حلم 18

الحلم:
أنا حلمت بالرسول. أنا كنت هناك عند ستي ولقيت ناس كتير واقفين عند السور، ودخلت جوه لقيت الرسول؛ فكان الناس بيقولوا لا إله إلا الله، وسمعت إن الرسول عند ستي؛ فبكيت ورحت هناك؛ فلقيت الرسول كان قاعد هو وأختي وبنات خوالي، وأنا قعدت معاهم، وكنت باكلم الرسول؛ فكان مش بيتكلم معايا حلو علشان أنا كنت قاعدة بشعري وأختي كانت لابسة طرحة؛ لكنها لابسة الحجاب فقمت ولبست الطرحة وبقى يكلمني حلو فقلت أنا هاقوم هاعمل الشاي؛ فقال: لا أنا اللي هاقوم أعمل لكم الشاي؛ فأنا قلت يا ريت علشان نشرب من إيدك الشريفة، وشربنا. وبعدين قال أنا هاقوم أروّح؛ فأنا قلت له: ماما نفسها تشوفك؛ فقال الناس دول بينموا كتير، وقام معايا، وماما كانت قاعدة بتخبز، وكانت فيه بنت صغيرة طالعة على الطبلية اللي كان فيها الدقيق، وسلم عليهم ومشي، وبعدين أختي أخدته ومشيت معاه، وأنا قلت لأختي سيبيه وأنا هاوصله؛ فأنا قلت له أنا نفسي أكون معاك في الجنة؛ فقال إن شاء الله هتكوني معايا، ووصلته، والناس اللي كانوا برة مشيوا، ورأه وقعدوا يقولوا لا إله إلا الله سيدنا محمد رسول الله، وكان فيه أطفال لابسين فستان وطرحة بتاعة العروسة، وفيه ناس ماشية وراهم، ويقولوا لا إله إلا الله؛ فأنا قلت: مين دول فقالوا دول الأطفال اللي حافظين القرآن الكريم وروّحت فلاقيت صاحبة أختي؛ فأنا باقول لها أنا شفت الرسول؛ فقالت أنا كمان شفته وصليت، وقرأت 18 جزء فأنا قلت أنا كمان هاروح أقرأ القرآن، وبعدين صحيت.
إني أراها بشرى عظيمة لك ولأسرتك الطيبة التي تحتضنها السماء برعايتها وتوفيقها. وتحمل لك هذه الرؤيا البشرى بحبك للرسول صلى الله عليه وسلم؛ فقط مطلوب منك أن تستري نفسك عن عيون تريد أن تنال من جمالك الذي أوجده الله فيك، واقتربي بالصلاة وكثرة الذكر فهما مفتاح سعادتك في الدنيا والآخرة بإذن الله.. وهنيئاً لك ولأسرتك.