حقيقة ان الزواج ف بلدنا و ربما البلدان العربية نظام معقد للغاية , فى الشهور القليلة الماضية كنت منوطة بتجهيز شقة ابن اخى للزواج , و الذى تم خلال هذا الشهر , العروس الله يكرمها لم يكن لها طلبات , بل اكدت انها لا تريد شقة و فرش الان نظرا لانهما مش عايشين ف مصر , و انه سوف يتم الزفاف ف احدى الفنادق او القرى السياحية و بعد شهر سيعودا الى البلد التى فيها عملهما ,, فعلا وجهة نظر تحترم غير ان والدة العريس الله يكرمها , زوجة اخى , صممت و راسها و الف سيف لازم تجيب اربع حجرات , ليه يا حاجة ؟؟؟ , هو ابنى اقل من مين ؟؟؟ ايه يا ايمان , يعنى يرضيك إبن اخوكى حبيبك شقته تبقى اقل من شقق اخواته , الموضوع مش كدة خالص , ماهو إبن أخى حبيبى بعد لما يخلص شغله و سنين اعارته و يحب يرجع يبقى يفرش شقته على كيفه هو و مراته .. المهم ان الشقة موجودة انما ابدا , تجيبها من هنا , تجيلك من هناااااااا , و المهم ان الموضوع مكلف جدا ... و عشان إبن أخى حبيبى شقته ما تبقاش اقل من شقق اخواته دخلنا ف مبلغ كبير ,, و مش عارفة التلاجة لازم تكون ازاى و المطبخ و السفرة , و السيراميك .... مصيبة لوحده السيراميك ده , الوزرات بالقطعة و تركيبها بالمتر الطولى مش المتر المربع ... و النجف و السجاجيد ياااااا لهوى ,,,,, الله يكون فى عون الشباب يعنى إبن أخى محظوظ ما شاء الله عليه عنده شغله و عنده ماما ,, لو غيره ما فيش عنده الامكانيات دى يعمل ايه , مش فى مواجهة الاسعار بس , لأ كمان فى مواجهة الطلبات المبالغ فيها , الحياة الزحمة اللى احنا عايشينها الزوجين فى بداية حياتهم اتنين و تلاقى عندهم 15 كرسى و كنبات و الجديد ان غرفة الليفنج تحتمل تحويلها الى غرفة ضيافة ,, ليه ؟؟؟؟ احنا مش فاضيين نضايف حد اللى عجبنى فى فيلم احكى يا شهرزاد ..... شقة المذيعة .... كانت بقدر ما هى كبيرة بقدر ما كانت فاضية كلها عبارة عن شبابيك و ستاير و تو بارتيشنز فقط كحجرة نوم و باثروم ( حمام ) , انا بقى ده راىى , و احب الشقة تكون فاضية يادوب مطبخ معلق و تربيزة صغيرة فى المطبخ و عليها 2 كرسى و بارتيشن حمام و نوم , و حجرة النوم يكون فيها الدولاب داخل فيه السرير و فى نهاية السرير زى كنبة كدة , قاعدة يعنى بدل الكرسيين و الترابيزة بتوع اوضة النوم , و التسريحة مراية كونسول بعرض الحيطة مثلا ... بس و باقى الموبيليا شيزلونج و كنبة مرجيحة فى التراس و كرسى بامبو و 2 بوف و كان الله بالسر عليم و كمان احنا لازم نعمل ع ازالة الحوائط و الجدران ,,, احنا حياتنا مليئة الحوائط و الحواجز التى تضيق علينا الاماكن و تصيبنا بالاختناق و تزيد من البعد و الفواصل الإنسانية طبعا انا كدت ارجم و يقام على الحد من جراء تلك الافكار على فكرة دى مش افكار غريبة , دى افكار مريحة جدا و عملية و تسهل الحركة فى البيت و تشعر قاطنيه بمساحة واسعة حتى و ان لم يكن بذلك الوسع, كما إنها لا تثقل على ميزانية العريس و هو مقبل على بناء بيت و حياة جديدة والغريب أن الاقارب و غيرهم من المقيمين فى فرنسا و بولاندا و معظم دول العالم يعيشون بمثل تلك الافكار ... احنا بس مازلنا متمسكين بافكار عفى عليها الزمن و لكن مع تصميم الأم , طبعا تم تنفيذ كل ما كانت تريد , و قد جاءت شقة العريس تقليدية بكل المقاييس ,,, مامته عايزة كدة رحماك يا مامة العريس ابوس رجل ابوكى هناك دائما فى الدنيا ما يعيق سيرها الطبيعى و ينغص على الاحياء الاحساس بها و بمفاتنها
