عايزاه يتغيّر فبينتقد شكلي

السلام عليكم ورحمة الله.. أنا بحب جدا موقع "بص وطل" والقائمين عليه، ودايما أنا وأصحابي بنرجع لكم ونستشيركم في جميع أمور الحياة، أنا دلوقتي عندي مشكلة؛ أنا مخطوبة لابن عمي من أسبوعين، بس أنا مش كنت أعرف عنه إلا حاجات بسيطة.
بعد الخطوبة هو ابتدى يقرب مني، وعرفت إنه ابتدى يصلي لأنه مش كان بيصلي، وإني أنا المطلوب مني إني أخليه يصلي بأي طريقة، وكمان الصيام؛ لأنه برضه مش بيصوم إلا أيام محددة بسبب إنه كان بعيد عن أسرته فترة طويلة، المهم هو لما جه واتقدم قال لوالدي إنه هيتغير بجد، وإنه هيلاقي إنسان تاني خالص، وبعدين فيه مشكلة هو قال لي عليها؛ إنه تعاطى مخدرات؛ بس كان من فترة طويلة بس هو بعد عنها.
هو بيقول لي الكلام ده لأنه وعدني إنه هيكون صريح جدا معايا ويقول لي على كل حاجة في حياته، أنا زعلت أوي لما هو قال لي على الحاجات دي، بس ماحاولتش أبين ليه إني زعلانة؛ علشان لو حس إني زعلانة ممكن مايقوليش على أي حاجة تاني.

أعمل إيه في اللي أنا فيه دلوقتي؟ أو أتعامل معاه إزاي؟ أنا بحبه وهو كمان، بس أنا عايزة أقربه مني، وإنه يبقى فعلا حد جديد، بس مش عارفة أتعامل معاه إزاي؟ وبعدين هو كمان بيقول لي إنه عايز يغير فيّ أنا كمان؛ زي إني مثلا مليانة شوية، فبيقول لي حاولي تخسي، بس أنا مش شايفة دي حاجة جنب الحاجات اللي هو قالها لي عن نفسه.. أعمل إيه مع شخصية زي دي؟
meromero
لو عايز تفضفض لنا دوس هنا