شاهد| قصيدة انا كنت في السجن والتهمة قال متظاهر

انا كنت في السجن والتهمة قال متظاهر حلمت في يوم اعيش حتي الحلم بيتتصادر انا كنت نازل اهتف رافع اربع صوابع ازاي بقيت ارهابي وازاي يقولوا صايع وف يوم وقع ادامي واحد مضرب رصاصة والله ماعرفهوش لكن شيلتة بحماسة وبقيت بصرخ ياناس انا شايل الشهيد جريوا عليا عساكر وخدوني ف الحديد وبقيت مسجل خطر ورموني ف الزنزانة زنزانة متر ف متر ياربي ع الاهانة ويوم ف نص الليل دخل الشويش عليا وقالي قوم يا كذا عندك حفلة مسائية مافهمتش الكلام ومشيت وانا مصدوم دخلني ع الباشا وف ايدة كان خرطوم والضرب فيا اشتغل والحفلة كانت موت وجسمي يشلب دم واصرخ بعلو الصوت امضي يا ابن الحرام امضي ع ايه جنابك امضي من غير كلام انا مش هكون خدامك امضي ياناس ع ايه ع حقي اللي اتسرق ولا بالاسم عايش ببطاقة وحبة ورق امضي ع الكرامة اللي التراب عفرها ولا ع الشهيد والجثة لسه فاكرها امضي ع الحرمان من حتي قولت لا ولا اشطب ع اسمي من خانة الحياة مش همضي ع الطاعة مش هبقي تاني مداس لو كان فاضيلي ساعة هعيش مرفوع الراس
احمد الصارم