شباك علي الثورة

شوف اللي حصل في البلد

تاريخ آخر تحديث: الاربعاء , 30 نوفمير -0001 02:00
الزيارات: 26
سطحت شوية يعني فردت ضهري ع السرير فغلبني النوم ونعست مش عارف قد إيه لكني صحيت علي صوت ام زينب
نجم يا نجم يا راجل قوم شوف اللي حصل في البلد
فأفقت قائلاً:
خير يا ام زينب اللهم اجعله خير
فقالت لا فض فوها:
مش باين لها خير
قلت بفزع:
فيه إيه يا ام زينب انت بتصحيني ليه دلوقت؟
قالت:
يا راجل البلد كلها سافرت
قلت:
سافرت علي فين يا أم زينب
قالت:
سافرت ع السعودية
قلت:
مين اللي سافر
قالت:
الأزهر والكنيسة والإخوان والحكومة
قلت:
طب وماله دا يبقي خبر كويس
قالت لي:
خبر كويس ازاي يا بن المجنونة
قلت لها:
أكيد كلهم مسافرين يجيبوا أحمد الجيزاوي وباقي المصريين الأسري في سجون نظام آل سعود الوهابي.
قالت:
يا خيبتك دانت خيالك واسع قوي قوم يا راجل وكفياك نوم دانت عفنت نوم
قلت لها:
يا ريتك تسبيني نايم وتصحيني لما يرجعوا بالأسري
ضحكت وقالت لي:
أنا باحمد ربنا إن زينب بنتي طلعت مالهاش دعوة بالسياسة والا كانت اتجننت زيك وزي اختها.
قلت في عقل بالي:
بقي كده يا مصر.. خلاص ما عدناش بنعرف كلمة العيب! الله يرحمك يا شنودة يادكر ويبشبش الطوبة اللي تحت راسك.
ثم قلت لأم زينب:
طب إذا ما كانوش رايحين يجيبوا الأسري تفتكري رايحين ليه بربطة المعلم؟
قالت لي:
رايحين يصالحوا خادم الحرمين ويعتذروا له
قلت لها:
يعتذروا له عن إيه بالظبط؟
قالي لي:
عن اللي عملوه العيال بتوعنا في السفارة بتعتهم
قلت لها:
وهما العيال بتوعنا عملوا إيه يام زينب في السفارة.
قالت لي وهي تضحك:
انت بتسألني أنا انت مش بتقول انهم ولادك
قلت لها:
رح افضل اقول إنهم ولادي لحد ما اموت
قالت:
بعد الشر عنك لكن اشرب بقي من ولادك
قلت:
اللاااه دا احلا مشروب دوقته في حياتي ربنا بحق جاه النبي يحميهم ويكترهم وينور طريقهم ويكفيهم شر اللي يؤذيهم همه دول يابنت يا ام زينب حبة عين مصر من جوه وهمه دول الأمل في بكره