إنت تُبت واللي كان بينكم تمّ بمزاجها.. يبقى مافيش داعي لإحساسك بالذنب

السلام عليكم.. أنا عاجبني جداً الموقع بتاعكم، ودايماً لازم أتصفّحه كله، ومن زمان عايز أكتب لكم مشكلتي؛ بس كنت متردد.
أنا شاب عادي من أسرة متديّنة؛ بس للأسف فتحت مشروع خاص بي في شرم الشيخ، وطبعاً النظام هناك غير أي مكان تاني في مصر، كانت علاقاتي بالبنات كلها صداقات وبس؛ لغاية لما اتعرّفت على واحدة وقالت لي إنها بتحبني؛ بس أنا قلت لها إنها بالنسبة لي صديقة وبس.
وبعديها سافرت ورجعت تاني شرم، لقيتها جات لي المشروع، وقالت لي أنا عايزة أتكلم معاك وأخدت رقم تليفوني لأني كنت غيّرته، وبعديها اتصلت بيّ وقالت لي إنها اتجوزت بس مش قادرة تعيش مع جوزها لأنها بتفكر فيّ.. وبعديها اتطلقت.
بدأنا نتكلم كتير ونخرج مع بعض، والعلاقة اتطورت، وهي دايماً كان أهلها بيسافروا، وكانت بتيجي تقيم معايا في شقتي، وكنت ناوي أتجوزها؛ بس المشكلة إنها كانت بتكذب عليّ في حاجات كتير، كلها كانت صغيرة؛ بس المبدأ نفسه إنها مفروض ماتكذبش.. وفي الآخر انفصلنا، وسافرت بره مصر.
تقريباً بقالي أربع سنين، والمشكلة إنها لسه ماتجوزتش، وكذا مرة تكلّمني وتقول لي أنا مش هاقدر أتخيّل إني مع حد تاني غيرك.. أنا الحمد لله عملت عُمرة، وهي كمان.
دلوقتي حاسس بالذنب إني دمّرت حياتها، وفي نفس الوقت باحب بنت تانية، وعايز أتجوزها؛ بس حاسس إني غلطت وإني لازم أتجوّز الأولى علشان أصلّح اللي عملته.. يا ريت تفيدوني.
magicsoft

لو عايز تفضفض لنا دوس هنا