اعملي شامبو طبيعي لشعرك

أهلا بكل بنات قمر 14، النهارده هنعمل مع بعض شامبو طبيعي بعشبة اللافندر للشعر الدهني بناءً على طلبكم، كمان هنعمل ماسك بالثوم لتغذية الشعر، وكمان هنقول نصايح للعناية بالشعر.
شامبو باللافندر للشعر الدهني
الشامبو ده بيناسب أصحاب الشعر الدهني لتغذية الشعر ومنع تساقطه، لكن اللي شعرهم فيه قشرة يفضّل بلاش يستعملوه.
المقادير:
1⁄2 صابونة زيت زيتون مبشورة
5 ملعقة صغيرة عشبة اللافندر مجففة
ملعقة صغيرة زيت زيتون
11⁄4 كوب ماء
ليمونة خضراء
الطريقة:
1- حطّي الميه على النار وضيفي عليها عشبة اللافندر وسيبيها تغلي.
2- لما الميه تغلي مع اللافندر قطّعي الليمونة شرائح وحطّيها على خليط الميه واللافندر وسيبيهم يغلوا مع بعض لمدة 3 دقائق.

3- بعد كده صفّي الخليط ورجّعي الميه في الحلة تاني وسيبيها على النار وضيفي عليها زيت الزيتون، والصابون المبشور، وسيبيه على النار لحد ما الصابون يذوب
4- ارفعي الخليط من على النار وسيبيه يبرد لمدة ساعتين أو ثلاثة هتلاقيه بقى عامل زي الجيلي، هاتي شوكة أو مضرب سلك خفيف واضربيه، واحفظيه في زجاجة أو برطمان زجاجي، واستخدميه زي الشامبو العادي.
الثوم لتغذية الشعر
المقادير:
رأس ثوم كاملة مفرومة (ثوم مصري)
زجاجة متوسطة زيت خروع
الطريقة:
حطي راس الثوم المفرومة في زجاجة متوسطة، وضيفي عليها زيت الخروع وسيبيه في الزجاجة لمدة شهر، وبعد كده استعمليه على شعرك كحمام زيت
إضغط لمشاهدة الفيديو:
نصائح للتخلّص من قشرة الشعر
علشان تتخلصي من القشرة لازم تبعدي عن الشامبو العادي اللي بتستخدميه، وتستعملي شامبو طبي ضد القشرة ومن أحسن الشامبوهات الطبية هو شامبو "نيزابيكس"، وهو شامبو رائع جدا للتخلّص من قشرة الشعر وآمن جدا وسعره حوالي 17 جنيه، كل اللي عليكي إنك توقفي أي نوع شامبو آخر وتستخدمي شامبو طبي ضد القشرة لمدة شهر، والشهر اللي بعده استخدمي مرة شامبو ضد القشرة والمرة التانية الشامبو العادي اللي إنتي بتستخدميه، وهتلاقي النتيجه هايلة.
الزنك لتغذية البشرة والشعر
التغذية الداخلية والاهتمام بصحتنا هما الأساس لشعر صحي وبشرة نضرة، والطريقة دي بتكون سهلة جدا، إننا ناكل الأطعمة المليانة بالفيتامينات أو نتناول الفيتامينات المفيدة زي فيتامين الزنك، وده بيكون له تأثير هايل على البشرة والشعر والأظافر، وهتلاقيه متوفر في الصيدليات باسم "فيتازنك"، والفيتامينات دي عبارة عن فيتامين الزنك المفيد جدا للشعر والبشرة، ممكن تاخديه 3 مرات في اليوم بعد الوجبات، أو تفطري كويس وتاخدي بعد كده 2 كبسولة.
نصائح لغسيل الشعر
1- اغلي أي نوع من الأعشاب المفيدة للشعر زي المريمية واللافندر والكاموميل، وخدي الميه بتاعتها واغسلي بيها شعرك بعد غسيله بالشامبو.
2- القهوة والمواد اللي فيها كافيين مفيدة جدا لصحة الشعر، علشان كده ممكن نستغل القهوة أو النسكافيه بإنك تاخدي منه ملعقة كبيرة وتدوّبيها في كوب ماء دافي وتشطفي بيها شعرك بعد الشامبو، والطريقة دي بتغذي الشعر وبتقلل من تساقطه، ولو شعرك فيه قشرة ممكن تحطّي عليها نصف ملعقة خل.
استعملي المشط الصح
أغلب البنات بيستخدموا المشط البلاستيك في تسريح الشعر، وده من أكبر العوامل اللي بتسبب مشكلات للشعر، لأن البلاستيك بيعمل شحنات مع الشعر وبيؤدي لتساقطه وهيشانه، ولكن استعملي مشط خشب تكون أسنانه واسعة، وطبعا الخشب أنواع لكن أفضل أنواع الأمشاط هو اللي بيكون مصنوع من شجرة زيت الزيتون.
إضغط لمشاهدة الفيديو:
وبكده تكون خلصت حلقتنا النهارده..
استنونا في الحلقة اللي جاية..
وكل سنة وكل أم طيبة،،،

إضغط لمشاهدة الفيديو: