وده مش جنون

تسمحى..
تسيبيلى عمرك أبدأه
تشهدى..
على حلم مات
من يوم م ضاع من مبدأه
لو كنتى أرضى ودنيتى
اوعاكى تبكى ع الشهيد
وتخافى ليمُوت الولد
اياكى تنسى عنوتك
_لو مات ف بطنك يوم وليد
فى الف غيره هيتولد _
***
لو ضاقت الأرض بطموحك
وبجروحك
أيّاكى لو يوم تنحنى
اطلقى أبراج حمام
ازرعى عُمرك زيتون
ابنى تكعيبة عنب
ارمينى للّليل اللّئيم
متخافيش..
هيكون حنُون
لو كنتى أرضى
مش حاتوه
أنا حَرجَعك وحرجّعك
صدّ قينى ..
ده مُش جنُون
وحادور ادوّر ع اليتيم
اللّى أمّه اترمّلت
واللّى سكناه الظنُون
لو كنتى أرضى متخافيش
ولا تنحنى
ح نقوم نصلّى ف معبدك
ياللّى اتّجاهك قبلتى
ياحد حلم مالوش حدود
ليلك المليان هموم ..
ح يضُم يوم نفس الهلال
وحترجعى لكُل الوجُود..
من غير غيُوم
و الحلم فى حضنك حلال
****
بقعة الدّم اللّى هربت..
من سنين
ح ترُد لعروقك حياه
وح تنطلق عشق ودفا
ووشوش بيملاها الوفا
نبضة حنين .. وثبات و دين
تكبيره بتقول..
الصلاه
سجده فوق طهرك..
نجاه
صرخه تعلن وقفتك..
ضمّه لروح العطشانين
ولعنه تحرق كل آه
لو كنتى أرضى
متخافيش ولا تنحنى
أنا حارجعك..و حرجّعك..
صدقينى
ده مش جنون