موس الشيكولاتة على "سفرة دايمة"

أعدّها لكم: نيرة أحمد
النهارده هنعمل مع بعض موس الشيكولاتة جربيه معانا وقولي لنا على رأيك، ولو نفسك تعرفي طريقة عمل أي أكلة ابعتي لنا.
موس الشيكولاتة
المقادير:
2 ملعقة كبيرة شيكولاتة خام مقطعة لقطع صغيرة
1⁄2 كوب كريمة خفق ساقع
1/8 ملعقة صغيرة بابريكا
ملعقة كبيرة زبدة
ملعقة كبيرة سكر
2 صفار بيض
1⁄4 كوب ميه
رشة ملح
الطريقة:
1- سيحي الشيكولاتة والزبدة ونصف كمية الميه مع بعض على حمام مائي، وبعد كده امزجي البيض مع السكر وباقي الميه بمضرب اليد كويس، وبعدين ضيفيه على خليط الشيكولاتة وامزجيهم مع بعض.
2- ضيفي عليهم البابريكا والملح واخلطيهم مع بعض، وفي طبق منفصل اضربي الكريمة مع بعضها بمضرب اليد لحد ما تبقى كثيفة وناعمة، وبعدين ضيفي نصف كمية الكريمة على خليط الشيكولاتة وقلبيهم مع بعض بحركات دائرية خفيفة، وبعدين ضيفي عليهم باقي كمية الكريمة وقلبيهم مع بعض بنفس الطريقة.
3- صبي الخليط في القوالب وغلفيهم ودخليهم الثلاجة طول الليل، وبعدين طلعيهم من الثلاجة وممكن تزينيهم بالكريمة وبشر الشيكولاتة الخام، وقدميهم.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،