ليه كل ما أعجب بواحد تيجي واحدة تانية تلطشه؟!

إيه رأيكم في موضوع الرسم؟ مش رسم الأشخاص لا الرسم على الأشخاص؟؟ دي موضة.. بقيت البنت ترسم وتكتك وتلف الولد على صباع إيديها الصغير.
هتقولوا لي الولد بيحس وبيرفض البنت دي، بالعكس الولد دلوقتي بيضّحك عليه والبنت الذكية هي اللي بتعمل كده.
مشكلتي إني مش باعرف أعمل كده ومش عايزة أعمل كده؛ لكن ساعات يبقى فيه شاب كويس وتيجي بنت تلفه وتوقعه، والمشكلة إن الشاب ده ممكن أكون معجبة بيه ومستنياه يأخذ خطوات، وفي نفس الوقت باتعامل بلطف وذوق ومش مدلوقة، وتيجي التانية بذكاء تلطشه.
إيه رأيكم وخليكم واقعيين؟

marym


صديقتنا العزيزة.. هابدأ معاكي من الآخر ونحاول نكون واقعيين، وفعلا زي ما إنتي قلتي فيه شباب دلوقتي بيكونوا عارفين كويس أوي إن فيه بنت بترسم عليهم وبدل ما يحاولوا يبعدوا أو على الأقل يعيشوا يومين وبعدها..!! زي ما كان بيحصل زمان؛ على أساس إن البنت اللي زي دي مش ممكن هتكون أم لأولاده، وإنه قبل ما يدور على الحبيبة بيدور على الزوجة الصالحة.
لأ مع الأسف فيه نسبة كبيرة بقت بتدور على البنت اللي تجري وراهم؛ على أساس إنهم مايهينوش كرامتهم مع واحدة، وإزاي يعني أروح لواحدة وترفضني.. وإزاي كرامتي تجيبني إني أجري ورا واحدة لحد لما تحبني؟!
لأ أنا أخد اللي تجري ورايا مش اللي تطلع عيني؛ على أساس إن الأولى هتفضل تحبني على طول لكن التانية هتتنطط عليّ، وده فعلا بيحصل ويتجوزوا.
ولكن بعد -مش هاقول- سنة ولا اتنين لا أقل من كده بكتير أوي، ويمكن قبل ما شهر العسل يخلص؛ تبقى لا هي عايزاه ولا هو طايقها، ويحصل الانفصال اللي كتر أوي دلوقتي؛ لدرجة إن أكتر الإحصائيات تفاؤلا بتقول إنها وصلت ل50% من المتزوجين حديثا؛ يعني أقل من سنة وفي ناس وصلتها ل90%!
ده هو مع الأسف الواقع واللي إنتي الحمد لله رافضاه، ويا ريت تستمري على الرفض ده، وتتمسكي بحقك في إن اللي عايزك يكون قبل ما يكون عايزك حبيبة يكون عايزك زوجة وأم لأولاده.
وكلامي هنا مش معناه رفض الحب أو يكون جواز زي ما يقال "جواز عقل"؛ لأن مافيش جواز ناجح من غير حب؛ لكن مع الحب لازم جدا يكون فيه احترام واحترام متبادل يؤسس لحياة مشتركة يكونوا هما الاتنين فيها محتاجين لبعض فعلا، مش إن أي واحدة ممكن تكون لأي واحد أو إن أي واحد ممكن يتجوز أي واحدة.
فلو الهدف ده قدام الاتنين لا البنت هتجري ورا الولد لمجرد إنه يقال عليها أتجوزت، ومش مهم إيه اللي يحصل بعد كده.
ولا الولد هيقبل بالبنت اللي بتجري وراه، وهيفكر كويس أوي هي بتجري وراه ليه وبتخبي عنه إيه، وبتبيّن ليه إيه، وهل هتكون زوجة صالحة وأم لأولاده ولا إيه؟؟

لو عايز تفضفض لنا دوس هنا