يا وطن قولى رايح على فين

ياوطن قول لي ..
رايح علي فين؟
يا وطن قول لي..
والسكة منين؟
والناس أسرار
أخيار أشرار
ولا بيك حاسين
مزنوق "ف" حصار
تسواش قرشين
ياوطن غالي وطيب مسكين
يا وطن قول لي
رايح علي فين؟
**
براك جوّاك
أشواك وهلاك
تفتح لنا باب ..
تقفل شباك
بياخدنا دولاب ..
ننزل سرداب
ونتوه ونلف مع الملايين
ياوطن قول لي رايح علي فين
**
بحرك باين ..
طب فين مرساه؟
قلبي سفاين ..
تانيين وارثاه
وانا والأولا د ..
معمول لي مزاد
مين عمله لمين..؟
علي مين أرساه ؟
وان قلت يابوووي ..
أو قلت الآه ..
تديني بدل .. قلمين .. تلاتين
ياوطن قول لي رايح علي فين
**
زمامير وطبول
فرسان وخيول
علي طول بالليل
بالليل علي طول
في الصبح يادوب.. الشمش تبان
يطلع شملول .. حواليه ددبان
ويذيع تصريح ..
مبهج ومريح
يشرح ويقول:
كل الأزمات جبنالها حلول
وطني يا محتاج ..
محتاج محلول
بنقول ها تروق ..
والعلّة تطول
ضاع حلم " ف" حلم "ف" غمضة عين
يا وطن قول لي رايح علي فين
**
عاجز مكسور
حاجز "ف" قصور
ولاطولت حرير
ولا توب كستور
وان قلت يا نيل
فالنيل مقتول
وان قلت ياليل
فالليل بيطول
وان خدت عصاي
مع بعض عشاي
ولعل عساي
أصفالي يومين
تطلع لي ديابة "ف" كل كمين
وتقول لي العز دا جبته منين
يا وطن قول لي رايح علي فين
**
الدنيا ربيع ..
يا بنين وبنات
أنا عندي رضيع
محتاج لبنات
والنبي بشويش ..
..بخفيف .. بخفيف
باحلم "بالعز" وجيبي نضيف
الحق لي رغيف ..
أو قول رغفين
أنبوبة غاز ..
مش أنبوبتين
يا وطن قول لي رايح علي فين
**
بنعيد ونزيد
حالمين بجديد
ويفط تأييد
ويفط .. تنديد
"م" البوس "ع" الراس
للبوس "ع" الإيد
نفس الحراس .. همه المطاريد
وجموع الناس ..
طلقاء .. مساجين
من غير ولاشوك ..
ولا أي حديد
والودن دي طين ..
والتانية عجين
أنا مش مبسوط
وبجد حزين
يا وطن قول لي ..
رايح علي فين