حبيبتي متربية زيادة ومش عارف أوصل لها

موقعي الحبيب وصفحتي العزيزة "فضفض لنا".
السلام عليكم ورحمة الله وبركاته..
أولا أحب أشكركم على مساعدتكم لي في بعض المشكلات اللي أنا طرحتها عليكم، وبجد أفدتوني كتييير..
ثانيا بقى أنا عندي مشكلة جديدة ويا ريت ماكانش زهقتكم مني.. أنا اتعرفت على بنت أصغر مني بسنة وهي في آخر سنة جامعة, المهم البنت دي والدها (الله يرحمه) كان ضابط في الجيش فتربيتها هي واخوتها زي ما بيقولوا تربية عسكرية.. يعني دخول البيت بمواعيد, مافيش بنت تخرج بعد الساعة 7 لوحدها ومافيش بنت ترجع البيت بعد الساعة 8 وحاجات كده يعني.
المهم البنت دي عجبتني أوي تربيتها وطريقتها في التفكير وإنها مش تافهة زي معظم البنات اللي عرفتهم، وعقليتها شرقية أوي وده برضه من الحاجات اللي عجبتني فيها جدا..
دلوقتي البنت دي عاجباني بس أنا مش هاقدر أفاتحها في موضوع خطوبة إلا لما أعرفها.. علشان أنا بجد تعبت كتير من اختياراتي الخطأ وعايز أرتبط بجد.. مش عايز أجرّب!! أنا بجد نفسي تطلع زي ما أنا متخيل بس أنا مش هاقدر أعرفها أكتر دلوقتي؛ بسبب إن الامتحانات والمذاكرة وكده يعني.. وأنا أصلا ماكنتش باشوفها غير يوم واحد في الأسبوع؛ علشان ظروف شغلي فكده ماعرفتش آخد حكمي النهائي فيها، وإني أتقدم لها ولا لأ، أو حتى أقول لها علشان أعرف رأيها إيه!
حاسس إن الموضوع معقّد.. ومش عايز أجرّب تاني في الآخر تطلع مش زي ما أنا متخيلها.
فلو سمحتم قولوا لي رأيكم...
timor
لو عايز تفضفض لنا دوس هنا