العزف على وتر الفقرا ...... قصيده بقلم الاستاذ مصطفى محمود ابو ابراهيم

قال الأمل جى فى بكره
اصل التجاره شطاره يامان
وزمان تاجرو فى الأفلام
بالوطنيه والأوهام
حرق علم أى كيان
اسرائيل أو أى جبان
فيلمه بينجح ايوه أوام
أما الموضه دى الأيام
التجارة ليها أحلام
يبكو ياعينى على الحرمان
وكمان صوره ويا جعان
يفضل يصرخ ويقول فقرا
قال هايجيب الثروة فى بكره
ومصر ياروحى هاتصبح فكره
ونهر النيل هايروح العتبه
وشبرا هاتجرى عند الاوبرا
كله كلام فى كلام ياأصحابى
توهت وتاهت منى آهاتى
وصبحت أشكى بصوتى الواطى
اصل القسوه كل حياتى
واللى خاربها الاعلام
قوللى صوتك بكره بكام
و سيدك يصبح عضو تمام
زيت مع رز ومرات عز
تديلك كام
عاوز بكره تبأه أمير
دوغرى اتصور ويا فقير
جتله الثوره وقال تغيير
حظه ياعينى تملى عسير
عايش فيها كأنه أسير
حتى ملامحه بدون تفسير
نظرة حزن وذل كتير
امتى يامصر يلاقى فقير
حب ورزق بدون تقصير
يصحى يلاقى بيته أمان
عمره ما يسأل واحد خان
ولا يقابله مره جبان
يقوله سعرك انته بكام