بعد أزمة «نفرتيتى».. تماثيل «طه حسين ومحفوظ وشاهين» تنتظر الإزالة

حالة من الجدل والاستياء تسبب فيها التمثال المشوه للملكة نفرتيتى، فى مدخل مدينة سمالوط بالمنيا، حيث بدت هيئة الملكة الفرعونية الجميلة فى صورة قبيحة لا تليق بواحدة من أجمل ملكات مصر، ما دفع المحافظة للتخلص منه، وإحالة الأمر برمته للتحقيق. واقعة تمثال «نفرتيتى» كانت حافزاً لدى المهتمين بالفن التشكيلى لفتح ملف التماثيل المشوهة الأخرى التى تمتلئ بها ميادين مصر.
رنوة محمد، فنانة تشكيلية سكندرية، كثيراً ما عبرت عن استيائها من تماثيل عدة فى محافظتها وبقية المحافظات التى زارتها، وتقول: «كان عندنا تمثال برونزى فى محطة الرمل السنة اللى فاتت الناس كسرته، وما زال عندنا تمثال يوسف شاهين اللى متركب له نضارة بلاستيك، ده غير الأعمدة الرومانية اللى حبوا يطوروها فى سيدى جابر فحولوها إلى شىء يشبه السرير النحاس، اللى مضايقنى إن الموضوع يزيد، تمثال نفرتيتى لخص اللى واصلين له من زمان، ومش هيكون آخر مصيبة تحصل».
حالة الغضب نفسها كانت لدى د. شريف عبدالبديع، أستاذ النحت بكلية الفنون الجميلة بجامعة المنيا، ويقول: «الناس بتتكلم كأن تمثال نفرتيتى هو الكارثة الوحيدة، ما يعرفوش إن المصيبة مستمرة بقالها سنين والكل بيشوفها فى آثار بيتم طلاؤها بطلاء عادى زيها زى باقى الحيطان والأرصفة، حتى لو من حجر الجرانيت، زى النصب التذكارى للشهداء قدام جامعة القاهرة مش ناقص غير يدهنوا تمثال نهضة مصر بمبى».
«عبدالبديع» لفت إلى حالة من القبح تسيطر على عدد من التماثيل الشهيرة «تمثال زى طه حسين فى ميدان الجلاء سيئ، وضعيف وسط الفراغ الكبير حواليه، كأنه ناموسة واقفة، وتمثال نجيب محفوظ لا هو جسمه ولا شخصيته فى المشى، غير إنه فيه مشكلة فى النسب، ناهيك عن أعمال محطة الرمل وسيدى جابر فى إسكندرية وغيرها كتير، التماثيل الجميلة يتم تشويهها والتماثيل الجديدة مشوهة بالفعل، لحد ما وصلنا لتمثال سمالوط، اللى بعتبره نوع من التهريج والاستخفاف». واستبدلت الوحدة المحلية لمدينة سمالوط تمثال نفرتيتى بلافتة مضيئة مدون بها الآية القرآنية «ادْخُلُوهَا بِسَلَامٍ آمِنِينَ». وكشف الفنان الكبير عبدالله دوستاشى عن تدمير تمثال «كاتمة الأسرار»، للمثَّال المصرى العالمى محمود مختار، ودعا عدد من النشطاء المهتمين بالتراث، محافظ الإسكندرية هانى المسيرى إلى تجديد التمثال الموجود بالحى اللاتينى، بعد ظهور كسور وشروخ فى التمثال.