بتاع الجاز

لو قلت لأى حد إنك مهندس بترول هتلاقيه على طول يقولك: "هو إنتو عندكم صابحه؟", "يا بتاع الجاز", "إيه أخبار البريمة؟", و يا سلام لو كان فى أزمة فى البنزين أو أنابيب البوتاجاز هتلاقى السؤال المعتاد: هو فيه أزمة ليه؟, هو انتو ا مش شايفين شغلكم و لا ايه؟, و ساعات يقولك إنك أكيد بتشتغل فى بنزينة و بتمون عربيتك ببلاش و مش بتتعب فى الحصول على أنابيب البوتاجاز.
طبعا مش هقول حسبى الله و نعم الوكيل فى فيلم حسن يوسف (للرجال فقط) ولا فيلم رشدى أباظة (عروس النيل) و لا هدعى على لبنى عبد العزيز اللى خلت كل من هب و دب يقول عليا "بتاع الجاز" و لا هلوم كسل المصريين و اعتمادهم على اكتساب المعلومات من الأفلام بدل القراءة و الاضطلاع عشان يعرفوا ان مهندس البترول مش شغال فى بنزينة و لا حتى بيمون عربيته ببلاش و لا بتجيله أنبوبة البوتاجاز لحد بيته.
و بعد صراع طويل مع المجتمع المصري قررت أكون إيجابى و أحاول أعرف الناس يعنى إيه مهندس بترول. طبعا المقال مش علمى و لا بيضع مصطلحات و تعريفات لمهندس البترول و تخصصاته لكن بحاول أوصل الصورة لغير مهندسي البترول (على فكرة فى ناس شغالة فى شركات بترول و ما يعرفوش الفرق بين تخصصات مهندسي البترول المختلفة) و نفسي أوصل الموضوع بصورة سهلة و سلسة.
أول حاجة إن كتير من المصريين بيقولوا كلمة مهندس بترول على أى حد شغال فى شركة بترول و ده أول غلط. الصح إن شركات البترول فيها مهندسين من كل التخصصات بما فيهم مهندسين البترول.
تانى حاجة مهندس البترول بتتقال على نوعين من المهندسين: مهندس استخراج البترول من باطن الأرض (و اللى بنقول عليه بترول بس من غير استخراج و لا حتى باطن) و مهندس تكرير البترول للحصول على المشتقات اللى بنستخدمها فى حياتنا اليومية زى البنزين و حاجات تانية.
مهندس استخراج البترول (اللى الناس ربطاه دايما بالبريمة و هتعرف دلوقتى ان البريمة جزء من عملية استخراج البترول مش كل العملية) ممكن نقسمه لأربع تخصصات: ?- مهندس الخزانات: و ده بيدرس طبقات الأرض مع الجيولوجيين و الجيوفيزيائيين و البتروفيزيائيين (دول مهندسين برضه أو خريجى علوم شغالين فى نفس المنظومة باختصاصات معينة) عشان يحدد أماكن وجود البترول و احتمالية و جودها و هنحفر الآبار فين عشان نقدر نطلع كل الزيت اللى فى الخزان و بيبقى ليه دور مهم على طول عمر الخزان كاستراتيجية لاستخراج الزيت و تحقيق أقصى استفادة من الخزان, ?- مهندس الحفر: بعد ما مهندس الخزانات بيحدد مكان حفر البئر بييجى دور مهندس الحفر اللى بيبقى مشرف على البريمة اللى بتحفر و طبعا مهندس الحفر بيحفر البير و يسلمه و يتنقل بالبريمه لمكان تانى عشان يحفر بير تانى, ?- مهندس تكنولوجيا الإنتاج (أو هندسة الإنتاج أو العمليات أو الرفع الصناعى أو ....مسميات كتير حسب كل شركة) : المهندس ده زى الدكتور بيتابع إنتاج الآبار و بيتدخل فى حالة أى نقص ف إنتاج البير. طبعا بعض عمليات صيانة الآبار بتتطلب بريمة و ف الوقت ده بيرجع دور البريمة تانى (بس فى الحالة دى بنسمي المهندس المسئول مهندس صيانة الآبار لإن البريمه دلوقتى بتأدى دور تانى غير الحفر) و الشغل فى الحالة دى بينفذه مهندس تكنولوجيا الانتاج بس تحت إشراف مهندس صيانة الآبار, ?- مهندس الإنتاج: و ده بيستلم الزيت من بعد ما يطلع من البير لغاية ما يسلمه لمهندس التكرير فى محطة المعالجة. طبعا بيبقى مسئول عن سريان الزيت فى الخطوط من الآبار لغاية محطات التجميع و لو موقع محطات التجميع فى البحر بيبقى مسئول عن أمن و سلامة العاملين و متابعة كل حاجة بتحصل على المحطه و تسهيل كل أعمال الصيانه فى المحطة من أعمال ميكانيكية أو إنشائية ...إلخ.
كل كلامى الللى فات على المهندسين اللى شغالين فى شركات تابعة للهيئة العامة للبترول لكن فيه شركات خدمات ممكن تلاقى فيها مهندسين بترول برضو بيشتغلوا بأوامر و إشراف من مهندسي التخصصات اللى لسه قايلينها سواء على البريمة أو فى صيانة الآبار أو هندسة الإنتاج.
لو إتكلمنا عن مهندس تكرير البترول بنلاقيه مسئول عن محطة معالجة الزيت الخام لغاية ما يوصل للتانكات عشان يتباع أو عشان يتنقل فى الخطوط لمعامل التكرير و هناك بتلاقى مهندس تكرير تانى مسئول عن تكرير البترول للحصول على المشتقات المطلوبة و برضه تلاقى مهندسين تكرير فى مصانع الغاز (سواء الإسالة أو التعبئة) و ممكن مصانع الكيماويات و ساعات الأسمدة و احتمال الأسمنت.
يا ريت أكون عرفت أوصل للناس إن مهندس البترول مش بيمون ببلاش و لا ليه علاقة بتوزيع أنابيب البوتاجاز للمستهلكين و على فكرة كمان معندهمش صابحة فى مواقع استخراج البترول. ممكن تلاقى صبحى لكن صابحه دى صعبة.
بقلمى