بالفيديو.. «أديب» ساخرًا من غرق قطر بالأمطار

سخر الإعلامى عمرو أديب ، من دولة قطر بعد غرق شوارع عاصمتها الدوحة بمياه الأمطار الغزيرة، قائلاً: «شوفتوا الأمطار في قطر عاملة ازاى، قطر اللى هي أكبر صندوق سيادى محلق بأجنحته في العالم، نزلت شوية مطر في قطر،غرقت في شبر مياه، هذه هي قطر الشقيقة، الدوحة لوحة غرقانة».
وأكمل «أديب» حديثه بسخرية عن «قطر»، خلال برنامجه «القاهرة اليوم»، على قناة «اليوم»، مساء السبت، قائلاً: «طبعاً الجزيرة ماجابتش سيرة أي حاجة من دى خالص، الجزيرة دلوقتى مش موجودة في قطر، طلع ياجماعة والله وأعلم إنه نفس المقاول اللى عمل البلوعات في إسكندرية هو اللى عملها في قطر، طبعاً احنا بنتضامن مع الشعب القطرى، ولو حابين حد يسلك أو حد يشفط احنا أحسن ناس، ومستعدين نعمل زى ماعملنا في قرية عفونة، نبعتلكم أكل وشرب وكل حاجة، بس لا تعايرنى ولا أعايرك، البلاليع طايلانى وطايلك، أنا كنت قاعد وانا بشوف المنظر ده قلبى يقطر دماً، اتفضلوا شوفوا المعاناة اللى فيها الشعب القطرى الشقيق».
وأضاف «أديب»، قائلاً: «أرجوكم محدش يتريق على بلاعات إسكندرية تانى، لما يسلك بلاعته الأول، يبقى يتكلم عن بلاعتنا، الناس دى عندها فلوس بتقول أوديها فين، إنما مصر بتقول أجيب الفلوس منين».