بورتريه أنيس منصور

بقلم : الشاعر مصطفى السبيلي
أنيس منصور
دا أسم الكاتب المشهور
وحتى ملامحه مشهوره
أنيس وونيس فى فلسفته وتعبيره
ح ندخل عقله وندوّر فى تفكيره
بدون طباشير وسبّوره
ونرسم فى الخيال صوره
لأنيس منصور
ضحوك الوجه ..
متفا ئل
كأنه عن هموم الدنيا واللى بيجرى ..
مش سائل
بشوش والشعر متسبسب
ومتهذّب
ومتربّى ومتأدب
بيشبه شعره فى نعومته ..
كتير أسلوبه فى التفكير
كتاباته ..
ورحلاته
وقلمه اللى بيغزل فى "مواقف" ..
طول حياته حرير
وفلسفته جناين ورد
ونسايم جناينه عبير
وهامه عريضه ..
لا سمره .. ولا بيضه
لكن (بيضه) ..
بتفقس كل يوم "حواديت"
عن الدنيا ، وعن ناسها ..
وأحوالها اللى ماتسرّش وعن ..
حتى عن "العفاريت" !!
ومصرى أصيل ..
خفيف الدم موهوب ..
حتى فى التبكيت وفى التنكيت !!
ودول "حاجبين" ..
على الجنبين بيتعاجبوا
وإنجازه ف كتاباته وفلسفته ..
ماهوش عاجبه !!
أنيس منصور أديب مشهور
ودى رسالته ، ودا واجبه
عيونه عيون ..
بتتشكل وتتلون بلون وبلون
تشوفه ..
تقول عليه : عاقل
وتقراله
تقول : مجنون !!؟؟
وفين ح نروح ياعم أنيس ..
مابين (الكاف وبين النون) !!؟؟
وأمتى الفكره تتبلور ..
وتتكوّن على الأوراق ..
وأيش بعد الرحيل والغربه والأشواق !؟
يقوللى :(الدنيا ياصاحبى لؤا وفراق)
عيون دبلانه ..
ورموش ع الجفون الدايبه سجّانه
أنيس منصور ..
كتير لاجل البشر عانى !!
عيون مليانه بالأسرار..
وبالأصرار
وأستمراره فى المشوار
لاّخر نبضه فى عروقه
وشوقه للرحيل..
والمعرفه ف بحر الحياه (طوقه)
أنيس وونيس
يوماتى نقابله فى الأهرام
كأنه عريس ..
نقوم وننام كأنه طيف ..
معانا حتى فى الأحلام !!
جناين خضره إحساسه
وفلسفته ف كتابته ..
تاج على راسه
ونظراته مداها بعيد
يشوف الناس بلون العيد
يشوف الكل بعيونه ..
بشوش وسعيد
كأن مافيش "وشوش كشره"
كأن الدنيا مافيهاش ناس ياناس ..
بتموت من الحسره !!
أنيس مخلوق عشان الحب
وعمر اللى عرف قلبه طريق الحب ..
مايكره ..!!
جينا لوصف شكل الأنف ..
زى "العرف" أرنبته !!
كتير تشبه ل "حرف" الجر ..
كتير تشبه ..
لإبهام إنزرع فى الكف !!
ومن ده ..
ألف صنف ، وصنف
لكن (منخار) أنيس منصور ..
أثر .. من بعد "طيبه ومنف" !!
*************
وجينا ياعمنا لل "فم" ..
وبسمه عريضه مرسومه ..
وخفّة دم
- ( مافيش شئ فى حياتنا مهم )
(لكين للمعرفه .. قيمه )
( نحب .. نعيش .. ونتجوز عشان نتلم )
(وتبقى المعرفه عديمه ) ..
( مايبقاش للحياه قيمه ) !!
ياعم أنيس :
حياتنا كلها غنوه وتقسيمه
وفلسفتك حقيقه ..
ناقصه "ترنيمه " !!؟؟
ونلقاه مبتسم صافى
ولا بيغضب ولا يجافى
شباب دايم ماشاء الله ..
وفكر جديد
شباب رغم الزمن..
والغربه والتجاعيد
رغم المخاطر فى السفر
رغم العفر ..
وزحمة المواعيد !!
ونستناه عشان نقراه فى كل صباح
تمام زى احنا مابنستنى يوم العيد ..!!
أنيس ..
أسمه على مسمى
ونيس فى الوحده واللمه
حكاياته بتتجمّع عليها الناس
ب "وعي" بيقروا .. وبإحساس
حروفه دهب
حروفه ياقوت
وأفكاره فصوص الماس
نهاية القعده نلقاهم ..
يامتفقين .. يامختلفين !!
ولكن قد ماختلفوا ..
مايختلفوش على ريادته ف كتابته ..أتنين !!
أنيس منصور دقهلاوى ..
ومن بلد اسمها "شربي"
مدد موصول يامنصوره
يابلد الكاتب المشهور ..
أنيس منصور