القوى الثورية بالدقهلية تحذر من إحباط الانتخابات

جاءت ردود أفعال الشارع "الدقهلاوي" عقب إعلان وصول مرسي وشفيق للإعادة لتنطلق معها الحوارات والتساؤلات وكان لكل من الفصائل لأحزاب وحركات شبابية وحتى من يطلق عليهم حزب الكنبة أو الأغلبية الصامتة سؤال الي أين نحن ذاهبون ؟؟؟
جاءت القوي الثورية لتنطلق ثورة الغضب في انتصار الفلول بوصول مرشحهم الفريق أحمد شفيق بتنظيم مسيرة مساء اليوم انطلقت من أمام ميدان تحرير المنصورة أمام مبني محافظة الدقهلية وحتى مقر حملة دعم شفيق بشارع قناة السويس بالمنصورة مرددين شعارات (( يااللي راهنتوا علي الاستقرار .. ويا شفيق هتولع نار)) .. ((وحياة دم الشهيد الغالي .. ما نسلم لكلب ضلالي))... ((يا شفيق روح دارك ... زيك زى الكلب مبارك)) .. (( المنصورة قالت كلمتها .. وشفيق تحت جزمتها)) ...
علي الجانب الأآخر جاءت رسالة من حركة شباب 6 إبريل المنصورة لتحذر من الإحباط أصدرته عقب النتائج المبدئية للانتخابات الرئاسية بفوز محمد مرسى مرشح الحرية والعدالة وأحمد شفيق لخوض جولة الإعادة لتحديد أيهما رئيسا لمصر تحذرهم فيها من الارتكان الى حالة الحزن التي انتابت الجميع عقب معرفة النتائج وتشدد فيها على ضرورة التوحد لاستكمال أهداف الثورة وجاء نص الرسالة:
أكيد كلنا بنمر بحالة من الصدمة ومش مصدقين الحالة اللي وصلت لها الثورة لكن قبل ما نبدأ نلعن في كل شيء عاوزين نرجع بالزمن ما قبل 25 يناير عاوزين نذكركم إحنا مين وهما مين؟.
إحنا الحق وهم الباطل .. إحنا الشعب المقهور وهم المستبدين القتلة .. إحنا الجيل اللي وقفنا قدامهم بصوتنا وزلزلنا حصونهم، إحنا الجيل اللي واجهنا رصاصهم ومدرعا تهم .. إحنا الجيل اللي نام تحت الدبابات وواجه القناصة ولما هربوا وقفنا نحمي الشوارع .. إحنا الجيل اللي بيكتب وصيته قبل ما يأخذ شهادة تخرجه""
إحنا عاوزين نذكركم بأن الثورات تأخذ سنين حتى تنجح .. الثورة الفرنسية نجحت بعد 20 سنة،، والمعدل المعروف لنجاح أي ثورة هو 13 سنة و ما فيش ثورة في التاريخ بتنجح في أيام ولا حتى في شهور الثورة تغيير في النفوس وفي أسلوب التفكير قبل ما يكون تغيير نظام .
عاوزين نذكركم بأن عادة اللي بيقوم بأي ثورة بيكون أقل من 2% من الشعب .. لكن بالرغم من كدا أكتر من 65% من الشعب المصري صوّت لمرشحين الثورة .
ووجهة 6 أبريل رسالة الى كلا من "" شباب حملة حمدين صباحي وشباب حملة أبو الفتوح وشباب حملة خالد علي "" مبروك أنتم بقيتم أقوى تنظيم سياسي معارض داخل مصر وأنتم الآن بأياديكم أغلبية الشعب المصري اتحدوا في كيان واحد .. وحتما ستنتصر الثورة بكم .
الى شباب الثورة .. شباب مصر وأملها .. إحنا الأصل .. إحنا الثورة ... وأيا كان شكل الدولة القادم .. الثورة أكيد هتنتصر .. اثبتوا ... وكلم أخوك وحط أيدك في أيده ... خلي أملكم في ربنا كبير .. دماء 1000 شهيد مش هتروح هدر .. والله ما هتروح هدر .. أوعوا تكونوا انهزاميين .. أوعوا تخلوهم ينجحوا أنهم يوقعوا بينا وبين أهلنا وناسنا ، أوعوا تلعنوا الشعب لأنه لأول مرة يختار ... وسوف نرجع أحسن من الأول , وهنتعلم من أخطائنا .. وهنواصل بالثورة وقيم الثورة لكل قرى ونجوع مصر . انشروا الأمل .. انشروا التفاؤل .. إحنا الجيل اللي متعلق عليه آمال وطموحات الأمة العربية .. إحنا الجيل اللي هزمنا المستحيل ... إحنا الجيل اللي هنصنع الأمجاد .. إحنا الجيل اللي هنصنع حضارة تتحاكى بها الأجيال.
هتنتصر .. لأننا واجهنا رأس النظام ونجحنا في إسقاطه بكل جبروته وآلته البوليسية .. إحنا تعودنا على الموت .. مش نخاف من مجرد أشباح لذيول النظام
واختتمت الرسالة كلماتها للشباب مرددين إذا اعتاد الفتى خوض المنايا .. فأهون ما يمر به الوحل .. اثبتوا .. هتنتصر بأذن الله ..
أما ما نشر عبر التواصل في الانترنت من شباب الحركات والتعليقات الساخرة المصورة جاءت لتعبر عن حالة السخرية لما تم من وصول اثنان من المرشحين لسباق الرئاسة الأخير الأول دكتور محمد مرسي الأخواني والرفض بسبب مواقف وسيطرة تعود بنا للحزب الوطني المنحل والثاني الفريق أحمد شفيق والذي يعد من الفلول والذي يمثل نجاحه عودة للفلول ..
وقد أدانت حركة " امسك فلول " بالمنصورة في بيان لها ما حدث من قيام أنصار رئيس وزراء موقعة الجمل ( احمد شفيق ) بشراء الأصوات والتزوير
فى الانتخابات الرئاسية ، مؤكدة على أن هذا هو السبب الحقيقي لحصول شفيق على المركز الأول بالمحافظة ب 420 ألف صوت، كما حذرت من اندلاع أعمال عنف.
وأكدت نحن أعضاء حركة امسك فلول بمدينة المنصورة أن حصول أحمد شفيق على 420.000 صوت من الدقهلية جاء بعد توزيع الكثير من أعضاء النظام السابق مبالغ باهظة وبكثرة فى المناطق التالية "" بلقاس وطلخا ونبروه ""
وأضافت الحركة " نؤكد أننا نتبرأ من كل شخص أعطى صوته لمرشح سجن طره (أحمد شفيق) فى محافظة الدقهلية، وإذا جاء أحمد شفيق رئيسا للجمهورية سوف نقوم بأعمال تصعيديه مختلفة ولكنها ستكون مثلما حدث بدول عربية كثيرة ..
وتوالت التعليقات لتؤكد أن نار الدكتور محمد مرسي ولا جنة أحمد شفيق..
فيقول الأديب طارق العوضي من السنبلاوين لو ترشح أمام أحمد شفيق حجرا لانتخبته فلا عودة للفلول ... ويضيف المحاسب محمد مجاهد من المنصورة مرسي هو الخيار الأول والوحيد لكل حر حتى وأن كان اختيارا صعبا علي البعض ويضيف وليد أبو سمرة نشط سياسي قائلا فلتذهب النخبة والخلاقات الي الجحيم وأنا أعلنها بلا تردد سأصوت لمحمد مرسي موضحا بيننا وبين الأخوان خلاف سياسي أما شفيق فبيننا وبينه دم المجد والشهداء ...