ماسكات بالفاكهة لشعر ناعم وطويل

أعدّه للنشر: رنا حسين ونهاد كمال
أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده حلقتنا هنعمل فيها ماسكات بالفاكهة لعلاج الشعر من مشكلات زي: التقصيف والقشرة والتساقط...
نصايح سريعة لشعر وبشرة أكثر صحة
1- ابعدي عن تناول الأكل المقلي؛ لأن له تأثير سلبي على البشرة.
2- ركّزي على أد ما تقدري على تناول الأكل الصحي؛ وخصوصا الخضراوات والفاكهة الطازة ومنتجات الألبان؛ زي اللبن والزبادي، ويُفضّل طبعا إنك تضيفي عليهم جنين القمح، واللي بيكون له تأثير حلو جدا على البشرة والشعر.
ودلوقتي تعالي نشوف إزاي ممكن نستخدم الخضراوات والفاكهة في ماسكات وكوكتيلات لعلاج مشكلات الشعر...

كوكتيل لإطالة الشعر
المقادير:
* قطعة خميرة بيرة
* كوب عصير أو لبن
* ملعقة كبيرة عسل أبيض
الطريقة:
اخلطي كل المكونات دي مع بعضها، لغاية ما الخميرة تدوب، واشربي الكوكتيل ده كل يوم على معدة فاضية، ومع المواظبة عليه هتحسّي إن شعرك بيطول أسرع، وهتلاقي فرق كبير خلال 6 شهور، وماتنسيش طبعا إن الخميرة كمان مفيدة جدا للبشرة وخصوصا اللي بتظهر عليها الحبوب.

إضغط لمشاهدة الفيديو:
ماسك الموز لشعر ملمسه تحفة
المقادير:
* موز (والكمية بترجع لطول الشعر؛ يعني هنستخدم 3 موزات للشعر الطويل، وموزة واحدة للشعر القصير)
* ملعقة بلسم عادي أو بالأعشاب (من اللي عملناهم الحلقة اللي فاتت)
الطريقة:
اضربي الموز في الخلاط مع شوية ميه صغيرين، واتأكّدي إن الموز تجانس مع الميه وكوّن عصير متماسك من غير أي كتل علشان ما تمسكش في الشعر.
ضيفي عصير الموز مع البلسم، وقلّبيهم مع بعض كويس، وافردي الخليط ده على شعرك باستخدام فرشة الصبغة مع مراعاة توزيعه على الشعر من الجذور وحتى الأطراف، وسيبيه على شعرك لمدة من 45 : 60 دقيقة، وبعد كده اشطفيه بميه عادية.
الماسك ده ممكن تعمليه مرتين في الأسبوع، ومع المواظبة عليه هتحسّي النتيجة بنفسك، وهتلاحظي شعرك بقى ملمسه رائع أد إيه.
وعلى فكرة الماسك ده ممكن تضيفي معاه بيض وزيوت وحاجات تانية كتيرة، وهتحقّق لك نتيجة هايلة في النهاية، لكن ده بيتوقّف طبعا على نوع شعرك.

إضغط لمشاهدة الفيديو:
ماسك التفاح لمعالجة الشعر التالف
المقادير:
* تفاحة
* 3 نقط زيت جوجوبا
الطريقة:
قطّعي التفاح قطع صغيرة من غير ما تقشّريه، واسلقيه في نصف كوب ميه على نار هادية، وبعد كده اضربي قطع التفاح دي في الخلاط كويس من غير ما تضيفي عليه ميه، وبعد كده ضيفي عليه زيت الجوجوبا، والزيت ده على فكرة مفيد جدا لتطويل الشعر.
وزّعي الماسك ده على شعرك من الجذور وحتى الأطراف، وسيبيه على شعرك من 45 : 60 دقيقة، وبعد كده اشطفي شعرك بالميه العادية.

إضغط لمشاهدة الفيديو:
وبكده تكون خلصت حلقتنا النهارده..
نتمنّى إنكم تجرّبوا الماسكات اللي عملناها..
وتبعتوا تقولوا لنا على النتيجة..
سلااااااااااااام،،،