رز بالفراخ وبسكويت الفستق في عزومة 28 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود عصير الأناناس بجوز الهند وسلطة سلطة الجبنة بالخيار وشوربة الذرة ورز بالفراخ وبسكويت الفستق وعلى السحور بنقدّم لك فول إسكندراني..

عصير الأناناس بجوز الهند
عصير الأناناس بجوز الهند
المقادير:
2 كوب قطع أناناس
11⁄2 كوب عصير أناناس
كوب آيس كريم فانيليا
1⁄4 كوب جوز هند
كوب لبن
ثلج
الطريقة:
1- اضربي كل المكونات مع بعضها في الخلاط، وبعد كده صبّيها في الكاسات وقدّميها، وممكن تزيّني الكاسات بشرائح من الأناناس.
***************
سلطة الجبنة بالخيار
سلطة الجبنة بالخيار
المقادير:
4 ثمرة خيار مقطعة مكعبات
1⁄2 ملعقة صغيرة بشر الليمون
ملعقة صغيرة بابريكا (فلفل أحمر مطحون)
2 ملعقة كبيرة جبنة كريمي
2 ملعقة كبيرة زيت زيتون
ملعقة صغيرة توابل
ملح وفلفل أسود
الطريقة:
1- شوّحي مكعبات الخيار في زيت الزيتون، وبعدين ضيفي البابريكا وبَشر الليمون والملح والفلفل الأسود وقلّبيهم مع بعض على النار، وبعدين ارفعي الخليط من على النار وضيفي عليه الجبنة وقلّبيهم مع بعض شوية، وبعد كده رشي التوابل على السلطة، وقدّميها.
***************
شوربة الذرة
شوربة الذرة
المقادير:
علبة ذرة
ملعقة صغيرة دقيق ذرة
2 ملعقة كبيرة ميه
ملح وفلفل أسود
11⁄2 كوب لبن
2 كوب شوربة
الطريقة:
1- دوّبي الدقيق في ملعقتين الميه كويس وسيبيهم على جنب.
2- اغلي الشوربة على النار وضيفي عليها الذرة وسيبيهم شوية على النار لحد ما الذرة تبقى طرية، وبعد كده ارفعي الشوربة من على النار وسيبيها تبرد شوية وبعدين اضربيها في الخلاط لحد ما تحصلي على خليط متجانس.
2- صفّي الخليط من قشور الذرة، وبعدين حطي الخليط على النار مرة تانية وضيفي عليه اللبن وسيبيه يغلي لمدة 4 دقائق، وبعد كده ضيفي عليه خليط الدقيق وقلبيهم مع بعض على النار، وضيفي الملح والفلفل الأسود واستمري بالتقليب لمدة دقيقتين، وبعدين اغرفي الشوربة في الأطباق وقدّميها.
***************
صينية الرز بالفراخ المبهر
صينية الرز بالفراخ المبهر
مقادير الفراخ:
فرخة كيلو مقطعة ل8 قطع
3 ملعقة كبيرة عصير ليمون
ملعقة كبيرة شطة
مقادير الرز:
3 كوب رز بسمتي
3 ملعقة كبيرة زيت ذرة
قرن فلفل أخضر مقطع قطع صغيرة
2 ثمرة طماطم مقطعة قطع صغيرة
ملعقة صغيرة حبهان مطحون
ثمرة بصل مفرومة
ملعقة صغيرة قرفة
2 كوب شوربة
فص ثوم مفروم
ملح
خليط التوابل:
ملعقة كبيرة بهارات
ملعقة صغيرة كركم
ملعقة صغيرة كمون
ملعقة صغيرة كزبرة ناعمة
ملعقة صغيرة بابريكا
ملعقة صغيرة شطة
ملعقة صغيرة قرفة
ملعقة صغيرة زنجبيل
ملعقة صغيرة ملح
1⁄4 ملعقة صغيرة فلفل أسود
الطريقة:
1- اخلطي كل التوابل مع بعضها في طبق وسيبيها على جنب.
2- لتحضير الأرز؛ اغسلي الرز كويس، وانقعيه في الميه لمدة 30 دقيقة، وبعد كده شوّحي البصل في الزيت لغاية ما يدبل، وبعد كده ضيفي عليه الثوم والفلفل الأخضر وقلّبيهم مع بعض على النار لمدة دقيقتين.
3- صفّي الأرز، وضيفيه على خليط البصل والثوم وضيفي معاه نصف كمية البهارات والطماطم والقرفة والحبهان وقلّبيهم مع بعض على النار لحد ما ريحة التوابل تتصاعد، وبعدين ضيفي الشوربة، وسيبيها تغلي مع الأرز على النار.
3- لتحضير خليط الفراخ، اخلطي باقي كمية التوابل مع الشطة وعصير الليمون، وتبّلي الفراخ بالخليط ده، وبعد كده هاتي ورق فويل وغلفي بيه الفراخ وحطّيها على الرز، ودخّلي الصينية الفرن لحد ما الفراخ تستوي مع الرز، وقدّميها.
ملحوظة: ممكن تسوي الرز على النار وبعدين تسوي الفراخ في الفرن لوحدها وفي الأخر تحطيهم على بعض، وتقدّميهم.
***************
بسكويت الفستق
بسكويت الفستق
المقادير:
11⁄2 كوب فستق
ملعقة صغيرة حبهان مطحون
21⁄4 كوب دقيق
كوب زبدة طرية
بياض 2 بيضة
صفار 2 بيضة
كوب سكر
رشّة ملح
فانيليا
الطريقة:
1- اطحني الفستق، وانخلي الدقيق وضيفي عليه الملح والحبهان وربع كوب من الفستق.
2- اخلطي الزبدة والسكر مع بعض في الخلاط، وبعد كده ضيفي عليهم الفانيليا وصفار البيض واستمري في الخفق لغاية ما الخليط يبقى ناعم ومتجانس ولونه فاتح، وبعد كده حطّي الخليط في طبق واعجنيها بإيدك لغاية ما تتكون معاكي عجينة متماسكة.
3- اخفقي بياض البيض في طبق تاني باستخدام المضرب اليدوي لغاية ما يكوّن رغوة، وفي طبق كبير حطّي باقي كمية الفستق.
4- خدي قطعة صغيرة من العجينة، وشكّليها على هيئة كرة صغيرة، وحطّيها في بياض البيض بحيث يغطّيها من كل الجوانب، وبعد كده ارفعيها ودحرجيها في طبق الفستق لغاية ما تتكون عليها طبقة كثيفة من الفستق، كرّري نفس الخطوة مع باقي العجينة لغاية ما تخلص.
5- هاتي الصينية اللي هتعملي فيها وحطّي فيها ورقة زبدة، ورصّي فيها قطع العجين مع الضغط على كل قطعة بإصبعك ضغطة خفيفة.
6- دخّلي الصينية في فرن ساخن وسيبيها لمدة 10 : 12 دقيقة لغاية ما قاع البسكويت يبقى لونه ذهبي فاتح وتلاحظي إن حجم الكرات زاد وبقى فيه فجوة في المنتصف، وبعد كده طلّعي الصينية من الفرن وسيبي البسكويت يبرد، وبعد كده رصّيه في طبق التقديم وممكن تزيّنيه بالشيكولاتة السايحة.
***************
فول إسكندراني
للسحور.. فول إسكندراني
المقادير:
2 كوب فول مدمس
ملعقة كبيرة بقدونس مفروم
2 ثمرة طماطم مقطّعة مكعبات صغيرة
ثمرة بصل مقطّعة مكعبات صغيرة
11⁄2 ملعقة كبيرة طحينة
ملعقة كبيرة زيت زيتون
1⁄2 صغيرة كمون
2 عصير ليمون
الطريقة:
1- سخني الزيت على النار، وبعدين شوّحي البصل فيه، وبعد كده شيلي البصل من على النار وضيفيه للفول وضيفي باقي المكونات السابقة عليه وقلّبيهم مع بعض كويس، وبعدين قدّميه.
وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكره إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلااام،،،