مافن بصوص النسكافيه

أعدّها لكم: سارة الإبياري
بناء على طلبكم النهارده هنعرف مع بعض طريقة تحضير مافن النسكافيه.. جرّبيه وابعتي لنا رأيك فيه.
مافن النسكافيه
المقادير:
* كوب دقيق
* 2 باكت نسكافيه
* 1/ 2 كوب لبن دافئ
* كوب شيكولاتة مبشورة
* 1/ 4 كوب زبدة سايحة
* 1 1/ 2 ملعقة بيكنج بودر
* 1/ 2 ملعقة صغيرة ملح
* ملعقة فانيليا صغيرة
* ملعقة صغيرة قرفة
* 3/ 4 كوب سكر
* بيضة
مقادير صوص النسكافيه:
* 2 باكت نسكافيه
* 1/ 2 كوب زبدة
* 2 كوب سكر بودرة
* 1/ 2 ملعقة فانيليا
* ملعقة كبيرة ماء دافئ
الطريقة:
1- لتحضير المافن، دوّبي النسكافيه مع اللبن الدافئ، وقلّبيهم كويس، وبعدين ضيفي عليهم الزبدة السايحة والبيض والفانيليا، واخلطيهم كويس لحد ما يتجانسوا.
2- هاتي وعاء تاني، واخلطي فيه الدقيق والسكر والبيكينج بودر والقرفة والملح.
3- صبّي خليط الزبدة والبيض على الدقيق، وقلّبيهم كويس مع بعض، وبعد كده ضيفي عليهم الشيكولاتة المبشورة.
4- هاتي قوالب الكيك وافردي فيها ورق الزبدة، وصبّي فيها الخليط، ودخّليها فرن ساخن وسيبيها لمدة لمدة 20 دقيقة.
5- لتحضير صوص النسكافيه، اضربي السكر مع الزبدة والفانيليا بالمضرب الكهربي، ودوّبي القهوة مع الماء الدافئ، وضيفيه على خليط السكر والزبدة والفانيليا، وبعد ما يبرد المافن زيّنيه بالصوص ده، وقدّميه.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،