أنا عندي 23 سنة ومن برج الجوزاء والحمد لله متفوقة دراسيا وتخرجت من كلية التربية وبادرس دراسات عليا وأنا حاليا في تمهيدي ماجستير.. وباشتغل في مدرسة حكومي مدرسة رياضيات، بس عايزة أكون أقوى من كده، أنا عندي طموح عالي جدا، مشكلتي إني خايفة بعد كل اللي نفسي أحققه إني أرتبط بحد مايساعدنيش إني أكون أفضل.. خاصة إني نفسي أكون صاحبة شأن ومكانة في يوم من الأيام، وهذا سبب رفضي لأي فرد يحاول الارتباط بي لدرجة قللت ثقتي بنفسي. ما الحل؟
angeleye
صديقتي العزيزة سعيدة جدا بتفوقك وطموحك اللي بتفتقد له بنات كتير في أيامنا دي، في بنات كتير بيبدأوا يكرهوا الدراسة أو بيهملوها أو حتى بيتعاملوا معاها كمجرد واجب لغاية ما تاخد الشهادة وخلاص، وبعدها بتدور على العريس اللي هييجي وهيشيل مسئوليتها وخلاص على كده، بس ده وضع مش صحيح، لأن البنت إنسان ومن ضمن احتياجاتها الطبيعية إنها تحقق ذاتها ويكون لها وضعها ونجاحها في المجتمع. والغريب برضه إن بنات كتير بتفتكر أن كونك إنسانة ناجحة ومتفوقة وصاحبة شأن ومكانة ده يخليكي غير ناجحة على المستوى الاجتماعي وممكن ما تلاقيش حد يتجوزك وده برضه غير صحيح بالمرة. في الأول تعالى نعترف إن فيه أزمة جواز في مصر، وإن بنات كتير بتوصل لسن متأخرة بدون ما تلاقي العريس المناسب، وفي ده بتتساوى البنت الجاهلة أو اللي حاصلة على دبلوم أو بكالوريوس مع اللي واخدة دكتوراه، من الآخر كلنا في الهوا سوا، بس على الأقل البنت اللي بتحقق نفسها وتنجح في حياتها، بتكون أسعد حالا من البنت اللي قاعدة في البيت ومفيش وراها غير انتظار العدل، ولا إنتي إيه رأيك؟ الحاجة الثانية.. أنا شخصيا قالوا لي أوعي تكوني طموحة مش هتلاقي حد يتجوزك، ومرضيتش اتخلى عن أحلامي، فاكرة كويس وأنا بعمل جواز السفر عشان مسافرة منحة لأمريكا، ظابط عجوز في الجوازات قاللي انتي مسافرة ليه؟ قلت له: أدرس، قاللي: انتي متجوزة، قلت له: لأ، قاللي: طيب لازم تتجوزي قبل ما تسافري عشان لما ترجعي محدش هيرضى يتجوزك! رحت رديت بضحك وقلت له: طب ألاقي عندك عريس. ومشيت، وسافرت ورجعت واتجوزت والحمد لله من إنسان عارف قيمتي وبيحترم وضعي ومكانتي، وكان بيتقدم لي عرسان ساعات، بس الراجل اللي ما يحترمش إنسانيتي ونجاحي، وبيعطلني عشان أكون أقل منه، في الوقت اللي لازم يبذل مجهوده هو عشان يكون إنسان أفضل، ده من الأول كده راجل ما يستاهلش تعيشي معاه، لأنه إنسان فاشل وعدو للنجاح وسلبي. في الوقت نفسه مش لازم البنت تبقى محسسة الرجل اللي بيتقدم لها أن الأولوية عندها لنفسها وأحلامها، لازم تسيبي مساحة في اهتماماتك لرجل وبيت وإنك تبني عيلة وده مش عيب، يعني جايز اللي بيخلي الناس ترفض الارتباط بيكي هو طريقة عرضك لطموحك وأفكارك عن النجاح وتحقيق الذات. لما تكوني في علاقة جديدة ويتقدم لك حد، متكونيش مندفعة في شرح نفسك، وفي تبرير رغبتك في الدراسة والشغل، حاولي تسمعي أكتر ما تتكلمي، وحاولي تظهري الأنثى والأم اللي جواكي أكتر، لأن هو ده الوقت اللي لازم يطغوا فيه على شخصيتك، لكن برضه ماتوافقيش أبدا على رجل يرفض إنك تشتغلي أو تكملي دراستك، أو يحط لنجاحك حدود، لأن نجاحك ده نجاح لعيلتك وفخر حتى لأولادك بعد كده والرجل اللي يرفضه مايستاهلوهوش. عموما أنت لسه صغيرة قوي، والحياة كلها قدامك، اختيار زوج، بالظبط زي ما بتطلعي إبرة من كوم قش، فعلا صعب، فماتستعجليش، وانجحي وانفعي نفسك والناس من حواليكي على قد ما تقدري، وربنا يوفقك.
