يا بهية .. قولي لهم عيب!

يا بهية بيتك كريم .. ما دخليش بيتك إلا كريم .. لو حكم الزمان عليكي يدخل بيتك نصير للمجرمين .. أوعي يا بهية تكرميه ..
أوعي يا بهية ترضي تخلي مجرم يهين أرضك .. أوعي تخليه يزور أكرم مكان في أرضك .. يا بهية المباديء غالية .. واللي عايز يرضي كل الناس .. حايخسر كل الناس.
يا بهية أوعى تقبلي ولادك يجيبوا بيتك مجرم .. ويقولوا حاينصحوه .. يا بهية اللي يشتم سيدك .. وستك .. وامك .. إزاي تسيبي ولادك يحترموه
يا بهية إزاي ترضي يدخلوه أكرم مكان في أرضك .. إزاي يا بهية ترضي تكون أرضك مكان يوقف عليه .. ويضحك مجرمين.. إزاي يا بهية ترضي مجرم يشاور بعلامة النصر علشان يغيظ ولاد جيرانك وهما في دمهم غرقانين .. مجرم وقليل أصل .. وعملها .. تسكتي يا بهية عليه؟
يا بهية حايقولولك دي مصالح .. ودي سياسة .. إسأليهم عالمباديء .. فكريهم يا بهية إنتي ربيتي ولادك على إيه .. فكريهم يا بهية إن اللي مالوش خير في جاره وولاد جاره يبقى ما اترباش .. واللي يرضى حد يهين أمه .. أم المؤمنين .. دا يبقى أيه .. أكيد مالوش خير في حد ..
طيب يا بهية قكري ولادك .. اللي يشتم أمه ... بنقول عليه في بلدنا إيه .. معقولة نكرمه .. معقولة نسلم عليه .. علميهم يا بهية إيه معنى العيب.
يا بهية إنطقي .. يا بهية رجعي ولادك لأخلاقك .. يا بهية جيرانك بيشتكوا .. ولاد جيرانك بيقتلهم رصاص جاي من هناك .. من عند اللي ولادك النهاردة بيحطوا إيديهم في إيديه ..
يا بهية قولي لأ .. يا بهية قولي لهم عيب .. طول عمرك يا بهية حامية جيرانك .. مش بايعهم للي يضحك في وشك وهو مكار .. يا بهية قوليلهم الدم غالي .. والجار غالي .. ومين يرضى مجرم يقتل جاره .. وبكرة يقول له مرحبا بيك في أنضف مكان في أرضي .. وقال أيه .. جايبينه ينصحوه ..
يا بهية قولي لهم عيب .. ما تذلوش امكم .. كفاية بقى قلة قيمة وقلة حيلة .. حانضيف لها كمان ... قلة أصل .. يا بهية قولي لهم .. عيب.