ياخوفي نلبس ترح ..... قصيده بقلم اسمراني صبري

ياخوفي نلبس ترح ونلطم علي الخدين
ودم الشهيد يتنسي ونبقي ناس تايهين
...
ونقول عليه العوض ياخيبه لا خيبتين
خوف يابلد الرجال تبقي بلد نساوين
وانا اللي اسمي صبري بكره يكون صابرين
وينضرب بالهيافه المثل خوفي يامصرين
مجلس رياسه وعسكر في الحق مختلفين
ونبقي خلق غجر وفي السراب ضايعين
لازمنا صيحة غضب تعلا بصوت ملايين
ولا ننام في الغصب ونبقي ناس جاهلين
ياجينز ياميك اب هي الحلاوه فين
في اللبس ياعايق ولا في شمل الدين
يامسيحي يامسلم عملت ايه في سنين
كلام بيتردد انك علينا امين
انا قلبي متقطع وزادت دموع العين
هو احنا حيوانات ولا بني آدمين
ولا ياخلق الله ابلسه او شياطين
لازم تكون واقفه لازم نكون واعيين
ولا ننام ديما ونبقي غفلانين
ياحق فين دربك وببيروحوله منين
ياصرخه مخنوقه ياغل في الشرايين
لازم نجيب حقك امتي نكون صاحيين
خايف تكون عاده خايف نكون شاردين
يامصر ياغاليه خايف نكون بايعين
ولا اسيب وطني واسكن بلاد تانيين
ياخوفي نلبس ترح ونلطم علي الخدين