محلب ومدير الكلية الحربية يروجون للعنصرية.. ويوأدون العدالة الاجتماعية

رئيس الحكومة للشباب: اشتغلوا صنايعية وسواقين تكاتك
مدير الكلية الحربية لطلابه: أنتم رؤساء ووزراء ومحافظين المستقبل
رواد التواصل الإجتماعي لمحلب: الغي التعليم ..وأولادكم يرضوا يشتغلوا على تكتك ..
تصريحان في غاية الدهشة أشعلا مواقع التواصل الإجتماعي الفيس بوك وتويتر أحدهما لرئيس الوزراء المهندس إبراهيم محلب في حواره مع أسامة كمال الدين على قناة القاهرة والناس في برنامج "القاهرة 360" عندما قال إن عصر الوظائف الحكومية انتهى، مشيرًا إلى أنه لا يجب أن يفكر الشباب في عمل مشروع الكافيه من أجل الربح، قائلًا "متفكرش تروح تفتح قهوة عشان تكسب ، فكر تنزل تشتغل بنفسك، فكر تشتغل على توك توك، بدلا من فتح كافيهات"، بسبب كثرة المقاهي.
أما التصريح الثاني فكان للواء أركان حرب عصمت مراد، مدير الكلية الحربية، عندما قال إن طلاب الكلية الحربية ، يعرفون تماماً أنهم قادة المستقبل، وأنهم "الوزراء، والمحافظون، والسفراء، ورؤساء الجمهورية، والمديرون"، بفضل تضحياتهم وعملهم الجاد ، مشيرا في حوار أجرته الزميلة داليا عثمان مع المصري اليوم إلى أن طلاب الكلية الحربية يعرفون كيف يفرقون بين الإنسانية والمودة وبين العمل والالتزام.
اشتعلت مواقع التواصل الإجتماعي بسبب التصريحين السابقين والتى يرى البعض أنهما متناقضان ففي الوقت الذي يطالب فيه رئيس الحكومة الشباب بالعمل في الحرف والصناعات اليدوية والعمل كسائقي "تكاتك" يؤكد مدير الكلية الحربية أن أبناءها هم قادة البلاد في المستقبل.
فكتب "خالد" : "مش المفروض الدولة فرضت غرامة على قيادة التوك توك ومنعت استيراده.. إزاي بتطالبنا بالشغل على التكاتك" فيما أضاف "مينا" "جرب تسوق توك توك.. هو مفيش مشكلة يا فندم.. بس ما تقننها وترخصه وتحددلهم طرق... إنما متقولش كلام في الهوا كدا تبقى مش رئيس وزراء إنت كدة تبقى عامل نشاط اقتصادي".
وتابعت "نور": "عشان تقبضوا عليهم بعد ما طلعتوا قانون إن غرامة سواق التوك توك 1500 جنيه".
وعلق "محمد": "الأحسن نشتغل حرامية أراضي ونجيب مبيدات مسرطنة ولوحات معدنية للعربيات نتاجر فيها أحسن يا معالى رئيس الوزراء".
وقال "حمدي": "الوظائف الحكومية للوساطة والكبار فقط، ده غير إن الجهاز الإداري أغلبه عواجيز، شباب إيه بقى ودولة متقدمة إزاي، قمة التناقض في التصريح نفسه".
وأضافت "إيمان": "يبقي نعلم عيالنا ليه ونصرف دم قلبنا علشان كلية محترمة وفي الآخر تقولي توك توك طيب سيبهم عايشين على المثل القديم إن فاتك الميري إترمي في قرفه وترابه حتى القرف والتراب مستكتره علينا لا إله إلا الله".
وقال "حسين": "طيب يا محلب فين المصانع وقناة السويس الجديدة، والإنجازات العلمية الجبارة والمليون وحدة سكنية والعاصمة الجديدة، الحاجات دي أخبارها إيه".
وعلقت "لبنى": "كده عيب لأننا بندفع دم قلبنا في تعليم أولادنا وهل ممكن أولادكم برضوا يشتغلوا على توك توك، عيب كدة كل إنسان ليه حق إن بلده توفر له وظيفة وحياة كريمة".
وأضاف "جمال": "طيب مدام أخرتها توك توك بالمرة يلغوا التعليم، هتفرق إيه إن كان سواق التوك توك معاه شهادة و? معهوش، يعنى أنت ترضى إن أبنك يكون معاه شهادة ويشتغل على توك توك".
وقال "ياسر": "ده كلام يقوله مسئول في دولة محترمة كل أولاد القضاة قضاة، وكذلك الشرطة والجيش، يرضي مين ده يا ناس باقي الشعب يشتغل على توك توك ولما يركبه يصادروه منه حرام عليك يا محلب".
وعلق "أيمن":"طيب بالنسبة لأبناء المستشارين لما يخلصوا دراسة حيشتغلوا على توك توك برضه ولا ساعتها الوظائف حتتوفر وتبقى موجودة".
وتهكمت "هدى" قائلة: "قمة النجاح لرئيس الوزراء، فعلا كفاءة عالية، مش أي واحد يقدر يعمل الإنجاز ده ويبتكر الأفكار والحلول العبقرية دى، أهم حاجة إن الشعب مبسوط جدا ومرضى، وشايف حجم الإنجازات اللى بدأت تظهر آثارها على الغلابة".