أنا رفضاه ..... قصيده بقلم مرفت حموده

لما اكون عاوزاه متهنى
وينول كل ما يتمناه
لما النبض فى قلبى يغنى
ويقول ولا يمكن أنساه
لما كنوز الدنيا بحالها
مش عاوزاها وطالبه رضاه
لما عينّيه تشوف الدنيا
بنظرة عينه وأنا وياه
لما زهور الكون تتفتح
وأقطف منها عبير وحياه
لما ليالى كتير بأستنى
ولو يتأخر برضه معاه
لما ربيع العمر بيرجع
يحضن قلبى فى يوم لقياه
لما القلب بيعزف أسمه
فاكر أنه سكن جواه
وتهون كل سنينى عليّا
ولا بتهون اللحظة معاه
يبقى الجرح كبير على قلبي
لما فى يوم ينكر ذكراه
لما يروح ف طريقه لواحده
أو يبعت ويقول لي انساه
يبقى اختارلي الموت وانا عايشة
واختار بس لنفسه حياه
قلبه اناني وعاشق نفسه
واتعود ابقى مسمحاه
المرة دي ياقلبي بأعاهدك
لو حيعود انا مش عاوزاه
طول ما الجرح بينزف حأعلن
اني يا قلبي خلاص رفضاه
خلاص رفضاه.
أنا رفضاه