أبانوب مجدى يكتب : قتلونى انا الحسيني ابو ضيف

قتلونى انا الحسيني ابو ضيف

قتلونى ومشيوا ورايا ف جنازتى

فاكرين صرخة الحر الشريف

هتخاف تكونلها نفس نهايتي



قتلونى علشان قولتلهم لأ

ورافض سياسة سعادة البيه

قتلونى عشان اصحاب الحق

يخافوا لو يوم يطالبوا بيه



قتلونى ونسيوا انى م بموتش

ايوا فيه منِّي بالملايين

عايشين ايام سوده مبتفوتش

فى ظل حُكم المخفيين



قتلنى الرصاص جوا حناجر

ياوافق عليهم يااما اهاجر

وإلا هلقي نظامه الفاجر

يسَيَّح دمى على الرصيف

قتلونى انا الحسيني ابو ضيف





جوا نعشي سامعكم ياشعب

بتصرخ شبعت خلاص خيانه

والتمن ده مهما يبقي صعب

مش هتعيش ف توب مهانه



مش هتسكت ع اللى ظالمك

ورافض صوتك يهز قصره

مهما كان ده اللى حاكمك

جاى بصوتك ومش بأمره



مش هتضحك عليك جلاليب

ودقون اطوال ,اشكال والوان

مش هتسيب عقلك يغيب

وترجع تعيش ف ذل وهوان



مش هتسكت يوم على حاكم

قالك هجيب حقك واحاكم

ومجبش وظُلمه عليك اتراكم

وف جرايمه عمال يضيف

قتلونى انا الحسيني ابو ضيف





مصر اصلها فاكرنها لقيه

وكل خسيس اهو ليه اطماع

هيقنعوك بالمحايله والمداديه

بحبة شعارات كلام خدِّاع



وافقت هتبقي وطنى وحبيبهم

خايف ع البلد وعلى استقرارها

رفضت هتبقي كافر بدينهم

وخاين عاوز تخرَّب ف دارها



كل وشوشهم لابسه قناع

البراءه والامانه والانصاف

وان صراعهم ده مش صراع

ده خوف ع البلد م الانجراف



وان هما متدينين

وحروبهم مع المُخرِّبين

والبلطجيه والمأجورين

قتلونى وإدعائتهم زيف

قتلونى انا الحسيني ابو ضيف





واللى ساكت اوعى تفكَّر

ان سكوتك مسيره يحِل

ده مهما تقفل ببان وتسكَّر

ايد الظلم دى مش هتكِّل



قتلونى ومسيرهم هيقتلوك

واللى حايشهم انك بعيد

لكن اول م هيطولوك

هيبقي اسمك اسم شهيد



وعاوزك تعرف انه مهما

يكتر دمِّنا ويعلى صياحوا

هنفضل نثور , نعارض لما

نجيب حقنا وحق اللى راحوا



اطلع وارفض يكون دستور

حامى نسور ليها الفجور

ظالم عصافير حلمها نور

ولو تشوفه هيطولها سيف

قتلونى انا الحسيني ابو ضيف