قصة المظلوم ..... قصيده بقلم اماني يوسف

يا دنيا لفى ودورى بينا كمان وكمان
إحكى القصه م الأول ، ونبدأها ب كان ياما كان
عن واحد بسيط جداً ، كان اسمه المظلوم غلبان
لا فارق كام سنين عمره ، ولا نعرف إيه العنوان
ما هو موجود هنا وهناك ، فى كل مكان
عادى فى شَكلُه وطموحه ، مجرد إنسان
مَفيهوش ميزه ، وسط الناس عمره ما ب يبان
عايش وخلاص ، قَضَّى حياته فى قهر وحرمان
أكلُه مسرطن ، مَيتُّه مسمومه ، وعيشتُه هَوَان
لا فيه تعليم ولا رعايه ، وقال بيقولوا بالمجّان
ولا وظيفه بدون واسطه ، وكوسه وقرع وبتنجان
يادوب بيلاقى قوت يومه ، وياما بات ليالى جعان
حتى المستقبل مش باين ، وإزاى راح يقدر ع الأحلام
ومنين يجيب عشان حلمه ، يشوفه حقيقه مش أوهام
لكن تلاقيه صابر راضى ، على حاله بتعدّى الأيام
والظالم ب يزيد فى عمايله ، ولا عنده ضمير ولا هَمُه ملام
مبسوط وبيضحك مطمن ، إن المظلوم ده كبيرُه كلام
كل اللى يهمه انه ب يعلى ، وولادُه ومصالحُه حماها
ناسى إن الصبر ده ليه حدوده ، وخلاص بزياده عداها
أهو فاض بالمظلوم واتكلم ، أحلامى مش ممكن أنساها
مش ح اضعف تانى أو استسلم ، وانشالله أموت حتى فداها
واصرخ يسقط حكم الظالم ، لو كل الأسوار علاها
عايز حقى واعيش بكرامه ، وح أهد الحيط ع اللى بناها
وقدر يوصَل صوته العالى ، وكلمته قالها وغنّاها
الحق أهو بان عاد لاصحابه ، وميزانه صبح معدول
نهاية الظلم شئ ساهل ، ومن تانى لابد نقول
تمّلى الظلم يستقوى برغم حقيقته إنه جهول
ولا بيدوم ولو طوّل ، ب ييجى اليوم عليه ويزول
كل القصه لو تقدر ، تقول حمرا يا عين الغول
تلاقى الغول صبح قطه ، وخاف منك جرى على طول
لإنه جبان وأصله ضعيف ، وخوفك منه كان مسئول
عن إنه استضعفك خلاك تكون طُوعه وليه مذلول
يضيع الحق ب سكوتنا ، والظلم فى حياتنا يسود
لكن لو كلنا نقول لأ ، مش ممكن فى يوم ح يعود
وإياك يوم تسيب حقك لكلمه " ربنا موجود "
ما المولى اللى قال إعمل ، وخليك بيه وعليه مسنود
قوم إعقلها واتوكل ، اقف ثابت وشِدّ العود
تقول يارب ع الظالم ، وبإيديك تمحى أى حدود
تبدأ تبنى مستقبل ، ولا يبقى الطريق مسدود
وتنتهى قصة المظلوم ، وحَقُه إليه يكون مردود