الحوار الذى فضح "ساويرس" يكشف كواليس جديدة

أحد أهم ممولي الإنقلاب العسكري في الثالث من يوليو 2013 ،نجيب ساويرس كان له حوار هام مع جريدة "اليوم السابع" الموالية للإنقلاب تحدث فيه عن مواقفه من وقف برنامج الإعلامية "ريم ماجد" وكذلك عن وقف برنامج الإعلامي "يسري فودة" بما وصفة البعض بأنه حوار فضح كل نواياه رغم أنه تم نشر منذ أيام مضت ولكن التحليلات وتتابع الأحداث كشف الكثير من المفاجأت الجديدة.
وقال ساويرس عن علاقته بالإعلامى عبدالرحيم على، وتفسيره لهجومه الدائم عليه وإذاعته تسريبات فى برنامجه "الصندوق الأسود" له وعن هجوم الإعلامى أحمد موسى عليه .
●فعن إيقاف برنامج ريم ماجد قال سويرس :
- ريم ماجد مش محبوبة وده مش سر، وإلغاء البرنامج لأسباب كتيرة منها إنه ما جابش إعلانات،لأن بصراحة، الناس بتخاف تعلن على برنامج تكون المذيعة اللى فيه ضد النظام ،وريم ماجد ضد النظام الحالي.
●وبسؤاله هل هناك إعلاميين آخرين ضد النظام قال :
- لا أعرف، لكن ما نقدرش نقول إن يسرى فودة ضد النظام.
أما عن سبب ايقاف برنامجه قال سويرس :
- إن فيه ناس كتير جدا شايفه إن يسرى بقى دمه تقيل عليهم،وهو مش بيجدد، غير إن عقده كان انتهى فى الأساس.
●وبسؤاله عن أسباب «الخناقة» الممتدة بين أحمد موسى ويوسف الحسينى، وكلام أحمد موسى عن أن هناك «رجال أعمال بيسلطوا عليا صبيانهم» قال :
- هو أخطأ فى الكلام ده، والمفترض إن لما مقدم برنامج يتخانق مع مقدم برنامج تانى، يخلوا خلافاتهم بينهم وبين بعض، ومحاولة جر أطراف تانية يعتبر ضرب تحت الحزام، وده مش صح.. تانى حاجة «لامؤاخذة».. هل أحمد موسى متصور إنه ممكن يبقى خصمى.. فيه حاجة اسمها شرف الخصومة، ومش هعمل عقلى بعقله.
●وحينما سئل كم شخصا يفكر فى أن يضربك تحت الحزام؟
-قال : كتير جداً ، وأحب اقول لهم ، كان غيرك أشطر، أصل أنا غياظ بطبعى، وبعدين فيه طابور من أبراجى لميدان التحرير يروحوا يقفوا فى آخره بحيث ياخدوا دورهم.
●أما عن الإعلامى المفضل لديه فقال :
إبراهيم عيسى وعمرو أديب.
●وعن إغلاق قنوات «أون تى فى لايف» قال : إحنا بنعيد هيكلة القنوات كلها،
فالمصاريف كبيرة، والعائد الإعلانى بتاع القناة صغير، ومعنديش غير إننا نقلل مصاريفنا، المحطة بتتكبد خسائر جامدة جدا، وفيه مشاكل مالية كبيرة جداً،وهو ما جعل كثير من العاملين فى القناة تتأخر رواتبهم لشهور ، ودفع بألبرت شفيق للإستقالة
●أما عن السر في رغبته شراء قناة «يورو نيوز» قال :
- الفكرة إن الفرصة ما بتتكررش كتير، «يورو نيوز» بتعتبر «سى إن إن» أوروبا، وبالتالى لو نجحت فى ده أكيد هيكون المضمون مختلف تماما، أنت بتتكلم على أكبر نسبة مشاهدة فى أوروبا، فلو دخلت فيها مع بعض التعديلات، العائد المادى بتاعها هيبقى غير طبيعى لو نجحت. بالإضافه أنه مابيعجبنيش قنوات "سى إن إن" و:بى بى سى" وتناولهما لكثير من الموضوعات ، وهو ما سأغيره من خلال يورو نيوز
●وبسؤاله هل الإعلام المصرى حر ، قال
- لأ مش كله.
●ثم سئل هل يربح من الإعلام فقال :
- لأ.. أنا خسرت ملايين.
فسأله الصحفي لماذا تستمر فى الاستثمار فيه رغم الخسائر المادية ،
فقال : لأن ليه يومه، هييجى وقت نكسب منه الكثير
●كما لم ينكر سويرس أنه يؤسس ويمول صحفا من الباطن ولا يضع اسمه عليها.. وقال :
- مش حاطط عليها اسمى علشان القانون، قانون الإعلام والنشر لا يسمح أن يتملك شخص واحد أكتر من %10 من جورنال حتى الآن.. ولما يعدلوا القانون هحط اسمى على الجورنال، معنديش مشكلة فى ده.
●وبسؤاله : كيف يجب أن تكون العلاقة بين الدولة والإعلام قال :
- ما نقدرش نقول إن النظام ما يتدخلش فى الإعلام ، لكن لابد ان تكون العلاقه على اساس احترام متبادل.
●أما عن السبب الحقيقى وراء الأزمة بينه وبين الإعلامى عبدالرحيم على ، قال :
- هو عبدالرحيم على خصم؟! فى حاجة اسمها شرف الخصومة، يعنى أنت توافق إن فلان يبقى خصمك، الناس مقامات، ولما نجيب ساويرس يبقى ده خصمه «تبقى هُزؤت أوى».. هو من مدرسة إعلامية معروفة بتسعى للنيل من الشرفاء والابتزاز، مقابل عوائد مادية مش هيشوفها من واحد زيى.
وأضاف : عبد الرحيم علي جالى فرنسا وطلب منى فلوس كمساعدة، والتقيت بيه على قهوة وكنا وقتها بنجاهد ضد الإخوان، وللتاريخ كان ليه دور كويس جدا فى ده، لأنه قارئ وباحث فى المواضيع دى، وانتهت المقابلة على إنه محتاج دعم مادى.
●وعندما سئل لماذا انقلب عليك فجأة ، قال :
- لأن الدعم ده توقف بعد سقوط الإخوان.
ثم سأله الصحفي : بماذا تفسر عودة عبدالرحيم على لتقديم برنامجه على قناة أخرى بعد استبعاده من القاهرة والناس ، فقال :
- علشان لقى شخص ساذج جديد يموله، وأقول لهذا الشخص: «بعدما يخلص شوال الفلوس، هتندم على الفلوس اللى ضيعتها».
●وعن التسريبات التى تُذاع له قال :
- ضابط سابق بأمن الدولة، باع هذه الأسرار فى مخالفة لمواثيق شرف مهنته بمقابل مادى، وهو معروف لدى الأجهزة الأمنية، ولا أعلم إذا كان تم اتخاذ إجراءات ضده أم لا.
وأضاف : انا معنديش يقين إن الدولة بتسجلى، لكن لو بتسجلى أضايق طبعا، لإن ده اقتحام لخصوصياتى وبرفضه، التنصت جريمة يعاقب عليها القانون، ولا توجد دولة محترمة تقبل أن تُذاع تسجيلات تمت بطريقة غير قانونية، وتقف تتفرج على هذا التجاوز دون أى إجراء قانونى، والموضوع مش محتاج بلاغات للنائب العام، لأن النائب العام والأجهزة القضائية عليهم أن يوجهوا له اتهامات، أقلها يسأل من أين له هذا ومن أين حصل عليه.