مانيش طرطور

لا أنا منافق
ولا موافق
أكون طرطور
ولا ف ساقية
غَبَاكوا ف يوم
هالِف وادُوُر
ولا هافرح
بحبّة جاز
ولا بإنجاز
ولا بدستور
أنا ثاير
عشان بلدى
تعيش فى النور
ماشوفش الدّم جوّاها
بيملا بحور
ماشوفش الخاين الظالم
يبات منصور
لا أنا خايف
ولا مُلزَم
ولا مجبور
أكون صابر
على فاسد
يبيع بلدى
فى سِت شهور
***
لا أنا سلفى ولا إخوان
لا أنا ليبرالى أو علمان
أنا إنسان
بلِفّ الكون ورا الحكمة
ورا الكلمة
ورا الحق اللى بُكره يبان
وأشوف الحب يتجدّد
وأشوف الظلم يتبدّد
وأشوف العدل يتمدّد
فى كل مكان
***
أنا مصرى
ومُش حَصرى
لكنّى غَيور
على دينى
على عرضى
على حق العيون فيكى.
تِشوف النّور
***
أنا اللى دموعى سابقانى
لطفل حزين
أنا اللى الظلم يقتلنى
بقاله سنين
لكن بحلم
ومُش ليّا
لناس تانيين
فسيبوا الحلم جوّايا
بلاش تخوين
***
أنا اللى صرخت: حريّة
بكُل حَماس
أنا اللى صَدَقت فى النيّة
لكُل الناس
وأنا اللى هاموت فِدا بلادى
ولو كانت.. بلا إحساس
ولو كانت.. بلا إحساس