قصة حبي بدأت وانتهت في أقل من شهر

السلام عليكم.. أرجوكم أنا أعاني معاناة نفسية سيئة جدا؛ لأني ارتبطت عاطفيا بشخص محترم جدا، وأهلي كانوا عارفين؛ بس أنا ماخليتهاش ارتباط رسمي مراعاة لظروفه؛ لأنه ما زال طالب وينتظر التخرج أولا، وأنا بصراحة أول مرة أدخل راجل في حياتي؛ فاتعلقت بيه جدا، وكنت عايزة أطمن عليه دايما، وده كان بيخليه يزعل إني باحسسه إن غيابه عني عدم ثقة فيه، وإن فيه شيء مغيره عليّ.
بس أنا فعلا لاحظت كده؛ لإنه في البداية كان بيهتم بي جدا، ودايما يتطمن عليّ، ويحب يتكلم معايا على طول في الفترة الأخيرة، بقيت مش بلاقيه ولا هو بقى بيسأل عني؛ فحصل خلاف بينا، وبعد كده ودون أي مقدمات مش لاقيته في حياتي، وأنا مش عارفة بصراحة أعمل إيه؛ لأن الإنسان ده أنا عشقته جدا، وهو دايما بيدخل على "بص وطل"، إحنا أتعرفنا والموضوع ده كله حصل في شهر.
أعمل إيه؟؟ أسيبه وهو هيرجع؟ ولا أعمل إيه؟؟ وأنا كبريائي لا تسمح إني أروح أو أتصل بيه وأكلمه؛ لأنه كان بيحب بنت قبلي جدا وهي جرحته، وأنا حاسة إنهم رجعوا لبعض تاني؛ علشان كده سابني.. أرجوكم أنا عايزة رد.
samso maayed

لو عايز تفضفض لنا دوس هنا