ابدأ مشاعرك بالتدريج.. والحب مش بس كلام ورومانسية

السلام عليكم.. أولًا بجد باشكركم على موقع "بص وطل" الرائع، والإجابات اللي دائمًا باستفيد منها، وجزاكم الله كل خير.
أنا كنت خاطب من فترة، وتمّ فسخ الخطوبة بسببها هي؛ لأنها ماكانتش حاسة بأي حاجة ناحيتي، وانتهى الموضوع بحلوه ومره، ودلوقتي أنا على وشك الارتباط -إن شاء الله- ببنت شفتها واستريحت ليها، ومستني الردّ لأني لسه شايفها قريب..
والصراحة اتكلمنا كتير، وحاسس إنها أفضل من الإنسانة اللي كنت مرتبط بيها؛ بس لسه أطياف الماضي بتيجي في بالي، ومواقف معينة بتجول في خاطري.. أعمل إيه؟
أنا لسه في بداية الارتباط بيها، وخايف ماحبهاش وأظلمها معايا، هي إنسانة طيبة أوي، ومش عايز أسقيها من نفس الكاس اللي شربت منه، أنا حاسس إنه إن شاء الله هيكون فيه خير، ويا ترى لو حسيت بحبها أصارحها على طول؟ ولا أتأكد الأول من مشاعرها؟ لأن سبب المشكلة الأولى إني كنت باضغط عليها باستمرار بكلام الحب والرومانسية، وأطالبها إنها تقول لي الكلام ده.
أنا بجد محتاج تساعدوني في الطُرق الصحيحة لمعاملتها، وإزاي أكتشف شخصيتها؟ أنا مرعوب جدًّا من الفشل تاني، ونفسي ربنا يكرمني والموضوع يكمل على خير.

أحمد


لو عايز تفضفض لنا دوس هنا