أدفع علشان تشتغل.. شريف إدريس يعلن أسباب اعتزاله الوسط الفنى

بحث الفنان شريف إدريس عن فرصة عمل خارج مصر بسبب الظروف المادية التي يتعرض لها بعد أن أعلن اعتزاله الوسط الفني نظرا لعدم عرص أى عمل فني عليه لفتره طويلة واحتياجه للمال لتربية أبنائه.
ونشر إدريس عبر حسابه الخاص علي موقع التواصل الاجتماعي "فيس بوك" قائلاً:"بسم الله الرحمن الرحيم.. بعد 35 سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي، وأي حد عنده فرصة سفر ليا هاكون شاكر ليه وده طلبي الوحيد".
وأوضح شريف أن سبب اعتزاله عن الوسط الفني بقوله: «ده قرار أخدته بعد ما الأمور وصلت في الوسط الفني لمرحلة عبثية، وصلت إني بقيت بشوف بعض الزملاء بيشحتوا الشغل علني علشان يشتغلوا لأن الشغل بقي متقسم على ناس معينة، فلو الأمور وصلت لكده أبعد أحسن».
وتابع الفنان المصري في منشوره: «حتي لما بيجي شغل بيتفرض عليك توافق بأقل الفلوس وتخرج من الشغل مديون، ومواقف مهينة زي إن شركة إنتاج تعرض عليك أجر
هو قيمة ربع أجرك، والسبب إن الميزانية مصروفة على الديكور، طب خلو الديكور يمثل».
وذكر إدريس أحد المواقف التي تعرض لها وهو من ضمن أسباب قرار اعتزاله قائلا: «هحكيلكم موقف حصل معايا من أسبوع، اتصل بيا حد قالي عايزين حضرتك بكرة عندك تصوير في مسلسل كذا بس هتدفع عشرة في الميه ل»الكاستينج دايركتور«، كان هيجيلي جلطة بعد ماقفلت المكالمة، ووافقت علشان أنا محتاج اشتغل ومحتاج فلوس، وماقدرتش استوعب الفكرة بصراحة إني بعد العمر ده مضطر ادفع علشان أشتغل فاتصلت واعتذرت».
واستطرد شريف إدريس: «ده الحال حاليا، إن الأمور بقت في إيد»كاستينج دايركتور«، وده موقف من مواقف كتير مريت بيها لو حكيتها محتاجة كتاب مش بوست على الفيس».
وواصل: «طالما الشغل بقى لازم يتدفعله، وطالما الشغل بقى بالشحاتة، يبقي بلاش أحسن، أنا طول عمري راضي الحمد لله، بس
حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي، لأني وصلت لمرحلة نفسية ومادية إني بقيت مش قادر أربيهم ولا أصرف عليهم، وأنا عندي 3 أطفال بعبدهم عبادة، متخيلين حجم المسؤلية، وبقيت مديون لطوب الأرض».
ووجه شريف رسالة للجمهور قائلا: «حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما أموت، لأن حقيقي أنا مش قادر أعيش في البلد دي تاني، أنا حاولت أسعي في أي مجال تاني بس ماقدرتش، وحقيقي لو اتعرض عليا بطولات بعد البوست ده هرفضها، لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شئ».
وتابع الممثل المصري قائلا: «همسح أبلكيشن فيسبوك من تليفوني، لأني هنزل أبيع تليفوني أصلا، فأنا هكون متاح أونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد».
وختم شريف إدريس منشوره بقوله: «أنا مش محتاج طبطبة من حد، أنا محتاج فرصة سفر وشغل تخليني أعيش ولادي حياة كريمة وبس.. شكرا ليكم محبتي للجميع.. هاين عليا أقوم أرمي نفسي من البلكونة بعد ماوصلت إني أكتب البوست ده»