكتك: أنا شايل الشغل كله علي أكتافي
لمديرتك: حضرتك شايلة الشغل كله علي أكتافك
لشريكتك: حلي عني شوية الله يخليكي
لمديرتك: علي فكرة أنتِ محتاجة تاخدي أجازة
لشريكتك: إيه الكآبة والسواد إللي لابساه ده
لمديرتك: اللون الأسود عليكي هايل وفيه وقار
لشريكتك: أنا بحب نانسي عجرم
لمديرتك: أنا بحب عمرو دياب
لشريكتك: ممكن نخرج بعد الماتش ده لو كسبنا
لمديرتك: بصراحة الكورة دي تفاهة
لشريكتك: أنا بحب الأولاد
لمديرتك: أنا مليش في جو البيت والولاد والصداع ده
لشريكتك: الواحد مش واخد حقه في البلد دي
لمديرتك: كده رضا
حسن الختام:
من هو مقتنع بأن الست ملهاش غير في الطبيخ.. لم يتذوق أكلها بعد