أصابع البطاطس المشوية

النهارده على "سفرة دايمة" هنقدّم لكم طريقة جديدة لتقديم البطاطس هتعجب كل أطفالنا؛ وهي عبارة عن أصابع البطاطس المشوية، جرّبوها وقولوا لنا رأيكم فيها...

أصابع البطاطس المشوية
المقادير:
3 حبة بطاطس كبيرة
ملعقة صغيرة باربكيا
ملعقة صغيرة كزبرة
ملعقة صغيرة ثوم مفروم
ملعقة صغيرة بشر ليمون
1⁄4 ملعقة صغيرة فلفل أسود
ملعقة صغيرة بهارات الكاري
1⁄4 ملعقة صغيرة شطة
1⁄4 كوب زيت زيتون
ملعقة صغيرة ملح

الطريقة:
1- اغسلي البطاطس كويس جدا، وبعد كده قطّعي البطاطس نصفين، وقطّعي كل نصف أربعة أصابع.

2- حطي البطاطس في صينية بحيث تكون القشرة لأسفل.

3- هاتي طبق غويط وحطّي فيه البهارات والكزبرة والباربكيا والشطة والفلفل والملح والثوم وبشر الليمون وزيت الزيتون، وقلّبي كل المكونات دي مع بعض كويس أوي.

4- حطّي الخليط اللي عملتيه على أصابع البطاطس، ودخّلي الصينية الفرن من 25 : 30 دقيقة لحد ما البطاطس لونها يبقى دهبي، وبعد كده حطّيها في طبق التقديم.. وبالهنا والشفا.

خلصت وصفتنا النهارده..
استنونا مع وصفة جديدة..
وابعتوا لنا كل طلباتكم على "سفرة دايمة"..
سلام،،،