لحظه هدوء

بقلم : ايمان لطفي
ليه اتجاهتنا بقت حادة جدا ...
احتمال دا يكون طبيعي في الوقت دا مع احتقان المشاعر والمارد المكبوت اللي انطلق بعد 30 سنة حبس ....
لكن بمراجعه كل الجدل في اي موضوع ..
هتلاقي اللي مع _ مع لدرجه التعصب - واللي ضد - ضد لدرجة الجنون - وفي الحالتين تعصب او جنون .. فانها مشاعر تمنعننا من وضع الامور في نصابها الحقيقي ...
الابيض الصريح والاسود الحالك .. مش دي الالوان المتادولة في الحياه الا في المدينة الفاضلة ...
انا كبشر .. نفس واحدة تحمل الخير والشر وتشكلها المناخ العام لاتجاه ما ...
نفس واحدة تحمل كل التناقضات ومستنية زرار يوجهها ....
التعميم الاعمى مرفوض ...
الفتنة الطائفية ...خلاص دلوقت عشره سنين بين كل مسلم ومسيحي فوق تراب البلد ممكن تنتهي ؟؟
عشان شوية اشاعات .. وشوية الاعيب ومهاترات معروفة المصدر وحفوظه الاسلوب ؟؟؟!!!
دا احنا مع بعض في كل مكان... جيران واصحاب ..... زملا في الشغل
....كل حدث ياخد حجمه بالظبط ... يتحقق فيه والغلطان يتعاقب لانه مصري يحترام للقانون المصري
مش يطبخ لحساب فرد و خوفا من انه يثير حساسية مجموعة ....
لو كلنا تحت مظلة القانون سواء ... هتنتهي لعبة الفتنة السخيفة اللي بيضربونا بيها كل ما الدنيا تهدى ....
وقبل دا كنا ايد واحدة و مصريين ...
ويعد دا كله اتجمعنا على علم مصر في الميدان ..
يبقى ليييييييييه الموضوع ياخد كل الحجم دا ؟؟؟؟
اللي خرجوا في مسيرة رد الجميل لمبارك او اللي كانوا بيدافعوا عن احمد شفيق ..
خونة .. عملاء .. اعضاء الحزب الوطني المغضوب عليه ...كلهم كلهم؟
ليه يا جماعه ..؟؟ ولو اعتراضنا وما اتفاقناش حتى معاهم...
لكن في منهم شايف وجهه نظر ما رغم انه من اللي نزلوا التحرير وعايزيين تغييير وثورة شامله ...
مش معنى اختلافه في نقطه انه مش متفق في الجوهر ..
وفيهم اللي مش فاهم... وفيهم العاطفي.. وفيهم اللي شايف دا خوف على البلد...
ومش الكل كدا
ومش تعميم برضه ...
وعلشان نكون امناء مع نفسنا وصرحاء بالقدر الكافي ....
احنا مش هنمحي مبارك ...
هيقول : فترة حكم مبارك من كذا لكذا ...
وكانت معالمها كذا وكذا ..
وانجازاته في الفترة دي كذا وكذا ...
ولو مالوش حتى اي انجازات هيبقى زي الف فترة حكم فاشل عدت على مصر وكتبها التاريخ وذاكرناها وحفظناها وامتحنا فيها ...
الحكم الاموي احسن حكامه مش عارفه مين وأسوأهم مين ..
والفاطميين .. والمماليك .. والفراعنه.. ييييييييييييييه دا احنا يا ما عدا علينا....
اسباب نجاح الحكم دا ... ومساوئ العصر دا ...
... وذاكروووووووووووووا بقى
وعلل لما يأتي .. لم انهار حكم الرئيس مبارك بعد 30 سنة ظلم واستبداد ؟؟؟
الخلاصة ... انه مش هيتمحي ...حتى لو شيلنا اسمه من على محطه المترو ..
وحرقنا بمنتهى التفاهه مكتبات سوزان مبارك للقراءة للجميع ...
المشروع اللي طلع عينينا 20 سنة وخد وقت وجهود وشباب مصريين ..وفلوس من جيوبنا ياحلويين ...
حتى في الثقافه خلطنا الامور وعممناها ....
والمكتبات والحيطان والرفوف حرقناها لييييييييييه ؟؟؟
عشان اسم سوزان مبارك؟؟
طب ماتشيلوا اليفط ؟؟!!!!!!!!!!!!!!!!!!!!!!!
مبارك اتنحى او اتخلى او ايا ما كان اللفظ السياسي الصحيح ...
ليه جرينا ورا الاشاعات والغمزات بمنتهى الحدة برضه ....
بؤرة شرم الشيخ ...
حدوته التنحي الخداعيه ...
الثورة المضادة...
عارفين ..
حتى لو كان دا كله حقيقي ...
فاحنا بالحدة في التعامل وعدم الوعي بنساهم في نجاحها بالفعل ...
لحظه هدووووء من فضلكم ...
لو القرار اصبح بايدينا ونابع من الميدان ..
ليه الفزع ؟؟
ما نعمل كل حاجة بهدوء ...
ليه الحوارات الفاشله ع الفيس وفي الجروبز المتعارضه بابشع الاساليب وابذئ الالفاظ ؟؟
الصوت العالي دليل ضعف الحجة ...
جهاز الشرطه كله كله سئ ... ؟؟؟!!!
طيب امن الدولة فيه وفيه .... والمطافي ؟؟
شرطه المرورو ... فيه وفيه ... والنيابات ؟
حرس الجامعه فيه وفيه ....
حترجع تقولي لا بس اخويا شكل تاني .. وابن عمي مش زيهم .... وصاحبي دا انتيمي من زمان ...
كويس ... يعني فيه وفيه .....
طيب احنا اساسا عارفين تحديدا ادارات الشرطه في مصر وانواعها ولا حتى وظيفه كل منها .. عشان نحكم يبقى لازم نفهم .. وعشان نعمم يبقة نمسك كل الافراد ونبتدي نعمل دراسه احصائية عادلة ...
كام % مستبد ... ويتعاقب ..
وكام % عبد المأمور ... ويتقوم ..
وكام % سادي النزعه .. ويتعالج قبل ما يخرج يطيح في المجتمع ...
وكام %شريف ويستاهل نضرب له تعظيم سلام لانه مقهور اكتر مني ومنك جوا جهاز سمعته سابقاه !!!!!!
قطاع محتاج اعادة ترميم وتأهيل .. زيه زي كل قطاعات العمل في مصر للأسف ...
لان اساس التوظيف نفسه غلط ... لافيه معايير سلوكيه ولا نفسيه ولا اجتماعيه ...
دي كلها كورسات ومناهج لازم تختلف من قطاع للتاني ...
اسلوبنا التعليمي والتربوي اساسه غلط ...
ودي بذره سنين
ومحتاجه سنين وسنين علشان تتصلح ..
مش بس في الشرطه ..
امسك قطاع المدرسين .. الصيادله .. الاطباء .. الحرفيين ...
كله بيتعلم بنفس الاسلوب ...
رغم ان لكل منهم - المفترض - اسلوب منهجي مختلف تماما لتهيئته للوظائف دي ...
بس دا مش مفهوم ولا متوافر حاليا ....
والدليل.. ان كل قطاعات مصر بلا استثناء دلوقت عامله اعتصامات ومظاهرات ..
خلصنا من المطالب المادية ...
دخلنا في الاصعب .. طلب تغيير القيادات والادارات لان طبعا كلها فاسده .. وتابعه للنظام السابق ....
عمداء الكليات .. رؤساء الجامعات .. رؤساء الشركات في القطاع العام والاستثماري ....
مديرين الادارات والمستشفيات .. ويمكن كمان اصحاب المشاريع الخاصة والصيدليات بالمرة ...
ماكل واحد شايف مديره او اللي فوقه غلط ...وفعلا دا ممكن يكون حقيقي جدا ...
بس الوقت ؟ والمجال ؟ والطريقة ؟ والاسلوب ؟ والغايات ؟؟؟؟؟؟!!!
ولو هنغير كل قيادة في المجتمع .. فانا رأيي نغير الشعب كله .. لان كلنا كنا موظفين في النظام السابق ...
ولأن كلنا راع .. وكلنا مسؤول عن رعيته ...
وكل واحد فينا أكيد ماعرفش يحكم اللي تحته صح ....
- رفضنا للقيادات .. وقبلها احساسنا بالظلم وسبب معظم الاعتصامات _في رأيي- يرجع تاني لعدم تساوينا بمظله قانون واحد ....
معايير التوظيف والمرتبات مش واضحه .. فنلاقي انسان غلط في مكان غلط وبياخد مرتب غلط ...
لا لشئ الا لانه- باللي سانده- خد مكان واحد تاني .. اوتعدى على القانون الرسمي .....
محتاجيين قوانين رادعه وحاسمه وملزمه للكل الكبير قبل الصغير ...
واحترامنا ليها فيما بعد هيكون اول خطوة في انتهاء كل تلك المهاترات الفئوية ....
ظابط المرور يعمل نفس مخالفة لموكب الوزير... ولظابط زميلة كمان قبل سواق الميكروباص ....
ومانشوفش دكتور اسنان -مع احترامي- ماسك وزارة التربية والتعليم !!!!
لان دا معناه اني لامانع الاقي وزير الصحة اساسا مهندس بترول !!!!
وانزل بقى وقيس عليه كل درجه تحت منه لحد ما نوصل لاصغر موظف ...
.. الثورة السياسية لما تعدي على خير - ان شاء الله - لازم تتبعها ثورة اجتماعيه تشمل كل فرد فينا
وكل مافينا عشان نقدر نقول ان احنا عملنا حاجة صح بجد ...
حاجات كتيييييييير واشاعات اكتر ...
..ولازم نفكر قبل كل حاجة ولو مش فاهمين ندور ونفهم قبل ما نكرر اي كلام من صفحة هنا ولا جروب هناك ....
لحظة هدوووء من فضلكم ...
للعلم ..
إدارات الشرطة المصرية1
■الإداره العامة لأندية وفنادق الشرطة
■الإدارة العامة لإمداد الشرطة
الإدارة العامة لشرطة السياحة والآثار
الإدارة العامة لرعاية الأحداث
قطاع مصلحة السجون
الإدارة العامة لمباحث تنفيذ الأحكام
الإدارة العامة لشئون الأفراد
الإدارة العامة للتأمين والمعاشات
مصلحة أمن الموانى
قطاع مصلحة الأمن العام
الإدارة العامه لشرطة ميناء القاهرة الجوى
الإدارة العامة لمباحث مكافحة التهرب الضريبى والرسوم
مصلحة الجوازات والهجرة والجنسية
الإدارة العامة لشرطة الكهرباء
الإدارة العامة للمعلومات والتوثيق
الإدارة العامة لشرطة التموين والتجارة الداخلية
الإداره العامة لشرطة النقل والمواصلات
■الإدارة العامة لمكافحة جرائم الأموال العامة
الإدارة العامة لتصاريح العمل
الإدارة العامة للمرور
الإدارة العامة للشئون الإدارية
مصلحة تحقيق الأدلة الجنائية
قطاع مصلحة الأحوال المدنية
الإدارة العامة لشرطة البريد
ادارات شرطة النجدة
قوات الأمن العام والأمن المركزي
جهاز امن الدولة
جهاز الشرطة بالمخابرات العامة
■الإدارة العامة لشرطة رئاسة الجمهورية
■الإدارة العامة لشرطة مجلسي الشعب والشورى
■الإدارة العامة للحراسات الخاصة