محمد هنيدي يروي التفاصيل الكاملة لطموحاته أثناء فترة المراهقة

قال الفنان الكبير محمد هنيدي: "بستخدم السوشيال ميديا في الهزر مع أصحابي والناس كلها بدون تجريح وحبتها لأني أقدر أكلم الناس كلها، وأنا اللي برد على معظم التعليقات، وبقى في علاقة صحوبية بينى وبين الجمهور".
وعن تحديه للمصارع تربل إتش، أضاف "هنيدي"، خلال برنامج "معكم"، تقديم الإعلامية منى الشاذلي، المعروض على فضائية "سي بي سي": "لقيته عامل تحدي على تويتر وقال اللي عاوز يصارعني يتقدم، فروحت متقدم بثقة كبيرة"، مداعبًا المشاهدين: "ضربته مرتين في أبو ظبى مرة في المطار والتانية في الفندق".
وتابع هنيدي: "لما تربل إتش شاف ردي قال أرحب بك، روحت مشير له صورتي من فيلم وش إجرام، وقلتله كنت بهزر سامحني، قلت أهديه لحسن يجيلي وتبقى مصيبة، بس بجد أنا كان نفسي أبقى زي الساموراي، الكلام ده كان في وقت المراهقة كدة وروحت شيلت حديد".
وأوضح: "كنت عاوز التحق بكلية الشرطة وقلت لازم أكون زي قرايبى وكلمت خالي وقالي ماشي، وروحت عند عم صلاح عشان يدربني وأظبط جسمي، وفضل يخليني أشيل
حديد تقيل ووالدي يتخانق معاه ويقوله هتخلي الواد قصير، وهو يرد عليه ويقولي أنا عارف أنا بعمل إيه وأنا اللي قلتله خليني مع عم صلاح بقى".
واستكمل هنيدي: "خالى الله يرحمه لم يقصر وبعتني وفي ظابط استقبلني ودخلت العنبر اللي بيقيسوا فيه الطول، ولقيت الظابط قالي أنت عاوز استثناء رئيس جمهورية، فقلتله للدرجة دي فرق الطول كبير، فقالي أوي وقلتله ميرسي وروحت".
وأردف هنيدي: "قلتلهم في البيت واتجهت بعد كدة للكرة ولم يكن في بالى أمثل غير لما روحت مسرح الجامعة، لأني عاوز أعمل أي نشاط، وكانوا بيعملوا اختبار للناس عشان فريق التمثيل، وأنا بقرأ لقيت الناس بتضحك، فروحت الأكاديمية بعد كدة".