آلام المفاصل وضيق التنفس.. أعراض مرَضية للسمنة

النهارده كلامنا هيكون عن الأعراض المرَضية اللي بتسببها السمنة، وإزاي ممكن تتسبب لنا في مشاكل أكتر لو أهملنا علاجها، واتعاملنا معاها على إنها مجرد حاجة شكلية..
وهيكون معانا ضيفنا د. عماد طه، مدرس مساعد العلاج الطبيعي بكلية العلاج الطبيعي جامعة القاهرة.
* إيه الأسباب اللي بتخلّي مريض السمنة يشعر بصعوبة في الحركة؟
السمنة مع الوقت بتخلّي المريض غير قادر على بذل أي مجهود؛ لأن العضلة الرباعية الموجودة أعلى الركبة بتضعف بسبب الوزن الزائد، والحالة دي بنلاحظها لو واحد بيعاني من السمنة، واتحرك لمسافة طويلة، هيكون محتاج يقف كل شوية علشان يرتاح بسبب إحساسه بشدة ألم مفصل ركبته.

* لأي مدى ممكن تؤثّر السمنة على مفاصل الجسم؟
المفاصل من أول الحاجات اللي بتتأثر بالوزن الزائد؛ وخاصة مفصل الركبتين؛ لأن الكيلو جرام الزائد في الجسم يساوي فعلياً 4 كيلو أثناء الحركة، ومع الوقت والتحميل العالي على مفصل الركبة، بيحصل تآكل والتهاب للمفاصل.
وممكن المريض يروح لدكتور ويعالج ألم المفاصل؛ ولكن بعد كده بترجع المشكلة بآلام أكتر من الأول؛ لأنه لم يعالج السبب الأساسي للمشكلة؛ وهو السمنة، وبالتالي كل ما الوزن بيزيد، بيحمّل على مفاصله أكتر، وبيكون الحل المتاح له هو المسكنات.
* وهل ممكن تؤثر السمنة على العمود الفقري؟
ربنا سبحانه وتعالى خلق العمود الفقري بانحناء مُعيّن يناسب شكل الجسم ويساعده على الحركة؛ لكن مع زيادة الوزن بيحصل له انحناء وتقوّس أكبر؛ وخاصة لما تكون السمنة متركزة في منطقة البطن والظهر.
والتقوّس ده بيضغط على الفقرات بشكل غير طبيعي، وبيضغط كمان على مخارج الأعصاب، ويبدأ المريض يشتكي من ألم في الرِّجْل وأسفل الظهر بسبب السمنة، وبيكون الحل في الحالة دي هو إنقاص الوزن، وبعد كده مرحلة ممارسة تمرينات لتقوية عضلات الظهر والبطن.
* هل ممكن السمنة تؤثر على التنفس؟
بالطبع السمنة بتؤثر على الجهاز التنفسي؛ لأن العضلة الرئيسية في التنفس هي عضلة الحجاب الحاجز، وهو مسئول عن 80% من عملية التنفس، وهو موجود أسفل الضلوع وبيتحرك في تجويف البطن، وطبعاً المدى الحركي له بيؤثر بالسمنة.
يعني لو فيه شحوم ودهون كتير في منطقة البطن، هتحدد وتعيق حركة الحجاب الحاجز، وبالتالي بتقلل المساحة اللي بتتحرك فيها عضلة الحجاب الحاجز؛ مما يؤثر على نسبة الأكسجين الداخلة للرئة، بالإضافة إلى إن السمنة بتؤثر على حركة القفص الصدري.
علشان كده بننصح إن مريض السمنة لازم يحاول يقلل من وزنه؛ لأنه كلما ترك نفسه دون علاج، هيبدأ تلقائياً في الهروب من بذل أي مجهود لأنه بيرهقه جداً وبيضغط عليه وبيخليه مش قادر يتنفس، ومع الوقت وقلة الحركة هيزيد أكتر وأكتر، وببساطة هندخل في دائرة مفرغة من المشاكل.