ااااااه يا نفوخي

بقلم : خالد عبد الرحمن
مواطن حس بالحرية ونفسه في العدالة الفورية
لو انا واقف في ميدان التحرير وسط الاف المتظاهرين وحاسس بالخوف والجوع والقلق وحياتي ملتخبطه وقلة فلوس و خوف اهلي عليا
كل دا مش مشكلة لاني انا عارف انا بعمل ليه كدا وعارف انا عاوز ايه
بس بعد يوم 11/2/2011
الدنيا اتلخبطت خالص ومحدش يقول انه عارف حاجه
هل هي فعلا ثورة متضاده او انها تصرفات عشوائية
كلام كتير في التلفزيون في الفس بوك علي صفحات النت
كلام كتير مع الاصدقاء وكل واحد ليه دماغه او مش بيفكر خالص من كتر الاحداث
واخر اليوم اقول ااااااه يا نفوخي واسأل نفسي طب رايي انا ايه ؟؟ !!! حيرة صح
حتي راي مش هكون واثق فيه تماما
وناس تقول كلام كبير قوي يخلوك تشك في كل حاجه وتحسب كل حاجه ... مع انك مش في ايدك اي حاجه
مظاهرات فئوية ناس تقول خلوا بالكم هم قصدين يعملوها عشان البلد تولع
وناس تقول مش مقصوده والله الناس حست بالجراءه وكمان هما مظلومين من زماااااااان
خد عندك قس يتقتل وخش يا معلم علي المشاكل الطائفية
اه عاوزين نشيل المادة التانية من الدستور
لا مش عاوزين نشيل المادة التانية من الدستور
والمشكلة ان في نسبة كبيرة من المسيحيين والمسلمين ميعرفوش هي المادة التانية من الدستور بتتكلم عن ايه اصلا
طب ليه بئا بنتخانق ..اصلهم عاوزنها دولة دينية ...لا انتوا بئا اللي بستغلوا الموقف .. وخد عندك شد وجذب ومحدش فاهم
حاجه ... يا خسارة مش احنا برضه اللي كنا ماسكين ايد بعض في المظاهرات و بنقول حرية
وخد دا كمان عندك :: وزيرالداخلية يطلع يعك في الكلام فيفقد ثقة الناس بيه اكتر ومدير امن بيسخن ضباطه وعساكره علي الناس وخناقة المعادي وقتل فلان ودبح فلان و عصابات تثبيت الناس .... استر يا رب
وكمااااااان تعديل وزاري مترقع طب ليه ..ابوس ايدكم حد يقولي ليه ويقنعني انا عاوز اقتنع بس
اااااااااااه يا نفوخي
وفين حق الابرياء اللي ماتوا
خبر عاجل رئيس الوزراء احمد شفيق اتصل بالرئيس مباااااااااااارك .. يا حوستي
فين فتحي سرور وفين صفوت الشريف وزكريا عزمي حاتم الجبلي وحسن يونس وبطرس غالي
وفين جمال مبارك اللي دمر البلد .. اظهار بيتفسح في اوربا اصله زعلان يا عيني
وبابا مبارك مش عاوز ياخد الدوا عاوز يموت وهو في عز شبابه ... يا حراااام صاحب اسطورة الضربة الجوية
واحنا المواطنين والصحافيين والمذيعين والناشطيين السياسيين شغالين لوكلوك لوكلوك لوكلوك ومن غير فايده اهو بيخرجوا الطاقة اللي كانت محبوسة
وخش علي الخناقة الدستور:: شوية نلغي الدستور .. لالالا نعدله الاول ... هو انت هتفهم احسن مني نلغية يعني نلغية ..غطيني وصوتي عليا ياما
اما الجيش بئا معنديش غير كلمة واحده
انت معانا ولا مع الناس التنيين ..... معاكم طبعاااا ....احنا بئا الناس التنيين
اااااااااااه يا نفوخي
المواطن المصري البسيط عنده حل بسيط خالص اذا اتعمل يبئا فعلا هنحس اننا عاوزين نغير البلد واذا متعملش يبئا احنا عايشين علي الحسابات الاخري والكل بيدور علي المصلحة الخاصة
الحل هو عاوزين قماشه بيضه جديده بس كدا ...... هو دا الحل
يعني بلد تعداد سكانها 85 مليون نسمه واللهم لا حسد
فيها علماء ومفكرين في جميع المجالات وفيه قيادات صالحة للاستخدام الادامي وفيها شعب شاب وقوي
ايه المشكلة اننا نخلع كل المحافظيين بحاشيتهم والمجالس المحلية بحاشيتهم والقيادات الصحفية وحاشيتهم ومراكز القوة في كل المصالح والهئيات الحكومية بحاشيتهم وجميع الوزراء بلا استثناء بحاشيتهم وحتي لو كان فيهم حد كويس او محترم بالاضافة الي كشف حساب وطبيعة اعمال رجال الاعمال
وعاوزيين جهاز شرطه بحق وحقيقي مش جهاز عاوز يكون سي السيد لا مش لاعب
وبكدا شلت كتير من بؤر الفساد
ايه هيطلعوا كااااااام مليون
يا راجل يعني متبقي عندي 84 مليون
دا حل بسيط لو القياده عاوزه تصلح فعلا البلد ومحدش يقولي اصله صعب .. وحياتك سهل لاي حد عنده ضمير وعاوز يصلح البلد ووقتها الكلام هيخلص والعجلة هتمشي والناس هترتاح لما تشوف اسماء محترمه تثق فيها وقتها الكل هينتظر
اااااااااااااااااه يا نفوخي
الدنيا بسيطه ..بس احنا بنخد الامور علي اعصابنا
ولما نكون عاوزين نعقدها بنعقدها
انا كتبت وانا عارف انكم مش محتاجين اني اكتب لانكم عارفين كدا
الحرية لازم يكون بعديها العدالة و زي ما جبنا الحرية بمنتهي القوي والرقي
نتحد ونجيب العدالة بمنتهي القوة والراقي مش نفضل نقول في كلام بشوشر علي عقلايتنا ويخلينا نقول ااااااااااااه يا نفوخي
عاوزين نقول اننا دلوقتي عاوزيين العدالة وهنجبها بكل قوة ورقي
رحم الله عمر بن الخطاب نام تحت شجرة بملابس متواضعه وجيوشه وصلت العراق ومصر
عدلت فأمنت فنمت يا عمر