حسين الحانوتى يكتب :8 ساعات في اليابان

ايام كتير الواحد بيفكر تفكير غير منطقى وممكن بعيد عن واقع التحقيق انما اللي حصل والغريب انك تفكر وتلاقي اللى فكرت فيه حصل..يعنى ممكن تفكر انك طالع السما وانت ماسك بالونه يعنى نفيخه بلغة الاطفال تنفخها اوى اوى ويكون حجمها كبير وتمسك فيها بايدك تقوم تشيلك وتطلع لفوق زى البراشوت او تفكر انك تطلع فوق اعلى عماره وتنزل من فوقها طاير للارض من غير ما يحصلك مكروه..كل دا تفكير من واقع احلام عقلك الباطن واللي مش ممكن تحصل من غير مصيبه طبعا وما اكثر مصائب التفكير الغير واقعي
انما لما تفكر انك فجاه وبدون مناسبه جالك زياره لليابان طبعا لو ربنا كرمك ورحت الزياره قبل ما يجيبلك سكته قلبيه من الفرحه هيبقى انتصار كبير للافكار الشاذه وان الافكار الغريبه غير مستبعدة الحدوث ودا طبعا قدر ربنا ولا شئ بعيد عن قدرته (ونعم بالله)
الحمد لله فلبى اتحمل المفاجاه وفضل يرفرف ..يرفرف وهيطير من الخضه والفرحه فى نفس الوقت..والتفكير اشتغل ..ازاى هسافر اليابان وازاى هسيب مشاغلي ومصالحى وولادى وبيتى ومراتى واصدقائى والناس تيجى تسلم علي وكانى رايح الحج….يلا اهو 8 ساعات مش كتير ..يادوب مسافة السكه في مصر ..اوصل المطار وطبعا فاكر ان كل الناس بتبصلي وفاكرانى نجم ومشهور..واركب الطياره واعرف الناس بتركبها ازاى وفيها ايه زياده عن العربيه وبتمشى وتطير ازاى..ومجرد الوقت بتاع الطياره مع استراحه في السكه على اى جنب كده عشان المشوار طويل والسواق يستريح ونشرب قهوه او شاى مع سيجاره واللي بيشرب شيشه طبعا محدش هيمنعه .وطبعا طول الطريق هفكر هو ايه الفرق بينا وبين اليابان دول معندهمشى اهرامات ولا ابو الهول. ولا قطر بيولع وعربيه تقع فى الترعه ..دول معندهمشى ترع..يلا.هو انا يعنى رحت الاهرمات ولا شفت ابو الهول والا امه عندنا في مصر..بس يلا اهى جت من عند ربنا ببركة دعا الوالدين وهروح اشوف اهرامات اليابان وطبعا بعد كده ممكن اروح اشوف اهرامنا وبالمره اخد العيال وامهم وافسحهم فسحة عمرهم بس انتهى من فرصة الزياره دى…دى مش بتيجى الا للمحظوظين بس والحمد لله بقيت واحد منهم هروح وانزل اعيش وسطهم واتكلم يابانى ولما ارجع يفضل لسانى معوج شويه لما اتعود على المصرى تانى
ياااااااااااااااااه …ياه الناس هتفضل فاكره طول العمر انى روحت اليابان مع انها بتنسي اللى بيحج وتفضل تقوله يا حج ..بس دى اليابان ..قارة اليابان ياعالم ياهووووه بعلمها واقتصادها وتعليمها وناسها المرتبين اللى كل شئ عندهم بحساب هتعلم منهم واجى اعمل هنا زيهم ..ازاى هقوم من نومى بدرى وازاى هاكل افطر طعميه يابانى وفول يابانى واكسر البصله ازاى مش زى عندنا على الارض واخبطها واكلها .. وازاى اروح شغلي وازاى اركب مواصلات واتعلم منهم احافظ على المال العام والخاص ازاى وازاى وازاااى
استغل وقت فراغي في شغل يفيدنى ويفيد بلدى وهشوف الانسان الالى واسلم عليه واكلمه ..معقوله انا مش مصدق نفسى ياعالم…يالهوى ى ى ى ياهووووووه
همشى في الشارع الاقى الناس لابسه نضيف وماشيه بنظام و كل حاجه بتكلمنى يابانى كل حاجه عاوزها الاقيها ليه هو انا فى الجنه معقوله…ازاى معقوله ايه اللخبطه دى..اهو هنروح ونشوف مجرد وقت الطياره بس
هسيب البلد وهنسى العمده والغفر وعم عيد العربجى واروح اصاحب عمده وغفير في اليابان وكل شويه ابعتلهم ويبعتولى واطمن عليهم ياخرابى ياعالم معقوله ممكن
..كل ده فكرت فيه وانا في الطياره فوق السحاب وشايف الارض صغيره جدا ومش مصدق انها دى الارض ماهو اول مره اركب طياره انا مركبتش غير القطر وركبته شعلقه والجرار والعربيه الكارو ام حمار او حصان واخيرا عربيتى
الحمد لله الطياره وصلت وشيلت شنطتى وهنزل ارض المطار يااااااااه اليابان ..قارة اليابان اهل اليابان دى بعد قنبلتين اترموا عليهم والناس دى نبت شيطانى
ماهم القنبلتين بتوع امريكا موتوا ناسها ودول بذره شيطانى طلعت غيرت البلد وطورتها
يلا الحمد لله وصلت ولسه هنزل لارض اليابان ورجلى اليمين هتخرج من باب الطياره سمعت صوت عالى عالى قوى اتخضيت خضه كنت هموت منها مع انى ممتش من خبر زيارة اليابان
قوم صلي وهات عيش وفول وطعميه عشان العيال تفطرونروح شغلنا
اتاريها ام احمد وانا كنت نااااااااااااااااااااااايم بحلم
الحمد لله روحت لغاية مطار طوكيو وام احمد رجعتنى