فيديو..الثورة بتتسرق استرجل وانزل

تداول مستخدمو مواقع التواصل الاجتماعي "فيس بوك" و"تويتر" مقطع فيديو لشاب يدعى أحمد أنور يدعو للنزول للمشاركة بجمعة "تصحيح المسار" غداً، مؤكدا أن ثورة 25 يناير سرقت من بين يدي الشعب.
قال أنور خلال مقطع الفيديو الذي حقق ما يقرب من 4 آلاف مشاهدة على موقع ال"يوتيوب" الإلكتروني :"ثورتك بتتسرق بدليل مسرحية شهود الإثبات اللي ها تجيب براءة للمتهمين، لما أسماء محفوظ عشان كلمة قالتها في وقت غضب تتحاكم أمام محاكم عسكرية وحبيب العادلي اللي بقاله 14 سنة بيعذب في المصريين هيطلع براءة تبقى ثورتك بتتسرق، لما تكون فلول الوطني موجودة لحد دلوقتي في أعلى المناصب تبقى ثورتك بتتسرق".
وأضاف :" لما تركيا تطرد سفير إسرائيل من اعتدائها على أسطول الحرية وإحنا يموت عندنا إخواتنا على الحدود برصاص متعمد ونبني جدار عازل أمام السفارة عشان نحميهم تبقى ثورتنا بتتسرق، لما نسكت على المحاكمات العسكرية نبقى برضوا بنتسرق، لما نسكت على تقسيم الدوائر الانتخابية بالشكل اللي أعلن عنه مؤخرا واللي هيخلي البلد مجزرة وقت الانتخابات عشان يتقال علينا شعب همج ولا نستحق الديمقراطية وسيستمر حكم العسكر حتى هدوء الأوضاع تبقى ثورتنا بتتسرق، لما كل يوم تحصل كارثة جديدة ولسه بتسكت ولما تيجي تتكلم يتهموك انك بلطجي ومخرب وتهدف للوقيعة بين الشعب والجيش وزعزعة البلاد ومش بعيد يتقال انك السبب الرئيسي في أحداث 11 سبتمبر تبقى ثورتك بتتسرق".
"ها تسكت لحد ما الدور يجي عليك، ساعتها مش هتلاقي اللي يقف جنبك، وصلنا لدرجة إن أحلامنا وطموحتنا هي أقل حقوقنا ومش عارفين ناخده، ولسه قاعد مكانك تبقى متستهلش الحرية".

شاهد الفيديو :