قراقوش ....طلع ... مابيعرفشي

حبيبي اللى حبيته طلع ما بيعرفشي ....
رغم أني عصرت كل الليمون عشان ماأقرفشي
أعمل أيه ياناس .....لحبيبى اللي ما بيعرفشي
....طلب فرصة أديناه ...فرصتين ....
طلب 100 ...أديناه 200
طلب شرعية ...أديناه شرعيتين
ومن يومها هو ماشي على الجانبين
والخاين ابو عين زايغة ...أتاريه بيحب عليّ أتنين
*****
الأولى أمه .....داهيه تغمه ...
والثانية كان عاينها فى كمَّه ...
والخاين أتمسكن.... لما أتمكَّن ....
وعلى الكرسي قعد وأتسكَّن...
*****
أعمل أيه ياناس ...
.في حبيبي المحتاس
أبو جلد تخين ....ومخ ترباس
قولوا لي أعمل أيه ياناس...
******
مابيعرفش يعمل حاجة ...إلا لما يسأل الجماعة
ولما بيقف مع ستات لازم يبص في الساعة
وهيأجر بيتنا مفروش ..والعفش يبيعه بضاعة
قولوا لي أعمل أيه ياناس
في حبيبي المحتاس
******
حبيبي اللى حبيته طلع ما بيعرفشي ....
رغم أني عصرت كل الليمون عشان ما أقرفشي
أعمل أيه ياناس .....لحبيبى اللي ما بيعرفشي
******
• يُحكى أنَّ أنَّ أيه ..أنَّ قراقوش ......جلس يفكر في الحديقة ...وأخذ يحدث نفسه ...قائلاً : أنا أيه اللى جبتوا لنفسي ديه ... مش عارف أخذ أي قرار ...والناس بيقولوا عليّ مكَّار ...رغم أنني غلبان ...ومن ضغط أعصابي تعبان ...
• وهنا دخل عليه حفيده ...وهو يبكى ..
• فسأله قراقوش : أيه ياحمادة زعلان ليه ؟
• حمادة : أنا مش زعلان ..انا متغاظ ..
• قراقوش : طيب متغاظ ليه ..
• حمادة : متغاظ لأن أصحابي في المدرسة وفي النادي وفي كل حتة ...بيغظوني ...وبيقولوا لي أن جدك قراقوش ...( مبيعرفش ) ..
• فأنتفض قراقوش وهو يصرخ قائلاً : طيب هما أيش عرفهم ....بالموضوع ده ...أنا أفتكرت أنه مفيش حد عارفه ....إلا .... (الجماعة) ...
• حمادة : ماهو ممكن تكون ( الجماعة ) هى اللى قالت لأصحابي . ..
• قراقوش : هما أصحابك يعرفوا ( الجماعة ) ....يعني بيشوفوا بعض...
• حمادة : طبعا .....
• قراقوش : يا خبر أبيض ....ياقراقوش ....فضيحتك ..بقت على كل لسان ....الجماعة ....بتقابل الشباب ..وبتقول عليك ( مابتعرفششششششششششششششششي) ..
• حمادة : ده الموضوع ديه ...مش بس أصحابي هما اللى عارفينه ....ده كل البلد ...والفضائيات ووسائل الإعلام ..عارفة كده ...
• قراقوش : يعني أعمل أيه ..في ( الجماعة ) ...
• حمادة : هو انت تعرف تعمل حاجة ياجدو ...مع ( الجماعة ) ....
• قراقوش : على رأيك يا ابني ..انا ما أعرفشي ..أعمل معه ...حاجة ...ده كانوا موتوني ...
• حمادة : معقولة ....للدرجة ديه .
• قراقوش : أه للدرجة ديه ..وأكتر ...ثم أستدرك قائلاً : ما بتعرفشي الجماعة قالت أني ما أعرفشي أيه بالظبط
• حمادة : قالت أنك ما بتعرفش تعمل أي حاجة ....إلا بأمر منها ...
• قراقوش : أزاي يعني ...
• حمادة : يعني أي قرار من قراراتك أو أي قانون ....أو خطبة حتى ليك ..لازم ..الجماعة توافق عليها ..
• قراقوش : ضاحكا مقهقها .....يااااااااااااااااااه ... انت قصدك على قرارتي وقوانيني ...ياه الحمد لله ...دا أنا أفتكرت حاجة تانية ....
• حمادة : حاجة تانية أيه ...
• قراقوش : لا ...ولا حاجة ....لما تكبر ...هتعرف ....
• حمادة : ما أنا كبير أهو ياجدو ....
• قراقوش :لأ .. مش دلوقتي ....( وحاول أن يغير الموضوع) فقال : طيب ياحمادة ..أيه تاني مضايقك ..
• حمادة : موضوع جبهة الضمير ...
• قراقوش : مالها ديه ..
• حمادة : الناس بتقول عليهم ( جبهة إنعدام الضمير ) ...
• قراقوش : ليه ..
• حمادة : لأنهم – على حسب الناس ما بتقول - ده جبهة لقيطة ....تعمل لحساب نظام ساقط ....تسعى لنيل المناصب ..تلوى الحقائق ...تتجاوز حدودها القانوينة ...تخلط بين السياسي والقانوني ....تحقق أهداف جماعة إرهابية .. تسعى للهيمنة على بلد ..لا تعرف قيمته..
• قراقوش : خليهم يتسلوا .
• حمادة : يعني أيه يا جدو ؟ .
• قراقوش : أصلا ..يا أبني ..أحنا عندنا مخطط لازم يتنفذ ....
• حمادة : أحنا مين ياجدو ...
• قراقوش : قصدى أحنا الجماعة والأهل والعشيرة....ومعنا ...كل ...الأحباب ..من جماعات سلفية و جهادية ...وحماس ...وما أدراك ما حماس !!
• حمادة : طيب أيه هو المخطط ..
• قراقوش : بإختصار ..أننا نبيع البلد ...لأى حد ..يجي يشتريها ...و..ده ..بدأناه بمشروع الصكوك ....ومعاه مشروع قناة السويس ...وفي النهاية ...هنجيب فلوس الجماعة اللى في الخارج ...ونشترى البلد ....وتبقى بتاعتنا ....
• حمادة : آمال حكاية فتح القدس ...ديه ...ياجدو .....وأنك ( محمد الثالث )
• قراقوش : أنت عارف أننا مشغلين ناس ...تجمل صورتي قدام الشعب ...وديه ناس شغالة ..على ودنه ....كل يوم يطلعونى نبي ....أو المهدي المنتظر ...وهكذا خليهم يسترزقوا ....أصلا هما ديه شغلتهم ....وبنعطيهم مكافآت على الفتاوى ديه..
• حمادة : مكافآت أزاي ..مش هم دول معانا في الجماعة ..
• قراقوش : ما هو دول سواء أكانوا معانا في الجماعة أو من المتعاطفين معانا ....بنعطيهم مكافآت .....مناصب ....وزارية أو محافظين ....أو رؤساء جامعات ...وهكذا ...
• حمادة : آمال ياجدو ...موضوع ( القضاء ) أيه حكايته ..
• قراقوش : ده موضوع طويل ...وخلاصته أننا لازم ...ندخل الجماعة في القضاء ....نشيل القضاة الخبرة ... حوالي 3000 أو 4000 قاض ...ونجيب ولادنا ....
• حمادة : ده غير اللى موجودين ...جو القضاء
• قراقوش : قصدك ( قضاة من أجل الجماعة ) ....دول أصلا ..ناس بتوع مصالح ...وتاريخهم معروف أنهم ...ماشيين تبع مصلحتهم ...ودول طبعا هنستعين بهم ... لهدم مؤسسة القضاء ...
• حمادة : طيب أيه موضوع نهر النيل ....وسد النهضة بأثيوبيا ...
• قراقوش : ده موضوع كبير ....وبعدين ...أحنا ما يهمناش موضوع المياه ....أحنا نخلي الشعب يشرب مية معدنية .... ونأجر كام فدان هناك في أثيوبيا ....وخلاص .....ونقعد ندعي ربنا .... ينزل لنا المطر ...
• حمادة : طيب ياجدو ....أنا في المدرسة فرقوا علينا إستمارة ...اسمها ( تمرد ) ...عشان يخلعوك من كرسي الحكم .....وبصراحة زمايلي أقنعوني بأنك لا تصلح للحكم ...فوقعت عليها ...فمتكونشي زعلان مني ..
• قراقوش : يا بني ..تمرد أيه وبتاع أيه ...أحنا ..محضرين ليهم رجالتنا من الشباب والبلطجية ..الجماعة بتوع ( تمرد ) هيأخذوا علقة صعبة في اليوم ديه ....( ثم يستدرك ) ....طيب ياحمادة أنا هاسيبك عشان عندي خطاب تاريخي هاقولوه للشعب ....
• حمادة : لا يا جدو بلاش ....ده كل خطاب ....تقولوه ....الناس بتضحك عليك ....وأنا بأتكسف من زمايلي ...
.
******
• وتبقى كلمة :
1- مبروك لمصر عودة الجنود المخطوفين ...ولكن ماذا عن الخاطفين ؟ أين حق الدولة في العقاب ....هل ضاع عند العشيرة والأحباب ؟ .
2- إعلان هام : على أي حد يشوف الست ( شفافية ) ... أن يبلغ أقرب وسيلة إعلامية ...بشرط أن يكون ذلك في ( سرية ) ..
3- البعض ينادي بحل المحكمة الدستورية عن طريق الاستفتاء .طيب ليه التكلفة ديه ....خلى رئيسكم يعطي إشارة وحازمون يجيبوهم في شيكارة .
4- صحيح العلم نور .... لكن الظلام الذي تنشره الحكومة في ربوع مصر ....تستهدف به إطفاء نور العلم ...اكتفاء ًب( قنديل ) .
5- هل من حق الطلاب رفع دعوى على الحكومة لأنها تم توفر المناخ الملائم لأن يروا ( نور العلم ) بعيدا عن ضوء الشموع واللمبة الجاز.
6- عدم استجابة مجلس الشوري لقرارات المحكمة الدستورية هدفها هو إستمرار مجلس الشوري حتى ينفذ الأجندة التشريعية لأخونة الدولة .
7- لا حل أمام الأخوان تجاه جهلهم القانوني - الذ ي كشفته المحكمة الدستورية - أما أن يتعلموا القانون أو يعدلوا الدستور المعيب .
8- فكرة للأخوان حتى يتفادوا ( طوفان 30 يونيو القادم )..وحركة ( تمرد ) ... خلوا مجلس الشوري يصدر قانونا بتقديم شهر رمضان شهرأ ليبدأ 9 يونيو ..فمش معقول الناس هتنزل في الصيام ...
9- شركة أخوان جولدن ماير للسينما تقدم الفيلم الذي قلب موازين السياسة في العالم ...فيلم : ( جعلوني رئيساً ) ....
10- فيلم : ( جعلوني رئيساً ) فيلم يفتح باب الأمل ..لأي مواطن أيا كانت درجة ذكائه ...للدخول لعالم السياسة حتى يصل لكرسي الحكم.
***
* د. محمود العادلي - أستاذ القانون الجنائي ورئيس قسم القانون العام - كلية الشريعة والقانون بطنطا - والمحامي أمام محكمة النقض والإدارية العليا والدستورية العليا